علق الإعلامي سيف زاهر، على خسارة الأهلي أمام طلائع الجيش، ضمن منافسات بطولة الدوري المصري، وتوقع فرض غرامة كبيرة على لاعبي الأحمر.
وقال زاهر، خلال تصريحات تليفزيونية عبر قناة “أون سبورت”:” كل يوم في الشغلانة دي بحس إن ربنا بيراضيني خير، وبرضه بلاقي انتقادات شديدة، أنا قعدت وقلت إن مباراة الأهلي قدام طلائع الجيش هي أهم مباراة للأهلي، وقلت كمان إنها أصعب مباراة، فالانتقادات كانت صعبة جدًا، وقالوا إني بعمل موضوع وخلاص وإن مباراة الأهلي والجيش سهلة وإن الأهلي هيكسب”.
واضاف:” واحد بعتلي وقالي حد يصحي سيف زاهر ويقوله إن الأهلي في المركز الثالث والجيش في المركز السابع عشر، أنا لا رديت ولا علّقت، وقلت يارب دي وجهة نظري وننتظر”.
وتابع زاهر: “وأنا بتفرج على المباراة افتكرت كلامي، وفعلاً كانت أصعب مباراة للأهلي، وأكبر مشكلة واجهت الأهلي كانت عقلية اللعيبة مع النتيجة دي، الأهلي دخل المباراة ومسمعش كلامي ومستسهل اللقاء، وكأنهم ضامنين الفوز قبل ما يلعبوا”.
وشدد:” مفيش فريق بيكسب وهو نازل مستسهل المباراة، ولاعيبة الأهلي دخلوا كأنهم خلاص كسبانين، وهما مش عارفين إن قدامهم فريق كويس ومدرب كويس، وكانوا بيهاجموا وبيوصلوا لمرمى الأهلي”.
وأكمل زاهر:” لما نقول الكلام ده لازم تسمعوا، ومحدش يطلع يقول فين مجلس الأهلي، محدش يتكلم غير عن اللعيبة، هما المسؤولين عن اللي حصل، مجلس الإدارة وفر كل حاجة للفريق، فين اللعيبة الكبار جوه الملعب؟”.
و اكد:” إحنا في انتظار عقوبات تاريخية على لاعبي الأهلي، لأنهم لازم يتحملوا المسؤولية ويشيلوا الليلة، لا مجلس الإدارة ولا سيد عبد الحفيظ هما المسؤولين عن اللي حصل، حتى محمد الشناوي ما يُسألش لوحده عن النتيجة، لأنه خرج كرتين من جوه المرمى أهداف محققه”.
