علق الإعلامي أحمد شوبير، على تصريحات صالح جمعة لاعب الأهلي السابق، بشأن سهره مع إمام عاشور، نجم الاحمر، رغم إيقافه وتغريمه ماليا.
وقال شوبير، خلال تصريحات تليفزيونية ببرنامج “الناظر”، عبر قناة” النهار”:”إمبارح كنا أمام بوادر أزمة وهي التصريحات اللي خرجت بتتهم إمام بالسهر، أنا هنا بصدق اللعيب، أنا ما بحبش ‘قولاً عن’، أنا بحب ‘قولاً من’، فلما طلع إمام وقال هذه التصريحات لا أساس لها من الصحة فأنا مصدقه لأني عايز أصدقه، فعايز بقى هنا أقول لإمام قدام مصر كلها”.
وتابع:” بص يا إمام.. لو إنت بتلعب في نادي درجة رابعة مش في النادي الأهلي (الأعظم في مصر وفي أفريقيا وفي العالم العربي وواحد من أعظم أندية العالم)، لو بتلعب في أي نادي لازم تخلي بالك من نفسك ومن مستقبلك”.
و أضاف شوبير،: “لو إنت شايف إنك مبسوط في النادي الأهلي والدنيا تمام عندك، عندك سنتين في عقدك كملهم وقرر مصيرك بعد كدة، ولو إنت شايف إنه كأس العالم ميستاهلش إنك تبقى منضبط وملتزم بشكل واضح عشان مستقبلك.. إنت رايح على كأس عالم، بعد حوالي أربع شهور”.
و شدد:” لو شايف انها مش مهمة بالنسبة ليك تعلن من دلوقتي لو شايف إن الحاجات دي مع وجودك في النادي الأهلي اللي زوّد من نجوميتك بصورة إنت شايفها، يبقى لازم تضحي.. مش تضحي، لازم تلتزم، لأنه ده لمصلحتك إنت، المرحلة دي بتصب في مصلحتك إنت؛ لو عندك عرض أوروبي وعرض جيد، على فكرة النادي الأهلي مش هيقف قدام مستقبلك، أنا بقولك كلام على مسؤوليتي الشخصية”.
وواصل شوبير:” والأهلي بدونك أهو لعب وأهو تأهل وعدى أهم ماتشين دون خسارة (التعادل في تنزانيا 1-1 والتعادل في شبيبة القبائل وضمان الصعود)، فالأهلي معندوش مشكلة خالص، المشكلة عندك إنت يا إمام”.
و أشار:’ اسمع كلام اعتبرني هنا بقى والدك، إنت زيك زي مصطفى وزيك زي أودي، لازم تقعد في بيئة صالحة عشان الناس تفضل تقول إمام أحسن لعيب في مصر”.
وأختتم: “اقعد راجع حساباتك من البدايات خالص، شوف إنت إيه الأخطاء اللي عندك واقعد مع البيئة الصالحة الطيبة اللي تساعدك، إنت اللي هتخسر.. اختار أصحابك، دايماً يقولك اختار الصديق قبل الطريق، فالقصة عندك إنت، في ملعبك إنت”.
