حسم الإعلامي أحمد شوبير الجدل المثار حول مستقبل مسابقة الدوري الممتاز، بعد انتشار أنباء عن إلغائه أو تغيير نظامه بسبب ضغط المباريات، كاشفًا تفاصيل مكالمة مباشرة جمعته بمصدر مسؤول داخل اتحاد الكرة، نقل خلالها الحقيقة كاملة دون مواربة.
وقال شوبير في تصريحات عبر برنامجه الإذاعي صباح اليوم الثلاثاء: «امبارح مصدر مسؤول في اتحاد الكرة كلّمني أنا شخصيًا، يعني شخصيًا في مكالمة شخصية ليّا، وقال لي: أرجوك إنك تنفي كل اللي بيتردد عن إن في توجه أو دراسة لإلغاء الدوري، علشان ضغط المباريات والتوقيتات، وتوفير وقت للمنتخب الوطني. وقال لي إن الأخبار دي مالهاش أي أساس من الصحة، لا من جانب اتحاد الكرة ولا من جانب الرابطة».
وتابع شوبير: «وأنا قلت له على فكرة أنا عايز أصدقك. قال لي: يعني إيه عايز تصدقني؟ قلت له: عايز أصدقك أو نفسي أصدقك. قال لي: لا صدقني. قلت له: ما أنا السنة اللي فاتت كنت مصدقكم. قال لي: لا، إحنا ما صرحناش بحاجة السنة اللي فاتت. قلت له: طيب، أنا هحطك قدام مهام عملك وواجباتك، وهطلع الصبح النهارده أقول إن حضرتك قلت لي إن مستحيل يتغير شكل ونظام الدوري العام. قال لي: آه طبعًا».
وأضاف: «قلت له: لو حصل غير كده، أنا بالأسامي هقول. قال لي: طبعًا. قلت له: طيب خلاص. فده أنا وعدته، وبوفي بوعدي ليه، اللي هو نص وعدي، إن حضرتك أنا قلت اللي إنت قلته لي اهو. وبالتالي بأعلن قدام مصر كلها إن مصدر هام وكبير ومسؤول داخل اتحاد الكرة قال لي: لا يمكن، ومفيش نية خالص، إننا نغير شكل الدوري السنة الجاية، وإن الهبوط أربعة، ومفيش دوري مجموعتين، وإن الدوري السنة الجاية هيبقى 20 فريق، وبعدها هيبقى 18».
