شوبير يكشف رد رابطة الأندية على إعتراض الزمالك والمصري بشأن قرار تغيير مواعيد المباريات

كشف الإعلامي أحمد شوبير عن تفاصيل هامة تتعلق بالأزمة المثارة حاليًا حول مواعيد مباريات الدوري المصري وتنسيق فترات الراحة للأندية المشاركة إفريقيًا، مؤكدًا أن “رابطة الأندية” تتمسك بتطبيق اللائحة والأسس القانونية دون استثناءات

وقال شوبير، خلال تصريحات تليفزيونية عبر برنامج “الناظر”، على قناة” النهار”:” رابطة الأندية ملهاش أي علاقة بموضوع السفر بطائرة خاصة أو طيران عادي، في ضوابط من الرابطة وبتتطبق على الكل”

وأضاف:” أول نادي اتطبق عليه الكلام ده كان الأهلي وكانت الجماهير معترضه ازاي العب في تنزانيا السبت وارجع العب البنك الأهلي الثلاثاء لكن الأهلي احترم اللائحة ولعب”.

وتابع شوبير:” روحنا لمصدر مهم جدًا داخل الرابطة، وقال إن عندهم أسس قانونية واضحة ماشيين عليها، احتساب فترات الراحة بيكون من مباراة لمباراة، مش على أساس الفريق وصل القاهرة إمتى .. الرابطة ملهاش علاقه بالكلام ده، توقيت الوصول مالوش أي علاقة بالحسابات في اللائحة”.

وأشار:” وطبقا للائحة فعلًا، فترة الراحة ليها طريقة احتساب واضحة، المصري رفض الموعد وطلع بيان بيناشد اتحاد الكرة بالتدخل، اتحاد الكرة مالوش أي دخل في الموضوع، لأن اللي بيدير المسابقة دلوقتي هو رابطة الأندية”.

وواصل شوبير:” الزمالك اشتكى، وقال إنه متفهم موقف الرابطة، لكن اللي حصل ممكن يعدّي مرة مش ثلاث مرات، وكده مفيش تكافؤ فرص بين مبارياته الجايه”.

وشدد:” إحنا طول عمرنا بنطالب باحترام جدول الدوري وبنهاجم المسئولين لما المواعيد ما تتحترمش، لما حصلت مشكلة بيراميدز في البطولة العربية، الرابطة رفضت التعديل وقالت عندنا ارتباطات كبيرة”.

وأختتم عندنا كأس عالم، والموسم لازم يخلص يوم 24 مايو، في سفر لأمريكا، والعالم كله بينهي مواسمه قبل نهاية مايو حط نفسك مكان رابطة الأندية، الوضع صعب جدًا طول عمرنا في مصر بنعاني من الزنقة في الجدول عندك 21 فريق وعايز تخلّص موسم كامل بدري”.