نقل الإعلامي محمد عبدالجليل،رسالة هامة من محمد عواد،حارس مرمى الزمالك، بشأن أزمته في النادي وحقيقة رفضه التحقيق معه
وقال عبد الجليل، خلال تصريحات تليفزيونية عبر برنامج “زملكاوي”، على قناة” الزمالك”:” امبارح أنا الحقيقة وجهت رسالة لواحد من كباتن نادي الزمالك دلوقتي -آه كباتن الزمالك لأنه داخل في الموسم السابع معانا- وهو محمد عواد، حارسنا المميز اللي له رصيد عندي بشكل شخصي وأعتقد عند أغلب إن لم يكن كل جماهير نادي الزمالك”.
وتابع:” واللي واخد أو خد موقف البعض إن لم يكن الكل عتب عليه فيه، وبالتأكيد هو لديه خطأ فيه من وجهة نظري. ولو مالوش عندنا رصيد مش هنوجه له الرسالة دي”.
وواصل عبد الجليل:” النهارده كان فيه تواصل مع كابتن عواد، الراجل بكل احترام تلقى الرسالة اللي إحنا عبر ‘زملكاوي’ امبارح بعتناها ليه، حرصاً على إن إحنا ما ينفعش نخسر حارس كبير بحجم عواد أولاً، ولا هو ينفع يخسر رصيده عند الجمهور ولا رصيده الفني قبل ثلاث شهور من كاس العالم ثانياً”.
و أكمل:” عواد من خلالي -وطلب مني إن أنا أوجه للجمهور رسالة- إن هو تحت أمر نادي الزمالك، هيخضع للتحقيق خلال ساعات ما عندوش أدنى مشكلة إن هو يكون موجود في جلسة التحقيق، مش رافض أبداً التحقيق وبالفعل إن شاء الله هيخضع للتحقيق ومستعد لأي إجراء من جانب نادي الزمالك”.
وشدد عبد الجليل:” عواد أعلن من خلالي وطلب مني إن أنا أوصل للجمهور إن الراجل ما عندوش أدنى مشكلة، وقصة التحقيق مش معناها إن هو مدان أو مش مدان، التحقيق في النهاية غرضه إن فيه إجراء بصدد إن إحنا نعرف المشكلة دي حصلت ليه علشان ما تتكررش تاني”.
و أردف:” المخطئ يتعاقب، اللي ما غلطش ما يتعاقبش، في النهاية فيه تحقيق إذاً الكل لازم ينصاع تحت مظلة واحدة هي إن فيه قرار، القرار دوت هيتاخد بناءً على تحقيق”.
وزاد عبد الجليل:” عواد لا عنده مشكلة في التحقيق ولا عنده مشكلة في القرار، وبيقول للجمهور إن أنا تحت أمركم وأنا مش عايز أبداً أخسر جمهور الزمالك، وإحنا كمان مش عاوزين نخسره أبدا، دي رسالة عواد وأنا بوصلها لحضراتكم من خلاله بناءً على المكالمة اللي تمت النهارده”.
واستطرد:” مرة تانية يا عواد، أنت حارس كبير لك رصيد عظيم جداً جداً، وفي كل الأحوال التاريخ والرصيد دوت ما ينفعش يتمحي أبداً بجرة قلم، بقرار انفعالي ولا بنرفزة ملعب ممكن تقودنا إلى قرارات خارج نطاق المنطق أبداً يعني، بالذات في التوقيت ده، وده الحقيقة اللي أنا كنت حريص إن أنا أوصله له”.
وأختتم:” ‘لِم الدنيا’ في الوقت ده، إحنا محتاجين كل كباتن الفرقة، محتاجين كل اللعيبة المهمة، المهمة بس مش على الصعيد الفني”.
