أعرب حسام حسن، المدير الفني للمنتخب المصري، عن سعادته البالغة بالفوز المحقق على نظيره السعودي، مشيداً بالمجهود الكبير الذي بذله اللاعبون والروح القتالية التي ظهروا بها خلال المباراة.
و فاز منتخب مصر على السعودية، بنتيجة 4 – 0، في المباراة الودية التي جمعت بينهما على هامش الاستعدادات لبطولة كأس العالم.
وقال حسن، خلال تصريحات عقب المباراة: “فوز كبير جداً على منتخب كبير واحد من أبطال القارة الآسيوية، المنتخب السعودي برباعية نظيفة، وأنا الحمد لله والشكر لله طبعاً بشكر لعيبتي جداً وبشكر الجماهير المصرية وحتى الجماهير السعودية اللي كانت متواجدة، وبقول هارد لك للمنتخب السعودي”.
وتابع:” طول الوقت المباراة مش سهلة، بنلعب قدام منتخب قوي جداً من أحسن المنتخبات الموجودة في آسيا والوطن العربي، أعتقد المباراة مهما كانت النتيجة مش سهلة لأن بنلعب عارفين إحنا جايين نلعب قدام مين، وعارفين إننا اخترنا الاستعداد لكأس العالم مع منتخب النتيجة ما تتوقعهاش قبل المباراة لأن القوة متوازنة، وقوة المنتخب السعودي بتاريخه لا تقل عن المنتخبات الكبيرة في العالم”.
وأضاف حسن: “الحمد لله إن اللعيبة بتاعتي في الفترة اللي اشتغلنا فيها والانسجام اللي كان موجود وصلت لهم المعلومة رغم إننا في وقت قصير جداً اتدربنا واللعيبة جت على فترات، بشكرهم جداً إن كانت فيه استجابة في الوقت القصير سواء في المحاضرات أو التاكتيك اللي بنشتغل بيه، درجة استيعابهم كانت عظيمة”.
وشدد:” عايز أقول كل التحية والتقدير للجماهير المصرية والسعودية اللي كانت هنا، التشجيع اللي كان موجود والكثافة كان لها دور كبير النهارده، وإن شاء الله أرجو الجماهير في مصر تساندنا زي ما بتساند الأندية العظيمة، التواجد ده بيفرق كتير مع اللاعب المصري بغض النظر عن النتيجة”.
وواصل حسن: “عن الأداء والشكل والاختيارات؟ هسيبها للإخوة النقاد والجمهور، فيه شكل تكتيكي بنشتغل بيه دفاعياً وهجومياً والحلول اللي موجودة في لعيبة جديدة وإضافة للمنتخب دي مهمة جداً، من المكاسب اللي كنت مهتم بيها في اختياراتي أثناء متابعتي للدوري وأنا مقتنع بنسبة 99.9% باللعيبة اللي موجودة”.
وبشأن غياب صلاح؟ اشار:” طبعاً نقصنا النهارده محمد صلاح، هو قوة كبيرة وقيمة كبيرة فعلاً ككابتن فرقة وكناحية فنية وتأثير معنوي، والنجاح لأي منتخب هو الإضافات اللي بتيجي مع الوجوه الجديدة اللي بيجتهدوا في الدوري وبندخلهم بشكل سلس”.
وأكد حسن: “راضي عن لعيبتي جداً، وحتى اللي نزلوا طارق علاء وإبراهيم عادل وتجربة الاحتراف بنطمن عليه”.
و أردف:” إسلام عيسى بفضل الله إحنا اللي جبناه النادي المصري وهو لاعب صغير ومن المصري كانت الانطلاقة لأندية كبيرة زي بيراميدز، وأنا متابع الناس كلها وشايف كل الناس”.
وأكمل:” عايز الناس تعرف إن في بعض المراكز بنحتاج اتنين تلاتة بالكتير فبختار منهم، ومش معنى إننا اخترنا حد يبقى اللي بره وحش، الاختيارات حصلت لصابر وأسامة فيصل وخالد صبحي وربيعة، والنهارده دخلت مجموعة لاعيبة جديدة”.
وزاد حسن:” إحنا دخلنا في المباراتين دول في أصعب قرار، تلاعب السعودية في السعودية واتجمعنا قبلها بـ 3 أيام، وبكرة هنسافر 8 ساعات وهنلعب يومين والتالت ماتش مع منتخب إسبانيا المرشح الأول لكأس العالم، الموضوع صعب فأرجو المساندة من الناس دي تجارب عشان ناخد الثقة”؟
واختتم: “لما تلعب مع الكبير والقوي زي السعودية وإسبانيا بتاخد إصرار وراحة نفسية إنك قادر، بغض النظر عن النتيجة أتمنى نحقق نتيجة إيجابية، تجربة من التجارب الثقيلة اللي هنقابلها في كأس العالم إن شاء الله، وبالتوفيق لينا والمغرب والجزائر وتونس في كأس العالم”.
