أشاد حسام المندوة، أمين صندوق الزمالك، بلاعبي الفريق الاول لكرة القدم بالنادي ومعتمد جمال المدير الفني، وذلك عقب الفوز أمام بيراميدز، ضمن منافسات بطولة الدوري المصري الممتاز.
وفاز فريق الزمالك على بيراميدز بهدف دون رد في المباراة التي أقيمت بينهما على ستاد الدفاع الجوي في إطار مباريات الجولة العشرين لمسابقة الدوري الممتاز، ليرفع الزمالك رصيده إلى 40 نقطة وينفرد بصدارة المسابقة
وقال المندوه، خلال مداخلة هاتفية ببرنامج “ملعب أون”،عبر قناة “أون سبورت”:” والله ربنا يحفظ اللعيبة ولاد الأصول دول، وكابتن معتمد والجمهور العظيم ده. يعني حقيقةً كل مكونات المعادلة موجودة النهارده سعياً وراء أمل بقى خلاص بدأ يعني يكون موجود بقوة في قلوب الزملكاوية”.
و أضاف:” إن شاء الله كده نقدر نعمل حاجة مفاجأة للجمهور الموسم ده. فالنهارده يعني ماتش بشكل مختلف ومكسب في حقيقة الأمر بشكل مختلف”.
و أجاب المندوة ردا على سؤال الإعلامي سيف زاهر: يعني إزاي الزمالك بيؤدي بالروح دي في عز المشاكل والأزمات دي؟ إزاي جمهور الزمالك مساند بالشكل القوي ده في عز الظروف دي؟ إزاي الزمالك بيعمل الفوز السابع على التوالي بكورة ممتعة وحلوة؟ المعادلة دي إزاي بدون صفقات، بدون فتح قيد، بدون وجود أي شيء؟ إيه كلمة السر يعني؟:” كلمة السر الزمالك، التاريخ، الجمهور، الروح اللي بتدب مرة واحدة في اللعيبة. يعني شوف النهارده عبد الله مش عايز يخرج، عاوز يكمل لغاية آخر ثانية في الماتش”.
وأكمل: “شوف اللعيبة عاملة إزاي النهارده، شوف الفرص اللي ضاعت قد إيه، شوف الجمهور النهارده اللي جه برغم إن كنا متوقعين الجمهور ميبقاش موجود النهارده بشكل كبير، لكن شوف النهارده الشكل عامل إزاي”.
وشدد المندوة:” هي حالة وكل ماسك فيها، وإن شاء الله الحالة دي تستمر. وقاعدين ماشيين في سكة مابنلتفتش فيها لا يمين ولا شمال، ومعتمد مركز ما شاء الله مع فرقته، فحاجة عظيمة جداً”.
وأشار: “أنا في حقيقة الأمر بحيي الجمهور وبحيي اللعيبة وبحيي المدير الفني ابن نادي الزمالك معتمد جمال، وبحيي جون إدوارد برضه على تركيزه الفترة دي، عشان بما نملك وبما نواجه من تحديات بنقدر نعمل الكلام ده. لا، يعني دول بأمانة أبطال عظماء.”.
ووجه الإعلامي سيف زاهر سؤال هام :” أنا سمعت النهارده إن في مكافأة فورية إدارة الكورة صرفتها بعد المباراة، يعني في حالياً بيترتب لمكافأة؟”
ليرد المندوه: “لا في مكافأة بتترتب دلوقتي وإن شاء الله يتم صرف المكافأة قريب جداً للأبطال دول”.
وعاد سيف زاهر وقال:” لا، أنا المعلومة اللي عندي إن إدارة الكورة دلوقتي حالاً صرفت مكافأة فورية، ده غير المكافأة بتاع حضرتك، المكافأة بقى التانية اللي هتتصرف؟”.
ليجيب المندوه: “يعني في حاجة كويسة هتطلع للعيبة إن شاء الله، النهارده الكل متحمس ففي حاجة كويسة جداً غير بقى المكافأة اللي بتتكلم عليها، في مكافأة إن شاء الله هتطلع للعيبة بشكل محترم”.
ووجه سيف زاهر سؤال جديد : عايز أسأل حضرتك سؤال شخصي كده، الانتصارات اللي عاملها الزمالك في عز الظروف دي والأداء الرائع ده مايخليش محبي نادي الزمالك يبتدوا يتلموا شوية حوالين الفريق ويتجمعوا شوية ويبقوا إيد بإيد مع حضراتكم؟
ويجيب المندوه:” لا بس كابتن سيف احنا على فكرة على طول محبي نادي الزمالك موجودين، بس هو الانتصارات دي بتزيد الحماس عندهم”.
و أردف المندوة التواجد المادي الفعال؟” آه طبعاً وده بيحصل على فكرة، يعني في موجودين محبين، الأستاذ ممدوح موجود وطبعاً معانا برضه المهندس هاني برزي موجود في الأمور دي، والكابتن حسين السيد والكابتن هشام ومجموعة، حقيقة الأمر المكسب بيعلي المعنويات عند الجميع، فلا هم مستعدين جداً ويمكن النهارده بعد الماتش اتكلمنا مع بعض كلنا وفي حاجة كويسة بتتجهز للفرقة”.
وأختتم: “أتمنى كده برضه الماتش اللي جاي إن شاء الله نكون برضه كسبانين ونعمل مداخلة مع بعض وتبارك لي فيه إن شاء الله”.
شاهد:
