بين الترضية والاحتراف”..هاني رمزي يفتح “صندوق الأسود” لملفات إدارة الكرة في الأهلي- فيديو
تحدث هاني رمزي، نجم الأهلي السابق، عن أزمات الأحمر خلال الفترة الحالية ومايدور خلف الكواليس في فريق الكرة
وقال رمزي، خلال مداخلة هاتفية عبر قناة “اون سبورت”الأهلي إيه المشكلة؟، لا الحقيقة النادي الأهلي بيمر بظروف صعبة جداً كلنا عارفينها وشايفينها وحاسينها وجماهير النادي الأهلي شايفينها كويس، وده نتاج بعض الأخطاء في بعض الملفات يعني أُديرت بشكل أعتقد أنها مش بشكل جيد”.
وواصل:” بالنسبة لقطاع الناشئين، أنا كان ليا طبعاً رأي واضح وصريح أن قطاعات الناشئين عامة في مصر يمكن مش ماشية بشكل جيد، لكن النادي الأهلي خاصة معروف عنه كان من زمان بيطلع لعيبة كويسة ودايما بياخد من قطاعات الناشئين، الحقيقة لازم القطاع يتعمل له إعادة تنظيم جديد ويشتغل بطرق علمية وطرق حديثة عشان يقدروا الحقيقة يكملوا في النادي الأهلي”.
وشدد رمزي: “وأنا شايف أن لازم يكون في قانون كده في النادي الأهلي أو أساس في النادي الأهلي بالنسبة للناشئين يتظبط بشكل جيد ويكون على الأقل تارجت قدام النادي الأهلي يتحط قدام الناس المسؤولة في القطاع أننا عايزين كل سنة اتنين تلات لعيبة يكونوا موجودين في الفريق الأول، ودوت كمان بمباركة المدير الفني أياً كان المدير الفني”.
و تابع:” إحنا عندنا لازم يكون موجود عندنا تلات لعيبة كل سنة من قطاع عشان يكونوا موجودين في الفريق الأول وده مش فرض على المدير الفني، لكن ده سيستم النادي لازم يتحط بشكل كبير، يبقى النادي الأهلي زي الأندية الكبيرة، أنا في الأندية الكبيرة كل سنة بتطلع على الأقل لعيب اتنين لعيبة يكونوا موجودين في الفريق الأول، فالنادي الأهلي مش بعيد عن ده بس لازم الأول تتنظم أمور البيت بشكل أفضل من كده”.
و أضاف رمزي: “أنا لغاية دلوقتي طبعاً زعلان زيي زي الجماهير، بس دايما بقول أن النادي الأهلي في أصعب اللحظات هو قادر على العودة بقوة، يعني ده ميزة النادي”.
و أستطرد:” بعض الملفات اديرت بشكل خطأ؟، بعض الاختيارات، أنا شايف برضه المدير الفني عليه جزء كبير جداً، لكن كمان اللعيبة عليها جزء، أولاً اختيارات المدير الفني أعتقد ما كانتش في المستوى المطلوب، اختيارات رأس حربة النادي الأهلي في شهر يناير أعتقد برضه ما كانتش بالمستوى المطلوب، خروج بعض اللعيبة أعتقد ما مكانش مناسب انك تخرج بعض اللعيبة، واللعيبة اللي جت الحقيقة كمان مش بنفس المستوى أو كمان مستوى أقل، فكل ده بيأثر أكيد على أداء النادي الأهلي، بيأثر على الأجواء الموجودة في النادي الأهلي”.
و زاد رمزي: “خروج بعض اللعيبة ودخول بعض اللعيبة مش بالمستوى، أنا شايف أن الملف ده ما تمش إدارته خاصة في يناير بشكل جيد جداً، كان فيه دفوهات كتيرة وأخطاء كتيرة جداً جداً أثرت أكيد على المستوى الفني للفريق ككل”..
و أكمل:” الجزء الثاني والأهم أن ما فيش كمان خطوط واضحة بالنسبة للعيبة الكبيرة بين قوسين النجوم، أن أنت ما عندكش حق أنك في وسط السيزون تطلب أو تلمح أن أنا عايز أجدد عقدي، وموضوع الترضية كمان يا سيف أنت عارف ما فيش حاجة اسمها ترضية في عالم الاحتراف، أنت كل لعيب مرتبط بعقده مرتبط بأرقامه”
و استأنف:” والله لو أنت شايف نفسك عايز أكتر وبتأدي بمستوى أكتر اقعد مع الجهاز مع مجلس الإدارة واطلب، لكن ما يكونش بطريقة متشاف فيها أن أنت لو ما عملتوش كده أنا مش هلعب أو مش هأدي، الحاجات دي كلها الحقيقة لازم يكون ليها وقفة، والحاجات دي لازم تكون الحقيقة من الحاجات اللي لازم تتحط في أساسيات النادي الأهلي، أي لعيب على مستوى مصر وعلى مستوى حتى بعض الدول الأوروبية يتمنى يلعب في النادي الأهلي، وبالتالي لازم يكون ليه سيستم واضح بالنسبة للتعاقد مع اللاعبين، ده جزء”.
و أردف رمزي:” الجزء الثاني والمهم جدا هو سقف المرتبات، أنا شايف أن برضه سقف المرتبات وصل لدرجة أنا شايف من وجهة نظري طبعاً الشخصية أنه لا يتناسب مع الدوري المصري ولا يتناسب مع إمكانيات الدوري المصري ولا يتناسب مع المردود اللي بيقدمه اللعيبه، بدأنا نسمع أرقام كبيرة جداً جداً، وبالتالي ده عبء على النادي أن اللعيبة بتطلب أرقام كبيرة وبتتحقق الأرقام دي أو ما بتتحققش، لكن ده بدأ دلوقتي يكون موجود، وما بتكلمش عن النادي الأهلي بتكلم أن الأرقام بقت مبالغ فيها الحقيقة بشكل كبير جداً، ده ملف كمان أعتقد النادي الأهلي لازم يحط حدود في هذا الملف بشكل كبير جداً”.
و أستكمل:” الشكل الأولاني سقف التعاقدات مع اللعيبة لازم يكون مناسب للنادي الأهلي ومناسب لإمكانيات الدوري ومناسب لإمكانيات اللعيبة. الجزء الثاني ما فيش حاجة اسمها ترضية، أنت راجل بتلعب ماضي عادي تلات سنين ما تجيش بعد السنة الأولى أصل أنا بلعب كويس وأنا أحسن من ده، أصل اللعيب اللي جيده دوت واخد أكتر مني، كل الحاجات ديت ان-بروفيشنال، كل الحاجات دي بعيدة تماماً عن الاحترافية”.
وشدد:” فلازم يكون في وقفة وفي حاجة لازم تتحط ويبقى اللعيب عارف أنه داخل، اه أنا عندي سنتين والنادي الأهلي عنده قدرة على التجديد معاه، عنده قدرة أنه شايف بقى لعيب كويس وبيقدم شكل كويس، النادي الأهلي هو اللي يقول بنفسه لا أنا هزود لك مرتبك أو عقدك، فالأمور دي كلها الحقيقة أكيد أثرت على أوضة اللبس”
وأكد رمزي: “أنا شايف أن شخصية توروب والأداء الفني اللي بيقدمه الحقيقة لا يليق مع النادي الأهلي، أنا دايما مع الاستقرار الفني بشكل كبير جداً، وشايف أن تغيير المدربين ملف أيضاً كان للأسف النادي الأهلي مش متعود عليه، تغيير مدربين كتير قوي في الفترات اللي فاتت يا فندم والله طبعاً الحل صعب جداً، يعني عشان تقول المدرب يمشي دلوقتي، ده أعتقد أن الموضوع صعب جداً، أولاً عندك كمان خمس أيام مباراة، عندك شرط جزائي مع الراجل وطبعاً الأرقام كبيرة جداً جداً، فالحل صعب فعلاً، يعني مجلس الإدارة الله يكون في عونه يعني، هو في موقف صعب جداً، الراجل ده لو مشي دلوقتي هياخد رقم كبير جداً، لكن أنا في رأيي أن دايما القرارات”.
وردا على سؤال هل حضرتك بتشوف الراجل لو مشي البديل مصري ولا أجنبي؟ اجاب:” لا أنا شايف البديل مصري الحقيقة، أنا مع احترامي، أنا شايف فيه مدربين كويسين، فيه علي ماهر وفيه كابتن حسام البدري وعماد النحاس كان في فترة من الفترات ماشي بشكل جيد”.
و. أشار: “كل المطلوب الحقيقة من الجماهير آخر حاجة، إحنا وأنا هحط نفسي من ضمن الجماهير، إحنا ما عندناش دلوقتي غير مساندة الفرقة، مليون في المية، إحنا دلوقتي داخلين على منحنى خطر جداً، خمس أيام على مباراة في دوري الأبطال، إن شاء الله ربنا يوفقنا فيها، وأنا بقول أن الدوري مازال مش بعيد عن النادي الأهلي.
لأن فيه ناس كتير وقطاع كبير من الجماهير بتقول لا الدوري خلاص راح، أنا بقول أن الدوري، لكن مش هطلب فنيات من اللعيبة، لكن هطلب شخصية النادي الأهلي اللي إحنا عارفينها تكون في الملعب خلال الست ماتشات اللي جايين”.
و استأنف:” شخصية النادي الأهلي، روح النادي الأهلي، لازم ترجع تاني، مش هقولك فنيات وتكتك، لا أنا رأيي الفترة اللي جاية محتاجة روح النادي الأهلي، محتاجة شخصية النادي الأهلي، واللعيبة دي لازم تعرف هي بتلعب فين، يعني ده كمان لازم يكون موجود، وده مش هيجي غير لما بيكون فيه تكاثف وفيه لمة كويسة مننا كلنا الحقيقة لأن النادي الأهلي في موقف صعب جداً، وكلنا لازم نكون واقفين ورا النادي الأهلي” .
وبشأن كامويش : “انا مش دايما بحكم على اللعيب بماتشين تلاتة، لكن الإمكانيات اللي ظهرت، اللي ظهر عليها، أعتقد أن هو ما عندوش إمكانيات يعني حتى نقول أنه ممكن يجي الفترة اللي جاية أو ممكن يقوم تاني، انا شايف أنا أعتقد أن هذه الصفقة برضه ما كانتش في المستوى المطلوب للنادي الأهلي الحقيقة”.
واستطرد رمزي:” الأهلي عنده سكواد رائع، في بعض المراكز خاصة في خط الدفاع لازم يكون فيه عناصر أفضل من كده على المستوى الفني بالنسبة لخط الدفاع، عايزين رأس حربة أكيد بمواصفات أفضل من اللي عندنا بكتير، لكن هتتكلم على خط النص عندنا أفضل خط نص موجود، عندنا، لما بيكون في حالته بيبقى كويس، لما يكون في حالته بيبقى كويس، عندنا عناصر وأسماء جيدة، لكن في بعض المراكز لازم يكون عندهم كواليتي أفضل من كده خاصة في خط الظهر.
.
واختتم: هو طبعاً إحنا نتكلم على تفوق الزمالك، هو الزمالك زي ما بقولك كده رغم الأزمات اللي بيمر بيها، أنا طبعاً تحية طبعاً لمعتمد جمال لأنه واحد من اللي اشتغلت معاهم أو اشتغل معايا بشكل جيد، تحية لجماهير نادي الزمالك، زي ما بقول تحية للجماهير كمان النادي الأهلي اللي دايما واقفة ورا فريقها، لكن الزمالك في فترة هو مش خسران حاجة، هو اللي موجود هو ملوش ضغوط، هو بيلعب وبيقدم بشكل جيد جداً ومعلوش ضغوط، لو النتائج سيئة عنده الظروف اللي ممكن يطلع بيها يقول لك لا إحنا عندنا أكيد ظروف صعبة جداً، بيمروا بظروف صعبة، لكن الحقيقة اللي بيعمله نادي الزمالك كان تحية، أنا بالنسبة لي تحية للي بيعملوه، يعني فريق نادي الزمالك لعيبته وجماهيره ومعتمد جمال”.
واتم:” لكن مش عايزين نقول أن عمرنا ما هنقول، آه يعني نبص لنادي الزمالك ونعمل زيه، لا يعني الناس كانت بتبص للنادي الأهلي وبتعمل زي النادي الأهلي مع كامل الاحترام للجميع، لكن تاني بقول أن مازال أنا مؤمن تماماً تماماً أن مازال النادي الأهلي في إطار منافسة على الفوز إن شاء الله بالدوري”.
شاهد:
