أثنى حازم إمام، لاعب الزمالك السابق، على جمهور ولاعبي الفريق الاول لكرة القدم بالنادي، وكذلك ممدوح عباس رئيس الفارس الأبيض الأسبق.
وقال إمام،خلال مداخلة هاتفية عبر قناة “أون سبورت” : “اللي جاي للزمالك؟ يعني الانفراجة فين أو القصة إيه؟، لا مفيش، ماعرفش الانفراجة والله يعني يُسأل الناس في المجلس بس أنا ماعرفش، الكلام كله كان على الفطار في منزل ممدوح عباس الحاجات كلها إيجابية والنادي ناس مبسوطة والجمهور مبسوط طبعاً”.
و أردف:” كانت كلمة السر كلها الجمهور، كله كان بيتكلم على الجمهور ووقفته مع النادي إزاي وإزاي الواحد مبسوط بجمهور نادي الزمالك عامل إبداع يعني في الماتشات وعدد جماهير يمكن الأكبر في الدوري المصري، كل ماتش بيروح في الظروف الصعبة دي، فكان كل الكلام على كده يعني. الحالة المعنوية كلها كويسة، أعتقد المجلس بيوفر المكافآت والحاجات دي كلها”.
وشدد إمام: “لكن طبعاً لسه في مشاكل، عقود اللعيبه لسه طبعاً كتير أوي ماخدوهاش عشان كده يعني اللعيبة والنتائج دي إنجاز بكل المقاييس لأن أعتقد لاعيبة الزمالك الأقل حصولاً على مستحقاتها في الدوري لغاية دلوقتي، ممكن ما يكونوش كملوا ربع المستحقات لكن رغم كده الناس بتؤدي وبتؤدي برجولة وبتؤدي بشغل جامد، وده يمكن بقى اللي بيحاولوا هم يعملوه دلوقتي إن دايما مكافآتهم يحاولوا يطلعوها على طول، يحاولوا يبقى الأمور تتحسن شوية يعني ربنا يوفقهم يا رب إن شاء الله بإذن الله”.
ومن جانبه سأله سيف زاهر: حازم الفترة اللي فاتت سمعنا بعض الأحاديث إن في اختلاف ممكن يكون في وجهات النظر أو اختلاف كبير ما بين الكابتن أحمد سليمان ومجلس الإدارة، وشفنا إمبارح الصورة إن مجلس إدارة كامل.. هل حصل جلسات يعني تقريب وجهات النظر؟ صلح؟ تهدئة الأمور تمام؟
ليجيب إمام:” والله يا سيف بص يعني أنا ماعرفش ديتيلز بس إمبارح القعدة الناس كلها كانت ودية جداً، وكابتن أحمد سليمان كان في وسط القعدة وقاعد مع الناس وكان يعني بيكلم وبيهزر مع الناس كلها بتاعة مجلس الإدارة، ما حسيتش إن في أي حاجة يعني فيها في النفوس مشكلة.. الله أعلم طبعاً، اللي شفته إمبارح كل الناس كانت موجودة وكل الناس كانت بتتكلم مع بعض وقاعدين وبيتكلموا على النادي وهنعمل إيه وبتاع والدنيا فيها إيه، لكن ما شفتش بُعد أو حاجة”.
وواصل:” بالعكس كابتن أحمد بشوفه في الماتشات على طول متواجد ومركز مع الفرقة وهم خلاص سايبين الموضوع لـ جون وهو اللي بيدير وهم الناس كلها شايلة إيديها وهم كلهم بيدعموه، الدنيا ماشية كويس الحمد لله يا رب”.
وأكمل إمام: “جون هو اللي بيدير؟ هو صاحب القرار؟، على حد علمي آه طبعاً يعني هو ومعتمد وكابتن حسين وكابتن هشام أعتقد هم المسؤولين عن ملف الكورة يعني”.
وعاد سيف زاهر وقال:” دور الأستاذ ممدوح عباس دور كبير جداً لنادي الزمالك مفيش حد يقدر يغفله، ولكن الجمهور دايماً بيتساءل سؤال: الأرقام اللي الأستاذ ممدوح بيحطها دي هل في يوم من الأيام هيجي حد مجلس إدارة هتبقى الأرقام دي مديونية على نادي الزمالك؟ ولا الأرقام دي”.
ليرد إمام:” لا مش مديونيات ماعرفش، بس عايز أبص أقول لك بشكل عام بغض النظر أي حد، مثلاً بشوف كابتن حسين السيد بيحط فلوس مثلاً أو هشام نصر أو طبعاً.. بس الفلوس دي بتتحط”.
وزاد :” أي حد بيحط فلوس مجرد إن هو عايز يساعد كتر خيره، ده بيطلع من بيته عشان نادي الزمالك فكتر خيره بغض النظر بقى هياخدهم مش هياخدهم هو بيحل لك مشكلة، لكن أنا ماعرفش بقى هو هياخدهم ولا لا الله أعلم، بس مش ممكن هياخد الفلوس دي كلها يا أستاذ ممدوح أكيد يعني، ما شاء الله دافع فلوس كتيرة جداً السنة دي والسنة اللي فاتت فـ ماعرفش طبعاً فيُسأل هو فيها هو وأيمن”.
وأستأنف :” لكن بغض النظر هو يعني أنت لو حد قال لك هات لي فلوس عشان أنا مزنوق وأديته وقلت له خير ما هو طبعاً في جميع الأحوال كتر خيره، فكرة الكورة أو فكرة إن أنت مش هتقعد تعيش على حد يدفعلك فلوس على طول يعني كتر خيره بس هو هيقعد لغاية إمتى؟ أكيد عامل زي الثقب الأسود اللي هو بتحط حاجات بتروح في ثانية، لازم يبقى في حل جذري للموضوع ده”.
وأتم: “آه الزمالك نادي كبير جداً ومحبينه كتير لكن هو مثلاً الوحيد اللي بيدفع كتير هو الأستاذ ممدوح طبعاً، فلازم توجد بدايل وتشوف الدنيا هتمشي إزاي يعني كتر خيره ألف خيره فعلاً على اللي بيعمله بصراحة، بيعمل كتير أوي أوي وفي حاجات كمان الناس ما تعرفهاش بس أنت تشوف حل إن هو مش هتقعد تعيش على إن أستاذ ممدوح هو بس اللي بيدي فلوس، لازم توجد أنت حلول لهذا الموضوع”.
