كشف صالح جمعة، لاعب الأهلي السابق، سر شعور إمام عاشور، نجم الأحمر بالظلم في الفريق، بعد ازمته الأخيرة.
وقال جمعة،خلال تصريحات تليفزيونية عبر برنامج “قهوة فايق”، على قناة” ام بي سي مصر 2″: كنت موجود مع إمام عاشور إمبارح واتكلمنا في موضوع أزمته الأخيرة، وكان معانا كهربا.. كنا بنتعشى”.
ورد أسامة نبيه :” قول قول اه كنت انت وإمام عاشور وكهربا.. أحمد فتوح مكنش معاكم؟”، ويجيب صالح جمعة:” لا مكنش معانا”
و تابع جمعة:” إحنا مستخسرين إن إمام يخش في مرحلة تبقى صعبة الفترة اللي جاية خصوصاً إن المنتخب عنده كأس عالم، وهو من اللعيبة المهمة، وقرارات ممكن بياخدها إحنا خدناها قبل كدة بشكل عكسي أثرت علينا”.
وأكد :” إمام عنده بعض الطموحات الشخصية.. هو شايف إنه مظلوم، شايف إنه أفضل لعيب في مصر وإنه بعيد كل البعد عن الناس اللي حواليه مادياً، وحتى بره الجانب المادي هو شايف إن المعاملة معاه المفروض تبقى أحسن من كدة شوية”.
و أكمل جمعة: “هو شايف إنه بعيد عن زمايله (في الفئة المالية) وهو بيقدم مردود كويس جداً، وده حقه المشروع، الموضوع المادي هو الفاصل في المشكلة اللي بتحصل”.
و أختتم:” اللي طلبته منه إن ميبقاش فيه تحدي مع الجمهور بالأخص، لأن جمهور النادي الأهلي عنده الفرقة رقم واحد والنتائج رقم واحد، ومفيش حد فوق الفريق”.
