فتح الإعلامي أحمد شوبير النار على ملف التعاقدات داخل النادي الأهلي، معبرًا عن علامات استفهام كبيرة حول طريقة إدارة الصفقات، والفوارق الفنية والمالية بين اللاعبين الراحلين والجدد، وذلك خلال حديثه الإذاعي صباح اليوم الأربعاء.
وقال شوبير: “الأهلي أنا قلت قبل كده إنّي هتكلم، ولازم أتكلم، لأن من أول ما نحذر، ولما حذّرت اتعملت عليّ حلقات، فطبيعي أرجع أتكلم تاني. إنت النهارده لما تمشي لاعب، لازم تجيب الأحسن منه، وخصوصًا إنك دافع فلوس”.
وتابع: “يعني خلّينا نقول أحمد شوبير مثال، لما تمشي شوبير لازم تجيب واحد أحسن منه. خصوصًا إنك دافع فلوس، ما ينفعش تمشي لاعب وتجيب واحد أقل”.
وأضاف: “تعالى بقى لجراديشار، عقده 800 ألف دولار، إنت دفعت له 400، و200 من مرتبه بقى 600، والنادي المجري دفع 200، يعني هو كلّفك 200 ألف دولار بس؟ طيب جميل”.
وأكمل: “في نفس الوقت جبت كاموتش، وأنا مقدرش أحكم عليه خالص دلوقتي، خالص. لازم أديه ماتشين تلاتة، لأن كل اللي جايين دول على بعضهم ما لعبوش 25 ماتش”.
واستطرد: “يعني إنت جبت لاعب ممكن يكون واخد 500 ألف، وفوقهم كمان 200 أو 250، يبقى 700 أو 750، أنا مش عارف الأرقام بالظبط، بس لازم نشوف الفارق بقى بين كاموتش وجراديشار”.
وأوضح: “دلوقتي الكلام عن كاموتش لسه بدري عليه، ده سمك في ميه، ما نقدرش نحكم”.
وتابع شوبير: “تيجي تتكلم عن أحمد عيد، لاعب هايل وجميل، بس إنت مشيت مين علشان تجيب أحمد عيد؟ مشيت عمر كمال عبد الواحد. طيب أحمد عيد لاعب منتخب، بس عمر كمال كان لاعب منتخب برضه”.
وأضاف: “هل في فرق كبير قوي بين أحمد عيد وعمر كمال؟ هل في حاجة تستاهل كل القصة دي؟ أنا بصراحة مش شايف، ومش عارف، وحد يقول لي”.
واستطرد: “أنا لما اتكلمت عن عمرو الجزار وهادي رياض، بقول كلهم لاعيبة هايلين، لاعيبة عظماء، بس السؤال دايمًا: الفارق بين اللي كان عندك واللي جبته، في فرق كبير ولا لأ؟”.
وأكد: “أسامة أبو علي تعظيم سلام، لاعب جميل، ودفعوا فيه فلوس، وجدّدوا عقده، تمام. علي معلول كمان، وأنا برجع أقول إن علي معلول كان يستاهل يكمل موسم كمان، وكان هيبقى مفيد”.
وتابع: “يوسف بالعمري طلع وقال استنوا عليه شوية، وما تستعجلوش، لأن الولد من 4 نوفمبر ما لعبش، ودي وجهة نظر فنية صحيحة”.
وأضاف شوبير: “طيب نبيل كوكا أحسن واحد عندك دلوقتي، طب محمد شكري؟ محمد شكري كان لاعب منتخب، وبيكهام هايل، وعمرو هايل، وهادي هايل”.
وأوضح: “إنت في قلب الدفاع جبت مصطفى العش، ومشيته نص الموسم، وبعدها جبت هادي رياض، وبعدها عمرو الجزار، وبعدها أحمد رمضان بيكهام، كله في نفس المكان”.
وأكمل: “ناحية الشمال جبت محمد شكري، وبعدها وظفت كوكا باك ليفت، وبعدها جبت يوسف بالعمري، وناحية اليمين رحت جايب أحمد عيد”.
وقال شوبير: “طيب لو الدنيا ماشية طبيعي، ومحمد هاني سليم وجاهز، وأحمد عيد جاهز، هتلعب مين؟ محمد هاني ولا أحمد عيد؟”.
وشدد: “أنا لما بجيب لاعب، بجيب اللاعب اللي أنا محتاجه بجد، اللي هيفرق معايا فرق كبير قوي، من السما للأرض”.
واختتم: “لو في اختلاف في وجهات النظر، مفيش مشكلة خالص، كله على عيني وعلى راسي، وطول ما الكلام في إطار محترم مفيش أي أزمة”.
وعن ملف أشرف داري، قال شوبير: “إنت فسخت عقد أشرف داري، وهو قاعد بيتمرن في النادي عادي، كأنه هيلعب الماتش الجاي، بس اتشال من القائمة واتحط مكانه يوسف بالعمري”.
وأضاف: “والده اللي هو وكيل أعماله قال الأهلي على دماغنا من فوق، بس هناخد فلوسنا. اللاعب كان عايز يمشي ويلعب بره وياخد مستحقاته”.
واختتم شوبير تصريحاته قائلًا: “الأهلي قال له لا، خليك اتمرن، ومفيش مشكلة، واللاعب قاعد في سكن موفره له النادي، والحاجات دي كلها لازم تتحسب كويس جدًا”.
