طالب الإعلامي أحمد شوبير، محمود الخطيب، رئيس الأهلي بضرورة حماية كل العاملين في النادي مما يتعرضون له من المركز الإعلامي بالأحمر.
وأضاف شوبير، خلال تصريحات تليفزيونية عبر برنامج” الناظر” على قناة “النهار”:” هرجع تاني لموضوع كابتن وليد صلاح الدين لأنه البعض قال شوبير عنده مصالح شخصيه ومن ساعة ما ساب قناة الاهلي معرفشي ايه وبيعمل ايه واحنا مش بنحبه. انت حضرتك متعرفش أنا سبت قناة الاهلي إزاي اصلا”.
وأشار : “أنا لما بتكلم على مدير كرة في الأهلي محتاج مسانده ايه علاقته بمصلحه شخصيه وقولت لازم يتوفر له حمايه، كابتن الخطيب عليك أنت توفر الحمايه لرجالتك سواء مديرين او لاعبين أو مدربين .. لان الطعن بيكون من داخل النادي نفسه”.
وواصل شوبير:” لما بتكلم عن إمام عاشور بقوله الأهلي أولا ولما أكلم اي موظف بقوله الاهلي كلامي واضح، لما قولت أن وليد صلاح الدين هو اللي خد القرار ضد إمام عاشور واتصل بكابتن الخطيب وسيد عبدالحفيظ بتكلم على حاجه متأكد منها ووليد قال نفس الكلام النهارده”.
وأستأنف :” وقال اخدت القرار لا رجعه فيه .. ايه المصالح الشخصيه في هذا الأمر، هل هلعب تاني ولا هبقى رئيس نادي؟ ايه المصلحه الشخصيه غير إنك تحافظ وتحمي الناس اللي بتدير الكره”.
وأردف شوبير:” وتحمي اللاعبين اللي كانوا هيتقدموا بشكوى لرئيس الاهلي بسبب اللي بيحصل فيهم،، ولعيبه كبيره هل كابتن الخطيب عارف هذا الامر؟ اكيد عارفه”.
وقال:” حماية وليد صلاح الدين واجبه مدير الكرة له هو كل الصلاحيات في النهايه أنا مدير ولكن في رئيس منفضلش نرمي زي ما رمينا محمد رمضان وخالد بيبو”.
وشدد شوبير: “في لعيبه عيطت بسبب اللي بيحصل فيهم وأنا لما بمسك قضيه مش بسيبها، أنا لاباخد خبر من هنا ولا هنا حضرتك متطلعش ترمي الاتهامات ولا تكون اداه في ايد حد هفضل اتكلم مهما كانت الفاتورة اللي هدفعها”.
وأنهى: ” عمري ما هكون أداه في ايد حد ولا عمري كنت وبطلع اقول اللي جوايا مهما هدفع تمنه، بقول للكابتن الخطيب احمي لاعبيك واحمي ناديك ، لا أحد فوق النادي الأهلي مهما كان اسمه او وظيفته أو مين بيقف جنبه ومين سانده وبيقوله برافو واعمل وسوي، الموضوع ده غير مقبول على الإطلاق “.
