استعرض الإعلامي مجدي عبدالغني، تصريحات زميله أحمد شوبير، بشأن كواليس أزمة إمام عاشور لاعب الأهلي، وتمرده ورفضه خوض لقاء يانج أفريكانز بدوري أبطال إفريقيا.
وقال عبد الغني، عبر برنامج “ملعب البلدوزر “على قناة “الشمس”
:” هاتولنا بقى كلام كابتن شوبير امبارح بعد بيان اعتذار إمام عاشور قال إيه.. في أمور متقدرش خالص (تتجاهلها) لان اتقال البيان اللي نشره إمام عاشور اتبعت ليه من المركز الاعلامي للنادي الأهلي”.
وواصل: “هو طلع مكنش عنده (رد) في توقيت وهما بيدوروا على إمام عاشور، وأنا معرفش إنت يعني ليه ما بتأمنش على لعيبتك بدري من بدري؟”.
وأكمل عبد الغني:” وهل هما مش عارفين عنوان بيت إمام عاشور؟ يعني كان المفروض عمالين يتصلوا يتصلوا، قبل ما يعني (يتصاعد الأمر) كان يبعتوا حد البيت يشوفوا إمام عاشور ولا يشوفوا له (صرفة)”.
وشدد:” وبعدين الدكتور اللي إمام كلمه، وقال له: ‘يا دكتور أنا عيان ومش هقدر أسافر’، ما قالش ليه الكلام ده من بدري؟”.
و أردف عبد الغني:” كمان أعرضوا لينا لقطة ركلة الجزاء سبب الخلاف لان كابتن شوبير قال إن هي كان في ورقه مكتوب فيها ثلاث اسامي وإمام عاشور راح خد الكرة يشوطها ومن برا المدرب قال زيزو”.
وأشار:” هات اللقطة هتلاقي إمام عاشور راح مسك الكورة زي أنا في أي ماتش، أنا اتقال إن أنا أشوط نمرة واحد .. رقم واحد إمام عاشور، بدليل إنه راح ياخد الكورة أهو، وقام زيزو -مين ده اللي موطي دماغه ده؟- راح باس دماغ زيزو.. في كده؟ ده النادي الأهلي اللي العالم كله بيتعلم منه، يخلي اتنين لعيبة يتفقوا هم مع بعض وبعدين يجيلهم القرار من بره؟”.
وزاد:” أومال في المحاضرة أنت عملت إيه؟ المفروض في المحاضرة قلت مين اللي هيشوط”.
وتابع عبد الغني:” زيزو حب إنه يشوط وإمام عاشور رفع له أهو، وبعدين بيطيب خاطر زيزو ودخل إمام على ضربة الجزاء، ده طبعاً لا يمكن يحصل في النادي الأهلي.. استحالة ابدا “.
وأكد:” أنا بشرح الأمور بناءً على كلام الكابتن شوبير لأن الكابتن شوبير له عيون جوه، بيعرف إمتى بيتخانقوا وإمتى بيتصالحوا لأن طبعاً (مصطفى شوبير) موجود وسط اللعيبة فمش ممكن يروح البيت ما يقولش لأبوه ده اتخانقوا مع بعض ده ضربوا بعض.’..
و استطرد عبد الغني:” بيبقى عنده الأخبار، فما يبقى عنده ده وبعد كده يقول لك ‘لا ده غير الراجل’، ده مش كلام مدرب محترف.، والراجل (المدرب) جه في الدقيقة 69 وقام مغير إمام عاشور كمان، ولعيب الكورة مبيحبش يتغير حتى لو المدرب عايز يريحه”.
و أضاف:” مفيش حاجة اسمها من بره أنت بعد ما تقول تلات أسماء وبعد ما تقول فلان يشوط هو نمرة واحد ويجي يشوط تقوم مغيره ما ينفعش، وأنا بقول الكلام ده عهدة على كابتن أحمد شوبير اللي هو بيقول إن أول واحد هو إمام عاشور، وإمام مسك الكورة’.
وانهى قائلا:” الكابتن شوبير قال لك أصل هو عايز يدي ثقة لزيزو، طب ما إمام عاشور عايز ثقة، ده إمام عاشور كان عيان بمرض كان ممكن يبطل كورة، وإمام عاشور بقاله فترة مجبش أهداف (أهداف) ومحتاج يلعب ويجيب أهداف عشان راجع من إصابة برضه.. مين اللي محتاج أكتر؟”.
