كشف الإعلامي سيف زاهر،مفاجآت في ملف إمام عاشور،لاعب الأهلي مع الأحمر وتدخل شركة الكره لإنقاذ الموقف.
وقال زاهر،خلال تصريحات تليفزيونية ببرنامج “ملعب أون”،عبر قناة “أون سبورت”:” واحد يقول لي هي قصة إمام عاشور راحت على فين؟ أقول له قصة إمام عاشور أنا هقول لحضراتكم اللي ماتقالش قبل كده، وهقول لحضراتكم الكواليس اللي ما حدش يعرفها، وهقول لحضراتكم مفاجآت هتبقى جديدة وهتفجر الدنيا”.
و أضاف: “في بعض الناس تقول لك هو إمام عاشور ده يعني إدارة الأهلي مش هتدخل؟ هتسيبه كده على مظبوط على الـ 18 أو على 20 مليون؟ ما فيش ترضية؟ مفيش تسخينة كده عشان الراجل ده يلعب؟”
وشدد زاهر: “إدارة الأهلي لم تتدخل في عقد إمام عاشور حتى نهاية الموسم. طيب وبعد انتهاء الموسم؟ وبعد انتهاء الموسم بنسبة 90% هتدخل إدارة الأهلي لو في تجديد تلات سنين، يعني لو هيجدد تلات سنين على السنتين المتبقيين هيخش إدارة الأهلي بزيادة مقبولة”.
وواصل:” أه، يعني أنت يا عم سيف جاي تبيع لنا إن إمام مش هياخد الـ 90 والـ 100 بتوع زيزو؟ لا، أؤكد لسيادتك إن مش هياخدهم. يعني إيه؟ يعني إدارة الأهلي، كابتن سيد عبد الحفيظ مع كابتن محمود الخطيب مع الكابتن وليد صلاح الدين، حطوا سقف للشغلانة دي.. حطوا سقف للشغلانة دي وليكن 25-30 مليون جنيه”.
وأشار زاهر:” ده أغلى لاعب هيبقى موجود في النادي الأهلي، ماليش دعوة بالأجانب، ماليش دعوة بالأجانب، وماليش دعوة بزيزو عشان تبقى الأمور واضحة لأن شرحنا عقد زيزو قبل كده الراجل جه فري والدنيا كانت عاملة إزاي”.
واردف: “طب أنت هتحلها إزاي بقى؟ طب اللعيبة دي هتقعد إزاي أو هتلعب إزاي؟ كلمة السر داخل النادي الأهلي الفترة القادمة في احتفاظ النادي الأهلي بلعيبته، يعني اللي هيقعد اللعيب ده، اللي هيقعد إمام عاشور ده وهيقعد غيره في النادي الأهلي، هو أحمد حسام عوض. إيه أحمد حسام عوض؟ عضو مجلس إدارة النادي الأهلي، أيوه أنا بقول لحضرتك الكلام ده على مسؤوليتي ولو حد عنده كلام أي كلام تاني يطلع يتفضل يقوله وأنا تحت أمركم”..
وزاد زاهر:” أحمد حسام عوض هو كلمة السر الفترة اللي جاية، يبقى أحمد حسام عوض بالتنسيق مع أيمن حسين مع نيرة، المهم إن هي دي اللي هتبقى الشغلانة. يعني إيه؟ يعني شركة الكورة جابت إمام عاشور بهدوء كده وقالت له: إمام عاشور وأنا بكلم حضراتكم دلوقتي هو من أغلى اتنين تسويقياً في مصر. يعني إيه؟ يعني إمام أغلى اتنين دلوقتي بيعملوا إعلانات في مصر في مجال كرة القدم هو زيزو وإمام عاشور، أو إمام عاشور وزيزو زي ما حضراتكم عايزين”.
وتابع: “وأنا بكلم حضراتكم كده في عروض مقدمة من الشركات سواء في رمضان أو بعد رمضان، تخش تتخطى الـ 20 مليون جنيه في عقود جاية لإمام ولزيزو الفترة الجاية، حضراتكم عايزين بقى برامج، عايزين إعلانات.. دي الأرقام. فالنهاردة أما الراجل يقعد مع شركة الكورة يقول له أنت النهاردة عقدك 20-25، عندك بونص النهاردة شركة الكورة هتجيبها إعلانات بكذا، يبقى أنت من غير ما تخش في أي خلاف أو خناقة مع النادي الأهلي أنت رحت للـ 50 والخمسة و55 و60 عشان أنت في النادي الأهلي”.
واختتم:” جمع معايا عشان دي سكة اللعيبة بعد كده، وهو ده السكة اللي هيمضي بيها حسين الشحات بـ 17 مليون أو بـ 20 مليون في النادي الأهلي وهيجدد عقده. يعني شركة الكورة هي هتدفع من جيبها الأرقام دي؟ لا شركة الكورة مش هتدفع من جيبها، في لعيبة عندها عقود رعاية كبيرة تقدر تعمل كده، ينطبق ده على الشحات، ينطبق ده على إمام عاشور، ينطبق ده على محمد هاني.”
