كشف عبد الحليم علي،نجم الزمالك السابق،أسباب خروج الفريق من بطولة كأس مصر من دور الـ16 بعد الخسارة أمام سيراميكا كليوباترا.
وقال علي، خلال تصريحات تليفزيونية عبر قناة الزمالك : هو مبدئياً إحنا مش بنبرر بس عدم حضور جماهير الزمالك فرق كتير جداً مع لاعبي نادي الزمالك، وده وضح إن جماهير نادي الزمالك مؤثرة دائماً مع تيم نادي الزمالك مؤكد وده حقنا يعني”.
وتابع: “ضغط الماتشات أعتقد إن كان في ضغط شديد على لاعيبة الزمالك من سفر، كل ثلاث أيام مباراة، ضغط أي حد هيتأثر بيه. بتلاعب النهارده سيراميكا، سيراميكا فريق محترم متصدر دوري وعنده دكة وعنده سكواد قوي وعنده مدير فني قوي، ده برضه خلي بالك ده المنافس بتاعك النهارده”.
وشدد علي:” الشوط الثاني أكتر حاجة تتعب المدير الفني لما يلاقي كم من اللاعيبة مش في حالتهم، أعتقد يبقى مش عارف يغير مين ولا يعمل إيه، فدي أصعب حاجة بيقابلها المدير الفني. والنهارده أعتقد إن في مجموعة لاعيبة ما كانتش في حالتها، أشرنا ده في الشوط الأول وده ما ينفعش مع فريق كبير زي سيراميكا. يعني ممكن لو في لاعيب مش فايق، اتنين لاعيبة، إنما مجموعة لاعيبة ما كانتش لا على المستوى الفني ولا على المستوى البدني”.
وواصل: “فبالتالي من ضمن الأسباب برضه إن سيراميكا برضه بقاله فترة مريح، فواقف على رجله بشكل جيد للامانة، هم كانوا مستحوذين، هم كانوا بيديروا المباراة زي ما هم عايزين عشان نتكلم بمنتهى الأمانة، وعندهم عناصر جيدة وبيستحوذوا على الكورة وبيغيروا ملعب وجايين من العمق. الهدف اللي جه ده اتكرر مرة واتنين وتلاتة وهم بيلعبوها بينقلوا بشكل جيد جداً”.
و أردف علي:” أنا عايز أشير لحاجة وكنا متفقين عليها إن قلنا بين الشوطين محمد إسماعيل يخش في نص الملعب أعتقد إنه فرق جامد مع التيم، أنا معرفش للامانة هو خروجه هل هو في إجهاد؟ هل هو حاسس بحاجة؟ مش عارف والله، دي بقى الرؤية بتاعة الجهاز الفني”.
وزاد: “مفيش مجال للشك، محمد إسماعيل في المنطقة دي، الجون جه من هنا، والكور كلها خطورة جت من هنا، ده مع محمد شحاتة كانوا بيملكوا المنطقة دي. أعتقد طبعاً أثر بنسبة كبيرة، محمد السيد مش هيجيب دي بشكل جيد، عبد الله السعيد مش هيجيدها بشكل جيد”.
وأختتم:” النهارده المساحات كنت بتلعب في مساحات كبيرة فاعتقد إن في أسباب كتيرة النهارده لهزيمة نادي الزمالك، إنما نقول الحمد لله على كل حال، في ظروف خارجة عن إرادتك وفي ظروف أنت خلقتها النهارده لنفسك، إنما الحمد لله على كل شيء”.
شاهد:
