كشف محمد عواد، حارس مرمى الزمالك، كواليس صادمة بشأن ما يحدث له داخل جدران الفارس الأبيض لإجباره على الرحيل.
وقال الإعلامي إبراهيم عبدالجواد عبر برنامج “ملعب اون”، على قناة” أون سبورت”:” نروح لمحمد عواد النهارده، الحقيقة جمعتني مكالمة مطولة بمحمد عواد ودي من المرات النادرة، إن لم تكن المرة الوحيدة، اللي شفت فيها محمد عواد شايط، بمعنى كلمة شايط”
وتابع:” قولتله مالك يا محمد؟ إيه القصة؟ في إيه؟ الموضوع ببساطة هو قال لي الموضوع في بولت بوينتس (Bullet points) كده في نقط .. قال” أنا لا أستحق هذه المعاملة من نادي الزمالك، أكن كل الاحترام والتقدير لكابتن حسين لبيب، هو الشخص الوحيد اللي بتعامل بمنتهى الرقي والاحترام معايا ومقدرني ومقدر اللي أنا عملته جوه نادي الزمالك”
و أضاف علي لسان عواد:” أنا واحد من اللاعيبة اللي جابت دوري وجابت بطولات لنادي الزمالك، أنا واحد من اللاعيبة اللي عمري ما افتعلت مشكلة وعمري ما عملت مشكلة، بالعكس أنا بتعامل زي أي حد”
وواصل:” أنا لا أستحق إن واحد من أعضاء مجلس الإدارة يكون في اجتماع معايا ويرفع صوته عليا أو يتكلم معايا بأسلوب غير لائق. لو النادي مش عايزني خلاص”.
وأكمل حديث عواد:” أنا في بداية الموسم كان في عرض من المصري أُجبرت إن أنا أتحرك وأوافق عليه، أنا ما رضيتش عشان قلت الملعب هو الفيصل وأنا حابب أكون موجود في الزمالك، مع إني كنت هاخد فلوس كويسة جداً في المصري، بس المصري نادي كبير وكل حاجة بس أنا قلت أنا عايز أقعد في الزمالك، عايز أكمل مشواري في الزمالك، عايز أختم مشواري جوه الزمالك وأساهم مع لاعيبتي ومع فرقتي إن أنا أجيب بطولات ثانية”
وأردف:” قلت الملعب هو الفيصل وهو الحكم، ما اشترطتش أي حاجة غير إن أنا الملعب هو اللي يحكم. بالرغم من ده اتعاملت بمعاملة سيئة، محدش بيديني اهتمام، ما حدش بيديني تقدير بشكل لا أستحقه أنا عمري ما عملت مشكلة، أنا واحد من اللاعيبة الكبار جوه الفرقة”.
وزاد عواد:” طلبت إن أنا أخرج في يناير، قلت عشان الفريق يستفيد والنادي يستفيد من الفلوس اللي هتيجي ورايا، أنا خلاص باقي في عقدي سنة وشوية، سنة ونص”.
و أستانف:” طلبت حتى لو معرفناش نعمل ده في يناير، خلاص في الانتقالات الصيفية الجاية لو أنتم مش عايزيني خلاص أنا همشي وما فيش أي مشكلة والنادي يستفيد مني، مع إن أنا ممكن في يناير القادم أستنى وخلاص وأمضي لأي نادي والفلوس تبقى ليّ كلها لوحدي”.
وأكد:” بس أنا مقدر جداً جمهور الزمالك، مقدر جداً نادي الزمالك اللي ليه دَين في رقبتي إنه واحد من أهم أسباب شهرة محمد عواد وقيمة محمد عواد، وأنا لغاية آخر لحظة أنا عايز أبقى في النادي وعايز أساهم بمجهودي إن أنا أجيب بطولات للنادي، لأن أنا بعشق جمهور الزمالك وبعشق نادي الزمالك عشان كده تحملت حاجات كثيرة جداً لا يتحملها بشر”.
واستطرد عواد:” أنا كان حلمي إن أنا أكون موجود في كأس العالم، ولكن بالمنظر اللي أنا شايفه ده، الحلم ده حد بشكل مقصود بقى أو مش مقصود هيخليني ما أحققوش، استحالة كابتن حسام ولا كابتن إبراهيم يفكروا فيّ وأنا ما بلعبش، ولا كابتن سعفان يفكروا فيّ وأنا ما بلعبش، مع إن أنا كنت واحد من الخيارات دايماً اللي هما بيبصوا عليها طول ما كانت رجلي في الملعب”.
وأختتم:” أنا مش عارف أنا عملت إيه عشان يجرى معايا ده كله، مش عارف عملت إيه عشان أبقى بدفع إن أنا أمشي من نادي الزمالك اللي أنا بحبه وبعشقه وبعشق جماهيره، عواد شايف أن أموره انتهت داخل النادي ليس بناءً على رغبته، بل بناءً على رغبة المسؤولين عن إدارة ملف كرة القدم حالياً”.
