.كشف حازم إمام، نجم الزمالك السابق، موقفه من التواجد في شركة الكرة بالنادي حال تم إنشائها.
وقال إمام،خلال مداخلة هاتفية ببرنامج “ملعب أون”، عبر قناة “أون سبورت” ردا على سؤال هل حازم إمام وميدو ممكن نشوفهم في شركة الكورة؟” في شركة الكورة؟ ماعرفش والله يا سيف لا لا الدنيا ماشية كويس مش عايزين نلخبط الدنيا يعني”.
وتابع: “مفيش يعني فتح موضوع شركة الكورة ده على إزاي والقانون الجديد لكن مفيش آلية لسه يعني مفيش”.
و أضاف إمام:” هل لو اتعرض عليك ممكن تكون موجود؟، أي حاجة في الزمالك، قلت لك يا سيف كذا مرة أي حاجة للزمالك الواحد ما بيقولش لأ طبعاً يعني، بس دي لسه إجراءات كبيرة وكتيرة ولازم تاخد بيها موافقات ولسه فيها أمور يعني”.
وردا على سؤال:” لو حازم إمام قاعد بيفكر كده في البيت وبيحلم حلم لنادي الزمالك يتمنى مين يكون رئيس شركة الكورة؟ أجاب: “لا والله أصل مش لازم شركة الكورة يبقى ممكن يبقى مش اسم جامد حد يعرفه أنا ما عنديش مشكلة”..
ووجه له سيف زاهر سؤال جديد:” أنت من وجهة نظرك مين؟ ليجيب إمام:”أنا ماعرفش والله يا سيف لأن الموديل ده ماتعملش قبل كده في نادي الزمالك وماتعملش في مصر أساساً خالص، يمكن النادي الأهلي اللي عملوه لسه عاملين قريب برضه”.
ترشح مين لشركة الكره؟ أنت واحد دلوقتي من أساطير نادي الزمالك؟، أكد امام:” ما هي بص يا سيف موضوع شركة الكورة ده هل هي شركة كورة بجد؟ يعني هل هتجيب فلوس؟ هل هتدخل فلوس؟ هل هيبقى الهدف منها إن أنت تعمل تجيب فلوس منها ولا إن هو تعمل شركة وخلاص مجرد إن أنت عملت شركة بس؟ لأ هتكسب منها، يعني اللي هيدير ده هم جايبينه عشان يبقى هو المتحكم في كل حاجة في الكورة في شركة الكورة بتاعة الزمالك؟ ولا هيبقى تحت قيادة مثلاً رئيس مجلس إدارة نادي الزمالك؟”.
وواصل:” أنا ماعرفش هم بيفكروا إزاي لأن أساس الموضوع هم مجلس الإدارة هم اللي هيحددوا هم عايزين إيه، لأن أنت عارف إن القانون اتغير في الفترة اللي فاتت دي بقى دلوقتي مديك تسويق إن 51% للمستثمر و49% للنادي بس لازم يبقى في موافقة جمعية عمومية ووزارة الشباب والرياضة”
و أردف إمام:” فأنا ماعرفش هما إيه نظامهم، هل هم عايزين حد من المجلس يبقى هو اللي بيدير ولا هم هيجيبوا حد وهم ما يديروش؟ أنا ماعرفش هما دماغهم فيها إيه” .
وعاد سيف زاهر وسأله: “طيب عايز آخد رأيك في حاجة تانية، بتشوف إن لو في شركة كورة أو في منظومة زي كده بتضم حازم إمام، بتضم ميدو، بتضم أيمن عباس، بتضم أمير مرتضى منصور.. بتشوف إن الخلطة دي تكون لصالح الزمالك؟
ليرد إمام: الخلطة دي جماهيرياً حلوة جداً بس أنا على شغل الورق لما يجي بقى شركة بجد أنا ماعرفش أنا إيه الدور بتاعي هيبقى فيها، ماعرفش دور مثلاً أمير هيبقى إيه.. لازم حد يبقى هو يمشي الدنيا أو يقول لنا إيه الدنيا هتبقى ماشية إزاي، لكن الأسامي اللي أنت قلتها دي كلها ناس جامدة وناس خبرات كبيرة الحقيقة وأدوا الزمالك كتير، فطبعاً”.
وزاد:” بس هي شركة الكورة دي محتاجة بقول لك بس تبقى عارف راسك من رجلك الأول، أنت هتعمل إيه؟ وهتمسك إيه بالظبط؟ وهتدير إيه بالظبط؟ أنت ماسك ملف الكورة والبث الفضائي والتذاكر وكل ما يخص كرة القدم ولا هتاخد.. فده مجلس الإدارة هو اللي يحدده لما يجي يعمل الشركة دي، لأن الموضوع هو مش موضوع إن أنا همسك حاجة أو ناس تمسك شركة وفي الآخر مثلاً يبقى مجلس الإدارة هو المسؤول فهي تبقى هي تقريباً.. فهو ده يُسأل فيه كابتن حسين والمجلس هم دماغهم فيها إيه”.
بشأن:” دور الأستاذ ممدوح عباس دور كبير جداً لنادي الزمالك مفيش حد يقدر يغفله، ولكن الجمهور دايماً بيتساءل سؤال: الأرقام اللي الأستاذ ممدوح بيحطها دي هل في يوم من الأيام هيجي حد مجلس إدارة هتبقى الأرقام دي مديونية على نادي الزمالك؟ ولا الأرقام دي”. أكد إمام:” لا مش مديونيات ماعرفش، بس عايز أبص أقول لك بشكل عام بغض النظر أي حد، مثلاً بشوف كابتن حسين السيد بيحط فلوس مثلاً أو هشام نصر أو طبعاً.. بس الفلوس دي بتتحط”.
و أستانف:” أي حد بيحط فلوس مجرد إن هو عايز يساعد كتر خيره، ده بيطلع من بيته عشان نادي الزمالك فكتر خيره بغض النظر بقى هياخدهم مش هياخدهم هو بيحل لك مشكلة، لكن أنا ماعرفش بقى هو هياخدهم ولا لا الله أعلم، بس مش ممكن هياخد الفلوس دي كلها يا أستاذ ممدوح أكيد يعني، ما شاء الله دافع فلوس كتيرة جداً السنة دي والسنة اللي فاتت فـ ماعرفش طبعاً فيُسأل هو فيها هو وأيمن”.
وأختتم:” لكن بغض النظر هو يعني أنت لو حد قال لك هات لي فلوس عشان أنا مزنوق وأديته وقلت له خير ما هو طبعاً في جميع الأحوال كتر خيره، فكرة الكورة أو فكرة إن أنت مش هتقعد تعيش على حد يدفعلك فلوس على طول يعني كتر خيره بس هو هيقعد لغاية إمتى؟ أكيد عامل زي الثقب الأسود اللي هو بتحط حاجات بتروح في ثانية، لازم يبقى في حل جذري للموضوع ده. آه الزمالك نادي كبير جداً ومحبينه كتير لكن هو مثلاً الوحيد اللي بيدفع كتير هو الأستاذ ممدوح طبعاً، فلازم توجد بدايل وتشوف الدنيا هتمشي إزاي يعني كتر خيره ألف خيره فعلاً على اللي بيعمله بصراحة، بيعمل كتير أوي أوي وفي حاجات كمان الناس ما تعرفهاش بس أنت تشوف حل إن هو مش هتقعد تعيش على إن أستاذ ممدوح هو بس اللي بيدي فلوس، لازم توجد أنت حلول لهذا الموضوع”.
