”يقولك فين القيم والمبادئ؟” شوبير يعلق على عودة محمد عواد للمشاركة مع الزمالك بعد إصابة صحبي! فيديو
فتح الإعلامي أحمد شوبير ملف الإصابات والانضباط داخل نادي الزمالك، كاشفًا كواليس الحالة الطبية لبعض اللاعبين، وموقف الجهاز الفني من قرارات الإيقاف، وذلك خلال حديثه الإذاعي، حيث تحدث بصراحة عن التفاصيل كاملة ورؤيته لطريقة إدارة الفريق في هذه المرحلة.
وقال شوبير في تصريحات عبر إذاعة «أون سبورت إف إم»: «محمد صبحي، حارس مرمى الزمالك، عنده التهابات خفيفة كده في وتر أكيليس، وأنا بقول له خلي بالك، لأن الموضوع ده تقيل شوية. فخلي بالك يا صبحي، لو نغيب ماتش أو ماتشين مفيش مشكلة، بس المهم نتعالج صح، لأن وتر أكيليس، لا قدر الله، إصابة ممكن تقعد سنة كاملة. فخلي بالك على نفسك، وإن شاء الله تكون موجود. جايين في كايزر تشيفز، لحقنا خير وبركة، ما لحقناش مش مهم، نستنى كمان كام يوم ونرجع بالسلامة إن شاء الله».
وتابع شوبير: «أكمل لك الإصابات، عمرو ناصر عنده إصابة بتمزق في العضلة الخلفية، ومش هيكون موجود لا في اللقاء الجاي، ولا في مباراة سموحة، ولا في لقاء كايزر تشيفز. محمد عواد، النهارده الجهاز الفني هيحدد موقفه. تقول لي يعني إيه هيحدد موقفه؟ أقول لك: هيحدد موقفه هيعمل فيه إيه. لأن الزمالك لما أوقف عواد، ما قالش هو موقوف قد إيه، يعني ما قالش مدة الإيقاف. قال إيقاف محمد عواد، وكان قرار داخلي مش مُعلن، وبالتالي من حق الجهاز الفني يرجعه في أي وقت».
وأضاف شوبير: «وأنا على فكرة مع الكلام ده. أنا وقفتك، وأنا عاقبتك، وأنا خصمت لك، تمام. وأنا لو حابب أرجعك، أرجعك وقت ما أرجعك حسب احتياجات الفريق. أنا طبقت عليك لائحة، وطبقت عليك نظام، خلاص. وقت ما أنا حاسس إنك التزمت وانضبطت، أهلًا وسهلًا ترجع تاني. تيجي تقول لي: إنت لو مدير كرة تعمل كده؟ أيوه أعمل كده. أمال المبادئ والقيم إيه؟ المبادئ والقيم كانت في المبدأ، إني وقفتك، وحرمتك من اللعب، وخصمت لك فلوس، وألزمتك تتمرن لوحدك، وبعدين رجعتك للفريق».
واختتم شوبير تصريحاته قائلًا: «بعد كده أنا حر أشوفك جاهز ولا مش جاهز، دي بتاعتي أنا. ما أنا كمان بقبضك، وليك التزامات عندي، وأنا ملتزم بيها من أول يوم لآخر يوم. وحتى لما بتأخر، بعترف إن ليك فلوس عندي، وبظبط لك الدنيا على قد وضعي المادي. فإنت ليه تحرم النادي من حقه؟ دي وجهة نظري، ناس ممكن تختلف أو تتفق معايا، بس دي وجهة نظري».
