تحدث اللواء أشرف نصار، رئيس نادي البنك الأهلي، عن ملامح خطة النادي خلال الموسم الحالي، وطموحاته في المنافسة، إلى جانب موقف عدد من لاعبي الفريق من الاستمرار أو الرحيل، كاشفًا تفاصيل سياسة الإدارة في التعامل مع العروض المحلية والخارجية.
وقال أشرف نصار في تصريحات عبر برنامج «اللعيب» على قناة “MBC مصر”: “تعبنا جدًا قبل بداية الموسم عشان نكوّن فريق قوي، ويكون عندنا في كل مركز لاعب أو اتنين على نفس المستوى، عشان ما نتأثرش لو حصلت إصابة أو إيقاف، وهدفنا الأساسي إننا نكون وسط الفرق المتقدمة في جدول الدوري بإذن الله”.
وتابع: “الطموح حق أي نادي في كرة القدم، بس طبعًا التعادل مع فريق كبير زي الأهلي نتيجة كويسة بالنسبة لنا، وهتساعدنا نحقق أهدافنا خلال الموسم”.
وبخصوص موقف مصطفى شلبي من العودة لـ الزمالك، قال: “مصطفى شلبي مكمل معانا، ومفيش أي نية لرحيله، وهيفضل لاعب في صفوف البنك الأهلي”.
وأضاف رئيس نادي البنك الأهلي: “أسامة فيصل عندنا اتفاق واضح معاه إنه يكمل، وهو حابب الاستمرار معانا، واتفقنا نفتح الكلام في الموضوع تاني في الانتقالات الصيفية الجاية لو جه عرض مناسب، إنما دلوقتي هو مستمر لحد نهاية الموسم”.
وعن وجود اهتمام من الأهلي أو بيراميدز بضم أسامة فيصل، أوضح: “مفيش أي نادي قدم عرض رسمي، لا الأهلي ولا بيراميدز، كان في كلام كتير بس مفيش حاجة رسمية، وأنا دايمًا بتعامل بالمبدأ الأول، يا موافقة يا رفض، وبعد كده نتكلم في الأرقام”.
واختتم تصريحاته عن حقيقة انتقال عمرو الجزار مقابل 60 مليون جنيه للنادي الأهلي قائلًا: “مش فاكر الأرقام الخاصة ببيع اللاعب، ومقدرش أحدد رقم معين”.
