انتقد سيف زاهر صفقة اللاعب الكيني “بارون أوشيونج”، كاشفاً عن قرار الكابتن معتمد جمال المدير الفني للزمالك بتجميده تماماً.
وقال زاهر، خلال تصريحات تليفزيونية عبر قناة” أون سبورت”: ” معايا خبر هو الحقيقة غريب جداً الأيام الأخيرة دي، صدر قرار من جهاز الكورة بنادي الزمالك تحت قيادة كابتن معتمد جمال بتجميد الكيني بارون أوشيونج.”
وأكمل:” “أنا الحقيقة الاسم ده كنت نسيته، يعني نسيت إن هو موجود، طلع أوشيونج بيلعب في نادي الزمالك متأيد في الناشئين وبيلعب تحت. أوشيونج كان في كلام إن هو من اللعيبة الكويسة اللي بيتجهز.”
و أردف زاهر: “معتمد جمال بعد ما بص عليه قال إن هو مالوش أي دور معايا خالص، يعني ده مش المكنة ما طلعتش قماش، الفيشة أصلاً ما لحقتش لسه تتحط في الكبس عشان يوصل كهربا للجهاز يشتغل.”
وشدد: “فأنا ما أعرفش الحقيقة ده هيبقى وضعه إيه لو تم الاستغناء عنه، هل هيبقى عايز كمان أرقام مادية أو حاجة؟ أنا مش عارف الفترة اللي فاتت دي، وهنا أنا مش بكلم الزمالك، هنا أنا مش بكلم الزمالك.”
وواصل زاهر: “أنا بكلم كل الأندية المصرية، نرجو النظر بشكل أفضل من كده في الصفقات، والله حرام الفلوس دي، يعني في لعيبة بشوفها في أندية، عشان ما أحرجش إدارات ولا أتكلم على لعيبة، أنا ما أعرفش جوم إزاي؟ ساعات بحس إن ممكن يكون في فيديوهات اتبعتت ولعيبة تانية اللي جت.”
وتابع: “”يعني أنا ساعات بشعر كده، أنا ساعات بقول لا يمكن اللعيب اللي قدامي ده اللي بيلعب في النادي الكبير جداً جداً ده اللي بياخد الرقم الكبير ده جاي وفي ناشئ قاعد، طب ما طلع ناشئ، لعيب أهو أنا عارفه شفته إن هو صغير وعارف هيعمل إيه، أصبر عليه أقول ناشئ جاي، لكن هصبر على واحد بديك كل الأرقام دي ليه يعني؟ عشان إيه؟”.
و أستطرد زاهر:” بقت ظاهرة، كنا زمان نقول أنا النهاردة اللاعب الأفريقي ده يا أجيبه يدغدغ الدنيا يمشي على المية زي ما بيقولوا، يا خلاص أدي فرصة للي جنبي بقى، أدي فرصة لابني، أدي فرصة للمصري، فمشهد بصراحة بقى بالنسبة لي غريب جداً، فأرجو يا جماعة إدارات الأندية، حضرتك النهاردة مش جايب لعيب يدغدغ الدنيا ما تجيبوش يا عم، هو يعني هو لازم يبقى أنا عندي أفريقي؟”
و أضاف: “خلاص ما تجيبوش، مش موفق أنا في الحاجات دي ما جيبش غير الجامد بس، لكن دولارات وأرقام وقصص والمحصلة في الآخر ما فيش حاجة خالص.”
وأختتم: “طب أنا استفدت إيه؟ ولا أي حاجة خالص، ولا أي حاجة. الزمالك بيتجه للتجديد مع عمر عبد العزيز حارس مرماه الناشئ، والحقيقة ماشي بشكل كويس برضه عمر أتمنى له كل التوفيق.”
شاهد:
