أحرج الإعلامي خالد الغندور،هشام حنفي نجم الأهلي السابق، على الهواء، بسبب أزمة إمام عاشور، لاعب الأحمر، والمقارنة بين فترته في الزمالك والأهلي.
ودار هذا الحوار بين الغندور وهشام حنفي عبر برنامج ستاد “المحور”.
الغندور:” نتكلم عن إمام عاشور ولا لا؟ “.
ليرد حنفي:” لأ ده حديث الساعة.. عادي لازم نتكلم “.
ويواصل الغندور:” أصل قالك إمام كان ماشي مش كويس في الزمالك، ولما راح الأهلي، الأهلي بيعلم وبيربي وبيغير في السلوك، فرجع إمام عمل كارثة! إن عندك ماتش ومسافر مع فرقتك وما تجيش! وقافل موبايلاته.. إيه رأيك في اللي حصل ده؟ عيب إمام ولا تقصير من الأهلي؟”.
ليجيب حنفي:” لا الأهلي ملوش دعوة خالص، أنا بقول الأهلي ملوش أي علاقة نهائي.. أنا راجل في النادي الأهلي من عندي 9 سنين، النادي الأهلي عنده سياسة وعنده مبدأ ونظام وسيستم، محدش بيقدر يخرج عنه”.
وأكمل:” واللي بيخرج عنه هو اللي بيبقى شاذ وهو اللي بيتخصم منه، والجمهور بيقلب عليه ومبيبقاش محبوب لدى الجماهير ولا الإدارة مهما عملت.. النادي الأهلي كيان كبير جداً من أول رئيس نادي للنادي لغاية كابتن محمود الخطيب”.
وشدد حنفي:” أكيد إمام هو اللي غلطان مش النادي الأهلي، إمام غلطان جداً، حسب حسبة غلط، حسب إنه دلوقتي هو اللي على الحجر وإنه كويس قوي فممكن يعمل أي حاجة وهتتغفر له”.
ليعود الغندور قائلا: “هشام، أنا اللي عايز أوصله إن الناس في الزمالك كانوا بيقولوا الزمالك معرفش يغير سلوكه، وأنا كنت بقول يا جماعة الزمالك ملوش علاقة، سلوك البني آدم مرتبط بيه، مفيش.. طريقته وأسلوبه ودماغه وتربيته ومراهقته وعقليته (المنتاليتي)”.
وأشار:” بس الناس تقول لك لا الزمالك كان بيعمل بلاوي وبيغلط ولكن لما يجي الأهلي هيتقوم.. فالنهارده إمام خد مليون خصم قبل كدة، والنهارده مليون ونص، إذا الموضوع مش مرتبط بأندية بقى، مرتبط بعقلية”.
ليرد حنفي: “في النهاية النادي الأهلي بيطبق عليه اللوائح، ممكن في نادي تاني ما كانش بيطبق عليه اللوائح”..
ثم واصل خالد الغندور:” ما هو النادي مش هيربيه يعني! “.
ليكمل حنفي:” لأ أنا كنادي هربيك يعني لو غلطت بتتحاسب، النادي مابيدلعش والموضوع مش هيعدي، أنا معنديش معلومة عن نادي الزمالك، لكن بكلمك عن النادي الأهلي، يوم ما هيوقع عقوبة هي فعلاً حقيقية وهتتنفذ”.
وتدخل خالد الغندور مرة أخرى:” طب ما هو كهربا قبل كدة اتعمل عليه مليون جنيه وكابتن محمد رمضان بعدها بـ 3 أيام شال العقوبة؟”.
ليشير حنفي:” لا اتخصمت والله، أي حاجة بتعلن في الإعلام بتتخصم بالفعل.”.
ووجه الغندور سؤال جديد:’ والنهارده شايف إنه هيتوقف الـ 5 ماتشات؟”.
ليؤكد حنفي:” أيوة هيتوقف طبعاً، ده قرار إداري وقرار تربوي، ده واحد تخلف عن البعثة في مهام بطولة كبيرة، مش رايح ماتش ودي! ده أنت قفلت تليفوناتك وما اتكلمتش.. أنا بشوف إنه تصرف لا أخلاقي وخطأ كبير منه وحسبها غلط”.
واستأنف خالد الغندور:” أنت بتقول تصرف لا أخلاقي؟ طب ما حسين الشحات سب وضرب لاعب وبعدها بيومين لعب، والنادي الأهلي وقتها عاقبه ؟ الأخلاق مش مرتبطة أنت عملتها فيا ولا في غيري، الأخلاق مرتبطة إن أنا كمؤسسة عايزك تبقى ماشي على نظام، عايز اللاعب بتاعي يكون قدوة وماشي على طريق مستقيم”.
ليختتم: “حنفي:” إحنا لما كنا بنلعب، هادي خشبة مثلاً كان له أسلوب وشخصية وإحنا لينا أسلوب، أنا كنت عصبي جداً في الملعب وبحماس، هادي كان هادي جداً وقراراته هادية حتى مع الحكم.. أنا عندي لائحة وكل العالم ماشي بلوائح”.
