في كواليس مدوية كشف عنها الإعلامي أحمد شوبير، فجّر البلجيكي ييس توروب، المدير الفني للنادي الأهلي، بركانًا من الغضب داخل جدران الاحمر، بعد جلسة عاصفة جمعته مع ياسين منصور وسيد عبد الحفيظ، كشفت عن حجم الفجوة والصراع المكتوم بين الجهاز الفني والإدارة.
وقال شوبير،خلال تصريحات تليفزيونية عبر برنامج “الناظر” على قناة “النهار”:”تعالى بقى عشان أقولك النهارده كان فيه لقاء جمع ما بين ياسين منصور وكابتن سيد عبد الحفيظ مع ييس توروب ومع وليد صلاح. الكلام مشي بالشكل التالي: أول حاجة قالوا له إحنا مدعمينك جداً حتى نهاية الموسم”
و أضاف:” توروب قال : الأكتر من تدعيمي هو المساندة للفريق، والمساندة هي إن حضرتك من فضلك متخليش الفريق على المشاع،، مخليش كل حد بيطلع يخبط في النادي وفي الفريق، ده مش لصالح الفريق على الإطلاق، فاحمي الفرقة واحمي اللعيبة”.
وتابع شوبير:” وقال إن الأخبار اللي بتطلع دي مش من أوضة اللبس ولا من عنده، ولازم يتعمل عليها كنترول كويس عشان يبقى فيه نجاحات، وقالهم: أنا مدرب محترف ومكمل معاكم زي ما أنتم عايزين، لكن أهم حاجة تحموا الفرقة”.
وشدد:” ومن أهم أساليب حماية الفريق، إن اللعيبة بتتفاجأ بخصومات من الصحافة والإعلام، قالهم: ده أمر عجيب، أنا مدير فني وفوجئت إن كان فيه خصومات للعيبة إحنا ما نعرفش إزاي؟”.
وواصل شوبير: “قال أي خصم أو جزاء لازم يكون من خلالي أنا، تيجي ليا وتقول ليا وأنا أقول لك آه ولا لأ، لأني عايز أسيطر على الفريق، مش عايز حد من اللعيبة يبقى عنده نفسية غاضبة”.
و اردف:” وقال إننا نتفق كإدارة فنية وإدارة نادي على إيه هو العقاب الأمثل عشان ننجح الفتره القادمة”.
و أشار شوبير: “قال إن الصلاحيات كاملة تبقى ليَّا ولوليد صلاح في فرقة الكورة، وإن اللعيبة محدش هيقدر يخرج على النص ولا على النظام”.
وأختتم:” الراجل محتاج حماية إعلامية تكون موجودة من داخل النادي، وتم وعده من الكابتن سيد عبد الحفيظ بهذا الأمر؛ إنه هيكون فيه حماية قوية خلال الفترة المقبلة”.
