كشف حسام المندوة، أمين صندوق الزمالك، سر بكانتصارات الفريق المتتالية،وذلك عقب الفوز أمام بيراميدز، ضمن منافسات بطولة الدوري المصري الممتاز.
وفاز فريق الزمالك على بيراميدز بهدف دون رد في المباراة التي أقيمت بينهما على ستاد الدفاع الجوي في إطار مباريات الجولة العشرين لمسابقة الدوري الممتاز، ليرفع الزمالك رصيده إلى 40 نقطة وينفرد بصدارة المسابقة
وأضاف المندوه، خلال مداخلة هاتفية ببرنامج “ملعب أون”،عبر قناة “أون سبورت”:” والله ربنا يحفظ اللعيبة ولاد الأصول دول، وكابتن معتمد والجمهور العظيم ده. يعني حقيقةً كل مكونات المعادلة موجودة النهارده سعياً وراء أمل بقى خلاص بدأ يعني يكون موجود بقوة في قلوب الزملكاوية”.
و قال: ” إن شاء الله كده نقدر نعمل حاجة مفاجأة للجمهور الموسم ده. فالنهارده يعني ماتش بشكل مختلف ومكسب في حقيقة الأمر بشكل مختلف”.
ورد المندوة على سؤال الإعلامي سيف زاهر: يعني إزاي الزمالك بيؤدي بالروح دي في عز المشاكل والأزمات دي؟ إزاي جمهور الزمالك مساند بالشكل القوي ده في عز الظروف دي؟ إزاي الزمالك بيعمل الفوز السابع على التوالي بكورة ممتعة وحلوة؟ المعادلة دي إزاي بدون صفقات، بدون فتح قيد، بدون وجود أي شيء؟ إيه كلمة السر يعني؟:” كلمة السر الزمالك، التاريخ، الجمهور، الروح اللي بتدب مرة واحدة في اللعيبة. يعني شوف النهارده عبد الله مش عايز يخرج، عاوز يكمل لغاية آخر ثانية في الماتش”.
وواصل: “شوف اللعيبة عاملة إزاي النهارده، شوف الفرص اللي ضاعت قد إيه، شوف الجمهور النهارده اللي جه برغم إن كنا متوقعين الجمهور ميبقاش موجود النهارده بشكل كبير، لكن شوف النهارده الشكل عامل إزاي”.
و أشار المندوة:” هي حالة وكل ماسك فيها، وإن شاء الله الحالة دي تستمر. وقاعدين ماشيين في سكة مابنلتفتش فيها لا يمين ولا شمال، ومعتمد مركز ما شاء الله مع فرقته، فحاجة عظيمة جداً”.
وشدد : “أنا في حقيقة الأمر بحيي الجمهور وبحيي اللعيبة وبحيي المدير الفني ابن نادي الزمالك معتمد جمال، وبحيي جون إدوارد برضه على تركيزه الفترة دي، عشان بما نملك وبما نواجه من تحديات بنقدر نعمل الكلام ده. لا، يعني دول بأمانة أبطال عظماء.”.
ووجه الإعلامي سيف زاهر سؤال هام :” أنا سمعت النهارده إن في مكافأة فورية إدارة الكورة صرفتها بعد المباراة، يعني في حالياً بيترتب لمكافأة؟”
ليجيب المندوه: “لا في مكافأة بتترتب دلوقتي وإن شاء الله يتم صرف المكافأة قريب جداً للأبطال دول”.
ومن جانبه قال سيف زاهر:” لا، أنا المعلومة اللي عندي إن إدارة الكورة دلوقتي حالاً صرفت مكافأة فورية، ده غير المكافأة بتاع حضرتك، المكافأة بقى التانية اللي هتتصرف؟”.
ليرد المندوه: “يعني في حاجة كويسة هتطلع للعيبة إن شاء الله، النهارده الكل متحمس ففي حاجة كويسة جداً غير بقى المكافأة اللي بتتكلم عليها، في مكافأة إن شاء الله هتطلع للعيبة بشكل محترم”.
ومجددا سيف زاهر: عايز أسأل حضرتك سؤال شخصي كده، الانتصارات اللي عاملها الزمالك في عز الظروف دي والأداء الرائع ده مايخليش محبي نادي الزمالك يبتدوا يتلموا شوية حوالين الفريق ويتجمعوا شوية ويبقوا إيد بإيد مع حضراتكم؟
و أجاب المندوه:” لا بس كابتن سيف احنا على فكرة على طول محبي نادي الزمالك موجودين، بس هو الانتصارات دي بتزيد الحماس عندهم”.
و زاد: “التواجد المادي الفعال؟” آه طبعاً وده بيحصل على فكرة، يعني في موجودين محبين، الأستاذ ممدوح موجود وطبعاً معانا برضه المهندس هاني برزي موجود في الأمور دي، والكابتن حسين السيد والكابتن هشام ومجموعة، حقيقة الأمر المكسب بيعلي المعنويات عند الجميع، فلا هم مستعدين جداً ويمكن النهارده بعد الماتش اتكلمنا مع بعض كلنا وفي حاجة كويسة بتتجهز للفرقة”.
وأتم: “أتمنى كده برضه الماتش اللي جاي إن شاء الله نكون برضه كسبانين ونعمل مداخلة مع بعض وتبارك لي فيه إن شاء الله”.
شاهد:
