كشف الإعلامي سيف زاهر، عن مصير إمام عاشور، لاعب الأهلي، مع الفرقكيق بعد ازمته الأخيرة وإيقافه وتغريمه مليون ونصف.
وقال زاهر، خلال تصريحات تليفزيونية عبر برنامج “ملعب أون” على قناة “أون سبورت”:” إمام عاشور على فين؟ إمام عاشور قصته من الصعب.. من الصعب استمراره في الأهلي، حد يقولي أوبا أوبا! واحد يقولك إيه إيه ما أنا برضه بسمع”.
وأردف:” حتى وأنت قاعد بتتفرج عليا يقولك سيف زاهر بقى قليل الكلام طالما اتكلم في الحتة دي يبقى عنده معلومة يبقى راكب المصلحة”.
وواصل زاهر:” بصوا يا جماعة إمام عاشور لعيب جيد جداً وأفضل لعيب دلوقتي في مصر، إدارة الأهلي بعد صفقة زيزو وتريزيجيه اتقفلت القصة لأن دي صفقات كان ليها ظروفها وقعدنا شرحناها 150 مرة”.
وأشار:” إمام النهارده بيقولك أنا زي ما أنا أفضل لعيب في مصر لازم أبقى أغلى لعيب في مصر، الفجوة كبيرة جداً والأهلي مش هيعمل كده.. مش هيدفع الأرقام دي”.
وشدد زاهر:” قعد قعدة الأهلي قاله اكتب حضرتك اللي أنت عايزه وهحاسبك عليه، حضرتك عايز تحترف؟ موافقين، هات عرض، طب حلو بكام بقى؟ 10 مليون دولار فيما فوق يعني 500 مليون جنيه مصري”.
وأكمل: “عايز نتكلم ونفتح الحديث ونحط شوية امتيازات؟ عندك الحاجات دي ابعتها، معندكش الحاجات دي ما تضيعش وقتك لا معانا ولا معاك هتيجي تقولي عايز ازود معرفشي كام مليون.. هقولك مش سامعك’.
واستأنف زاهر:” فقدامك حلين: يا ترضى وتظبط، يا تعمل حسابك ونعدلك في السنتين ونص الجايين وتمضي سنتين كمان، يا تكتب اللي أنت عايزه يجيلك بيعة بعد كاس العالم، لكن هنقعد نحرق بنزين على الفاضي مش هنوصل لحاجة”.
وأكمل:” الأهلي أدى الضوء الأخضر لإمام: معاك عرض نناقشه، وأديك عرفت الأرقام لأن أي رقم غير كده يبقى تهريج”.
وأختتم:” نصيحتي ليك يا إمام ركز في ملعبك وسيب القصة لوكيل اللعيب، أنت في النادي الأهلي سيبك حتى من رقمك هتقدر تعمل إعلانات وتعوض نفسك، أوعى تغلط غلطات غيرك وأوعى تقول أمشي وخلاص وأوعى تخسر الجمهور”.
