في تصريحات خاصة وقوية، كشف الإعلامي سيف زاهر عن تطور مثير ومفاجئ يتعلق بمباراة الزمالك ونادي زد المرتقبة، مؤكداً أن لغة المصالح الفنية تراجعت أمام “حلاوة الكرة” وقيمة الجماهير.
تفاصيل المبادرة: “المدرج أبيض بخطين حمر”
وقال زاهر،خلال تصريحات تليفزيونية ببرنامج “ملعب أون”،عبر قناة “أون سبورت” :” كل السوشيال ميديا النهاردة لجمهور نادي الزمالك، وده توضيح الحقيقة من إدارة زد في هذه المسألة، كل الناس كل جمهور الزمالك عايز تذاكر لمباراة نادي الزمالك ونادي زد”.
وتابع: “منهم إدارة نادي الزمالك، يعني ناس في الإدارة بتقول إن دي في كوتة محددة من شركة تذكرتي اللي بنوجه لها الحقيقة كل التحية وكل الاحترام، لأن نجاح منظومة الجمهور دي جزء كبير جداً الأمن المصري، الشركة الأفريقية، شركة تذكرتي”.
وشدد زاهر:” شركة تذكرتي الحقيقة عاملة نظام أكثر من رائع، في ناس أو في إدارات عندها فكر إن أنا النهاردة ليا كوتة هاخد التذاكر دي، والتذاكر دي أنا مش هبيعها، التذاكر دي حاجتي عندي جمهور، والله أنا معايا 10 تذاكر، أنا عندي اتنين تلاتة هيروحوا، السبعة التانيين هحطهم في الدرج”.
و أضاف: “دي النهاردة مش إدارة نادي زد حتى لو هي بتلاعب الزمالك والأهلي واتكلمنا في القصة دي قبل كده، إدارة زد في المسألة دي عندها دايماً وجهة نظر؛ زد أخد كوتة في المباراة دي في التذاكر، لو نادي الزمالك محتاج تذاكر أو أي حاجة من الكوتة إدارة زد هتتواصل مع نادي الزمالك والتذاكر اللي عايزينها ياخدوها، خلاص كده الأمور واضحة”.
وواصل زاهر:” زد مش صاحب نظرية إن أنا آخد التذاكر بس ما حدش يخش، لا، مسؤولي زد عايزين الناس تخش، عايزين الجمهور يبقى موجود، في نظرية بتقولك إن الجمهور أصلاً المدرجات دي للجمهور، يعني أنا النهاردة في 15000 وأنا نادي منافس ما عنديش جمهور، هيبقوا 16000 هيبقوا 18000 إيه اللي هيحصل؟ خلونا نغير الفكر، خلونا نروح لمنطقة تانية، خلوا حتى الجمهور يبقى محترم المنافس، يعني أنا إنت النهاردة بتسمح لي إن أنا أكون موجود ما فيش مشكلة، واللعب في الآخر للملعب، وشجع فرقتك زي ما أنت عايز”.
و أردف: “إذاً موضوع التذاكر ده عشان الأمور تبقى واضحة في مباراة زد ومباراة الزمالك، إدارة زد بتتواصل حالياً مع إدارة الزمالك، أي حد من إدارة الزمالك محتاج كوتة من التذاكر بتاعة زد يتصل بإدارة زد أو يتواصل مع إدارة زد، هيبعتوا التذاكر لحد نادي الزمالك، وده يعني موضوع سهل جداً ما فيهوش حاجة، ما حدش هياخد تذاكر عشان الناس ما تخشش، ده عمره ما هيحصل، لأن المهم عند الإدارة أو الإدارة اللي عندها رؤية إن الجمهور يكون في الدرجات”.
وأشار زاهر:” ده إدارة زد هتعمله مع الأهلي ومع الزمالك ومع المصري ومع أي نادي جماهيري عايز تذاكر أو جمهوره محتاج تذاكر، اتفضل خد التذاكر ما فيش مشكلة، أنا مش هاخد أكتر من إمكانياتي، يعني العدد اللي عايز يروح من جانب نادي زد هياخد تذاكر وفي الآخر الزمالك عايز الباقي لأنها كوتة كبيرة، فإدارة زد هتوفر تذاكر للزمالك أو جمهور نادي الزمالك لأن زي ما قلت لحضراتكم العلاقات طيبة، لا يوجد احتقان، كله بيحاول كله بينافس في الملعب وهي دي حلاوة الكورة”.
وزاد: “أي حاجة تانية وأي قصص تانية واطلب عليّ تذكرة أو إن التذاكر خدها والناس ما تخشش أو الناس نفسها تروح فما ينفعش، يا عم ودي الناس ودي خلي الناس تروح حتى لو ما بتشجعكش، الفرق اللي عندها رؤية وعندها فكرة تقولك أنا أحب ألعب بجمهور للنادي المنافس موجود، 15 بقى و17 بقى و20، هيفرق معاكي؟ مش هيفرق في النهاية حاجة، على الأقل على الأقل تقدم كورة كويسة والجمهور يحترم دايماً تصرفاتك”.
واستطرد زاهر:” ودي نقطة الحقيقة مهمة جداً بنوجهها لكل الناس، مش مطلوب إن أنا أضايقك، مش مطلوب إن أنا أستفز جمهور ولا أزعل جمهور، مطلوب إن أنا ألعب كورة حلوة وأدي كورة كويسة، وهو ده الحقيقة اللي موجود دلوقتي في الدوري المصري. [04:05]
الدوري المصري مش عارفين بقى دلوقتي هو رايح فين ولا جاي منين، ولا مين هيصعد ولا مين هيهبط، انسوا إن حد يقولكم أصل خلاص الفرقة دي بعيدة والفرقة دي قريبة، المقدمة مشتعلة، السبعة اللي فوق ضرب نار، المنافسة على المقدمة ضرب نار، أي حاجة واردة تحت في الهبوط، أي تلاتة بونت بيودوك في حتة تانية، هي دي حلاوة الدوري المصري ومتعة الدوري “.
دوري نايل الحقيقة السنة دي في حتة تانية خالص، منتج بنعشق نكبره لأنه كبير، هو الأكثر جماهيرية، مش إحنا اللي بنقول هو الأكثر جماهيرية، المنتج والدوري المصري هو الدوري الأكثر جماهيرية حط تحتها 10 خطوط”.
ويلتقي الزمالك أمام زد يوم الثلاثاء، 24 فبراير الجاري، في تمام الساعة 9:30 مساء بتوقيت القاهرة، في الجولة الـ 19 من بطولة الدوري المصري.
ويتواجد الزمالك في المركز الثاني بجدول ترتيب المسابقة برصيد 34 نقطة بينما يأتي زد في المركز السابع برصيد 25 نقطة.
