في تصريحات مثيرة للجدل عبر قناة “أون سبورت”، كشف محمود كهربا، لاعب نادي إنبي، عن كواليس استعدادات الفريق البترولي للمواجهة المرتقبة أمام نادي الزمالك، واضعاً حداً للأنباء التي ترددت حول “رفع الضغوط” عن اللاعبين قبل اللقاء الهام.
وخلال مداخلة هاتفية ببرنامج ملعب أون، عبر قناة أون سبورت لكهربا قال له الإعلامي سيف زاهر:” خلي بالك يا كهربا استاذ ايمن الشريعي شال من عليكم الضغط، يعني قال مباراة الزمالك مش مهم براحتكم خلاص، هو حقق التارجت بتاعه واللي جاي مفيهوش مشكلة’.
ليرد أيمن الشريعي رئيس إنبي:” أنا مقولتش كده خالص .. لا مقولتش براحتكم، متقوليش كلام مقلتوش”.
وقال كهربا لاعب إنبي:” يا كابتن سيف، هو دايماً بيشيل علينا الضغط لأنه دايماً في ضهرنا، ويمكن كل الاجتماعات بيجي يقول لنا أنا مع أصغر واحد في الفريق لأكبر واحد وبيدعمنا”.
و أضاف:” فاللعيبة طبعاً والجهاز الفني كله مرتاحين للحتة دي، لكن مش موضوع إنه شال علينا الضغط في الملعب، لأن الملعب ده بتاع الجهاز الفني واللعيبة”.
وشدد كهربا: “وإن شاء الله أنا بقوله دايماً الماتش الجاي بتاع الزمالك كله خير بإذن الله، أنا وزمايلي جاهزين إن شاء الله”.
ليسأله سيف زاهر:”هتبدأ الماتش اللي جاي بتاع الزمالك؟”.
ليجيب كهربا:” والله ده في إيد الكابتن حمزة طبعاً، وأنا والله مبسوط إني في إنبي وإن شاء الله لسه عند وعدي إننا هنكون في السبعة (المربع الذهبي أو مراكز المقدمة) بإذنك يا رب، ولسه قدامنا كأس مصر وكأس الرابطة واللعيبة كلها جاهزة بإذن الله”.
