وجه علاء ميهوب، نجم الأهلي، السابق، رسالة عاصفة لـ إمام عاشور، لاعب الأحمر، بعد تمرده على الفريق ورفضه خوض مباراة يانج أفريكانز بدوري أبطال إفريقيا.
وقال ميهوب، خلال تصريحات تليفزيونية عبر برنامج “ملعب اون”، على قناة” أون سبورت” ردا على سؤال رأيك إيه في الأزمة كاملة في قصه إمام عاشور؟:” بص أنا مش هتكلم على الأزمة في حاجة خالص، أنا لا يخصني الموضوع هو ما سافرش ليه، هل هو كان تعبان مش تعبان؟ هو أكيد الموضوع اتعرف وإدارة النادي الأهلي يعرفوا الموضوع كويس قوي، والموضوع كله هيبقى جوه النادي الأهلي، وأكيد مع وليد (صلاح الدين) وإدارة النادي هيشوفوا”.
و أردف:” أنا بس عايز أتكلم في نقطة مهمة قوي صغيرة جداً، لازم يا إمام تعرف أنت فين بالظبط. لازم تعرف أنت فين بالظبط، أنت يا حبيبي في النادي الأهلي، في أكبر نادي في أفريقيا والشرق الأوسط، وأي حد يتمنى يمشي جنب النادي ده مش ينتمي للنادي الأهلي”.
وتابع ميهوب:” أنت بقالك تلات سنين في النادي الأهلي جميل، وجاي طبعاً كنت قبل كدة في نادي الزمالك برضه نادي كبير وله تقاليده ونفس الكلام بقوله على إمام بالنسبة للأهلي هو هيتقال للزمالك لأن نادي الزمالك نادي كبير بجماهيره ببطولاته بشعبيته الكبيرة عشان ما نفرعش المواضيع”.
وأشار:” فأنت لما جيت النادي الأهلي وبقالك تلات سنين زي ما أنت بتقول ‘أنا ما عملتش حاجة’.. لا أنت عملت قبل كدة برضه مشاكل كتير قوي واتخصم فلوس منك كتير جداً برضه لا يعنيني بشيء”.
وشدد ميهوب: “لازم تعرف إن النادي الأهلي ده بجماهيره بإداراته ببطولاته باللاعيبة العظيمة اللي جت على مدار التاريخ، وأكيد طبعاً في ناس ما أقدرش أقارنها بيك ولا حاجة لأنهم في حتة تانية خالص، لاعيبة فعلاً عظيمة كبيرة جداً، عمر النادي الأهلي ما وقف على حد.. ياما لاعيبة عظيمة اعتزلت أجيال”.
وأضاف:” فحضرتك لو مش عارف قيمة النادي الأهلي وجماهيره أنا هقول لك تعرفها إزاي؛ لأنك قبل ما تبقى لعيب كويس وياما النادي الأهلي فيه لاعيبة كويسة قوي، لازم تعرف احترامك للنادي ده كويس قوي واحترامك لجماهيره مهما كنت”.
وواصل ميهوب:” عظيم يا سيدي في الكورة واللي أنت فيه ده ماشي، لكن التلات سنين اللي في النادي الأهلي حاجة وعمرك قبل كدة في الكورة حاجة تانية”.
وزاد:” أنا حتة النادي الأهلي يا إبراهيم ما أقدرش أمسك نفسي عليها، بجد، لاني ما ينفعش التلات سنين اللي لعبت فيهم في النادي الأهلي أنت أخدت نجومية واتسلطت عليك أضواء وما شاء الله مادياً أكتر ما شفتهاش في حياتك، فأوعى شيطانك يلعب بدماغك كدة مرة وتقول ‘لا أنا هكبر شوية على النادي الأهلي'”..
وأستأنف ميهوب:” أقسم بالله ولا تفرق مع النادي الأهلي ولا جماهيره وتتنسي خالص خالص. ولا شيطانك ولا حد يوزك بكلمتين ‘بلاش النهارده وما تروحش’.. أنت كدة عمرك ما تبقى لعيب النادي الأهلي خالص”
واستطرد:”، أنا بس عايز أعرفك أوعى تعمل حركة تاني تسيء أو تيجي جنب حتة النادي الأهلي وجماهيره، جماهير النادي الأهلي مطلعاك لسابع سما، وأيمن عارف كويس قوي أقسم بالله ممكن تخسف بيك الأرض، وجماهير النادي الأهلي ما شاء الله حاجة الواحد بيفتخر بيها”.
وأنهى: “فيا رب تتعلم من الحركة دي، وخليك حاجة واحدة بس ‘لعيب كورة في النادي الأهلي’ فأوعى الموقف ده يعدي كدة.. اتعلم. وأكتر حاجة تموت لعيب الكورة إنه ما يلعبش، خليك بعيد بقى شوية عشان تعرف قيمة النادي ده”.
