كشف هيثم فاروق نجم الزمالك السابق عن كواليس اللحظة المؤثرة التي جمعته بأساطير النادي في “دخلة” الجماهير، مؤكداً أنه لم يتوقع هذا التكريم الخاص وسط عمالقة مثل حسن شحاتة وشيكابالا، خاصة وأنه قضى سنوات قليلة بقميص “ميت عقبة”.
وقال فاروق، خلال تصريحات تليفزيونية عبر قناة” أون سبورت”:” عن لقطة رفع الجماهير صورته في المدرجات؟ أنا كنت في الاستوديو التحليلي وما ركزتش كويس على اللقطة، وبعدها فرحت جدًا لما شفت الكباتن حسن شحاتة، أبو رجيلة، محمود سعد، أحمد رمزي، علي خليل، طه بصري، أشرف قاسم، جمال عبد الحميد وشيكابالا وكل النجوم”.
وتابع:” بصراحة، ما كنتش متوقع إن صورتي تبقى موجودة، خصوصًا إني لعبت في الزمالك سنتين وشوية وخدت 3 بطولات بس، في ناس لعبت 10-15 سنة وخدت 15-18 بطولة، لكن لما شفت صورتي وسط الجمهور بكيت من الفرحة والفخر”.
وشدد فاروق:” الجمهور الزملكاوي مش بينسى لعيبه اللي وقفوا جنب النادي، وده خلاني أقتنع إنك لازم تدافع عن الزمالك في الحق وتكون في الصفوف الأولى عشان تحصد احترام الناس زي ما حصل معايا، جمهور الزمالك هو سبب بقاء نادي الزمالك حتى الآن منافس على كل البطولات”.
وأشار:” اللي بيعمله نادي الزمالك أقرب للمعجزة، رغم وقف القيد والإصابات والمشاكل والمستحقات، الفريق بيكسب، بيتنقل ويواجه أندية أغنى، وبيستمر في المنافسة، تصدر مجموعته في الكونفدرالية، ومركز ثاني في الدوري، ومستمر في كأس مصر”.
وأختتم:” باذن الله نشوف الزمالك على منصة التتويج، وده دليل على قدرة النادي على القتال والمثابرة رغم كل الظروف الصعبة”
