إبراهيم فايق يكشف تفاصيل “الغربلة الكبرى” وإعادة الهيكلة في الأهلي ورسالة قوية للجماهير
فجر الإعلامي إبراهيم فايق، سلسلة من المفاجآت المدوية حول مستقبل قطاع كرة القدم بالنادي الأهلي، مؤكدًا أن النادي بصدد عملية “إعادة هيكلة شاملة” تهدف إلى استعادة هوية الفريق وضبط منظومة “أوضة اللبس” التي عانت مؤخرًا.
وقال فايق، خلال تصريحات تليفزيونية عبر قناة “ام بي سي مصر 2″:” عمري ما شوفت فترة توقف للأهلي بالشكل ده، لكن جمهور الأهلي دايمًا عنده حتة ذكاء، بيعرف يضغط على الإدارة وياخد منها اللي هو عايزه، والجمهور شايف بقاله فترة إن دي مش اللعيبة اللي تعبر عن هوية الأهلي ولا دي أوضة اللبس اللي متعودين عليها، وكان لازم النادي يطلع يعترف بالأخطاء”.
وتابع: “أحيانًا بيحصل إنك تفلت منك زمام المنطق، لكن الأهلي طول عمره فريق نجوم، ومحدش يقول أصل الصفقات”.
و أضاف فايق:” لأن الأهلي عبر كل العصور ومع نجومية أبو تريكة وحسام غالي وعماد متعب وغيرهم مكنش في فروق مالية تخلي اللاعب مش مركز أو مش على قلب رجل واحد أو أوضة اللبس فيها كده وده اللي اختلف من زمان عن دلوقتي “.
وشدد:” من بعد سيد عبد الحفيظ مجاش مدير كرة قادر يملأ الفراغ ده، لأن إدارة الكرة هي إدارة أوضة اللبس، ودي أهم حاجة، والمشكلة إنك بتكرر نفس الغلط إنك مش فاهم الشخص اللي جاي يعمل إيه، وبتعمل تعاقدات من غير ما تتعلم من أخطائك”.
و اردف:” ياسين منصور وسيد عبد الحفيظ شغالين دلوقتي على تصليح أخطاء كتير، وده محتاج وقت ومش هيحصل في يوم وليلة
وفي ناس بتطلع تتكلم وبتقول إنها خايفة على الأهلي، لكن في الحقيقة في مصالح، وفي ناس كانت بتسرب أخبار وتلات أرباعها غلط”.
وأكمل فايق:” وأنا كنت بقول إن الأهلي داخل على إعادة هيكلة كبيرة، لأن في مشاكل كتير مش راضي عنها لا سيد عبد الحفيظ ولا ياسين منصور، وعايزة وقت عشان تتصلح”.
وواصل:” الأهلي ناوي يجيب مجموعة من الأجانب يتولوا ملف اللاعبين الأجانب، وقطاع تاني يكون مسؤول عن اختيار اللاعبين العرب، وقطاع ثالث للاكتشافات المحلية، ويكونوا منتشرين في كل أنحاء مصر، وكمان يبقى في رؤية واضحة لقطاع الناشئين”.
و استأنف فايق: “الحقيقة إن الأهلي في الفترة اللي فاتت مكنش عنده مستقبل واضح في قطاع الناشئين، والقطاع ما بيطلعش لاعيبة بالشكل المطلوب، وده ملف مطروح على الترابيزة”.
وأشار:” في غربلة كبيرة جاية في الأهلي على مستوى الأسماء، ومفيش لاعب مهما كان اسمه ضامن مكانه، الكل هيتقيم والكل تحت الاختبار، الأهلي لو بإيده كان ممكن يمشي توروب، لكن الشرط الجزائي مانع ده، فمفيش قدامه غير إنه يدعمه لحد نهاية الموسم، ولو كسب الدوري غالبًا مش هيكمل”.
وزاد فابق:” يمكن الكلام ده يبان مش منطقي، واتقال قبل كده إن إعارة كامويش ممكن تتقطع، لكن توروب طلب استمراره وقال إنه هيتعامل معاه بطريقته ، اسم وسام أبو علي ما اتطرحش، لكن إبراهيم عادل مطروح بقوة، والصفقة قريبة ومش بعيدة زي ما الناس فاكرة”.
وأكد:” ممكن خلال أول أسبوع من أبريل تتحسم ملفات التعيينات والاسكاوتنج والتعاقدات بشكل كبير، المرحلة الجاية هي مرحلة ترتيب أوراق مهمة جدًا، وإعادة بناء فريق الكرة وقطاع الناشئين من جديد”.
وأختتم:” رسالة لجمهور الأهلي: هتسمعوا ناس تشكك في أقرب وأخلص الناس، ومنهم سيد عبد الحفيظ، لكن لازم تبقوا واعيين إن في ناس من مصلحتها تشوه الصورة، سيد عبد الحفيظ بيحظى بحب كبير جدًا من جمهور الأهلي، وفي تناغم واضح بينه وبين ياسين منصور، والاتنين بيشتغلوا بدون مصالح شخصية وبإنكار ذات”.
