كشف الإعلامي سيف زاهر ، دور هذا الثنائي في السيطرة على تجاوزات جماهير الأهلي والخروج عن النص خلال مباراة الجيش الملكي المغربي، في بطولة دوري أبطال إفريقيا.
وقال زاهر، في تصريحات تليفزيونية عبر قناة “أون سبورت”:” النهارده مشهد الجمهور في بدايته كان مبهر جدًا، العدد الكبير لجمهور النادي الأهلي باين إنه ابتدى يسخن ويولّع المدرجات”.
وأكمل:” جمهور الأهلي دايمًا حاضر بقوة، جمهور كبير وعظيم ومؤثر، ودايمًا بيصنع الفارق مع فرقته، الأهلي مع جمهوره حاجة تانية خالص، والصورة دايمًا بتطلع حلوة، والنهارده شفنا صورة عظيمة فعلًا”.
و واصل زاهر:” أحيانًا بنبقى جايين من ماتش فيه احتقان، وكنت محذر من مباراة الجيش الملكي وقلت ممكن تعمل توتر للجمهور، اللي قدامكم ده هو مشهد جمهور الأهلي الطبيعي، ده الأساس وحلاوة المدرجات، والاستثناء بس لما يحصل خروج عن النص”.
و أردف:” النهارده كان فيه لقطات إحنا مش عايزينها، حتى لو جايين من مباراة صعبة أو في حزن من اللي فات، ليه أكلّف فرقتي عقوبات؟ وليه أروح لاحتقان وإحنا رايحين نلعب على بطولة؟”.
و أكمل زاهر: “كان ليه دور كبير جدًا في تهدئة الجمهور الكابتن وليد صلاح الدين ومعاه عدد من اللاعبين، ودور مهم جدًا كمان للكابتن محمد الشناوي اللي نزل كلم الجمهور وطلب هدوء”.
وأشار:” الشناوي قال لهم: إحنا بنفكر في المكسب والبطولة، ومش عايزين عقوبات ومحتاجينكم معانا في المدرجات، لفّ الملعب كله يكلم الجمهور واحد واحد علشان يهدّي الأمور”.
وأختتم:” والجمهور استجاب في وقت من الأوقات لأن الهدف كان الخروج بالماتش لبر الأمان وتحقيق النتيجة”.
