شن الكابتن محمد أبو العلا، نجم الزمالك السابق والمحلل الرياضي، هجوماً حاداً على ما وصفه بـ “حملات اللجان الإلكترونية” التي تحاول الزج باسم نادي الزمالك في أزمة تعيين الحكام، مؤكداً أن الفارس الأبيض هو أكثر المتضررين من المنظومة التحكيمية في الآونة الأخيرة.
وقال أبو العلا، عبر برنامج “زملكاوي”، على قناة “الزمالك”:” يمكن شايفين في نغمة في السوشيال ميديا في فكره تبني أي حاجه فيها اسم الزمالك ممكن تعمل بروباجندا كبيرة “.
و اردف:” كان في تسأل هنا في قناة نادي الزمالك لزميلي محمد عبدالجليل عن حكام بعيدة عن المباريات وهو سؤال وجيه جدا هل الحكام بيحصل فيها تداور وحصل تسأل عن الحكم طارق مجدي اللي خلاص اختير للقاء الاهلي بكرة وزد “.
وأشار أبو العلا:” يمكن طارق مجدي محكمش من اول جولة للنادي الأهلي أمام مودرن لحد الجولة 19 فكان السؤال علشان نفهم وجهات النظر فيها ايه ليه حكام مبيتكررش عليها مباريات.. وده سؤال طبيعي عادي “.
وشدد:” لكن تفاجئنا اول ما تم الإعلان عن حكم مباراة الأهلي وزد طارق مجدي، لقينا حمله أو توجيه سكريبت ولجان بتشتغل كأن اعلام الزمالك اللي بتعين حكام .. والله ياريت بس ده عمره ما حصل”.
وتابع:” الزمالك دائما بيطالب المسطرة تبقى واحدة وايه المعايير وعدالة المنافسه والأخطاء التحكيمية نخلي بالنا منها وكلام كله للمصلحة العامة مش حاجه شخصية “.
وأ كمل أبو العلا:” يمكن السنه اللي فاتت كان في أزمة بعد مباراة الزمالك والبنك الأهلي وحصل برضوا شغل لجان ويمكن الحكم ده مشوفنهوش من ساعتها .. والأهلي طلع بيان وقتها رغم مكنش طرف في اللقاء وكان المباراة دي اول لقاء في الدوري لسه .. والحكم اتعمل عليه حمله ومشوفنهوش تاني”.
وأكد:” لازم لجنة الحكام تكون في مصارحه للرأي العام علشان الوضع يبقى واضح .. ده كان سؤال عن كيفية تعيين الحكام وتوزيعها وهل هي ماشيه بالضغوط ولا لو في نتائج أو حكام مش على المزاج بيحصل كده”.
وزاد أبو العلا:” ولما حد يجيي يتهم نادي الزمالك بفكره تعيين الحكام دي نكته الموسم والله العظيم.. الزمالك أكثر نادي اتظلم من التحكيم واخرها لقاء سيراميكا كليوباترا اللي طلعنا منها من كأس مصر، احنا من أكثر الفرق اللي بتعاني ومن أكثر الفرق اللي بتطلب بعدالة وتطبيق اللوائح والكل يحس بتكافؤ الفرص”.
وأختتم:” لو الزمالك بيتحكم في القرارات.. مكنش لعب نفسه 6 ماتشات في 15 يوم لكن معروف مين بيحرك الأجواء في الكواليس واحنا بنتكلم في حاجات واضحه أن الزمالك بيعاني من المنظومة وفي فرض سيناريوهات عليه دايما الكل يعرف يميزها كويس”.
