شنّ محمد عبد الوهاب، عضو مجلس إدارة النادي الأهلي السابق، هجوماً عنيفاً وغير مسبوق على حالة الترهل التي يعيشها الفريق الأول لكرة القدم بالأحمر، مؤكداً أن “روح الفانلة الحمراء” التي كانت تميز الفريق عبر الأجيال قد تلاشت في الفترة الأخيرة.
وفي تصريحات نارية لبرنامج “النجوم في رمضان” عبر إذاعة الشباب والرياضة، قال عبد الوهاب:” الكورة مكسب وخسارة وده طبيعي، لكن اللي أنا شايفه مش من ماتش امبارح بس، من فترة وأنا بتابع الفريق، بسأل نفسي فين الأهلي؟ فين الروح؟ فين الفريق اللي كنا دايمًا نقول عليه إن الفانلة بتاعته تقيلة ومش أي حد يلبسها؟ أنا بصراحة مش حاسس بالروح بتاعة الأهلي خالص”.
وتابع:” إحنا عدّت علينا فترات صعبة قبل كده، وأنا لما كنت في المجلس من سنة 2000 لـ2004 كان في لعيبة كتير بتعتزل وكنا بنبني فريق جديد وما أخدناش الدوري وقتها، لكن كان في روح، كان كل واحد بيشتغل وبيجري وبيحارب عشان النادي”.
وشدد عبد الوهاب:” والله اللي كانوا قاعدين في المدرجات امبارح لو جبت 11 واحد منهم كانوا لعبوا بروح أحسن من اللي شفناه في الملعب”.
وردا على سؤال يعني سبب من أسباب اللي بيحدث دلوقتي داخل النادي الأهلي التفاوت الكبير في المبالغ والصفقات اللي تم إبرامها ومفدتش النادي؟ أكد:’ اه طبعا لأن اللعيبة لما بتاخد كل اللي هي عايزاه خلاص، ممكن يفكر يقول أنا ههين نفسي ليه؟ أتعب نفسي ليه وأموت نفسي في الملعب ليه؟ ما أنا كده كده واخد اللي متفق عليه، والنادي الأهلي لما يقول كلمة خلاص الكلمة ما فيهاش تراجع، فممكن اللاعب يفكر ليه يموت نفسه بقى”.
وواصل:” الناس النهارده بتتكلم عن لاعيبة الزمالك وبتقول إنهم جعانين كورة، جعانين شهرة، جعانين يثبتوا نفسهم، ودي أحسن حاجة في أي فريق، لما تجيب لعيبة جعانة تلعب كورة وجعانة توصل وجعانة تبني اسمها وعندها التزامات وعايزة تنجح، دي اللعيبة اللي تموت نفسها في الملعب وتديك كل حاجة”
و اردف عبد الوهاب:” اللي مزعلني وقاهرني إن نادي الزمالك صدّر مشاكله للنادي الأهلي، زمان كنا دايمًا نسمع إن المشاكل دي بتحصل جوه أوضة لبس الزمالك، لكن دلوقتي بقت موجودة جوه النادي الأهلي وده شيء عمره ما كان يحصل”.
وأكمل:” أنا عندي 65 أو 66 سنة ومتربي في النادي الأهلي، وعمري ما شوفت اللي بيحصل دلوقتي من بعض اللعيبة”.
ومن جانبها سألته الإعلامية نجلاء حلمي:” بتقول حاجة قهراني وحاجة تعباني قوي، اللي كان بيحصل داخل نادي الزمالك في أوضة اللبس بنلاقيه دلوقتي في الجزيرة؟
ليجيب عبدالوهاب:” زمان كانوا بييجوا يتعلموا من الأهلي يعني إيه استقرار وإزاي الدنيا تبقى هادية جوه النادي حتى لو في مشاكل، طول عمر الأهلي عنده مشاكل زي أي نادي، لكن كنا بنحلها جوه النادي ومحدش بره كان يعرف حاجة”.
وأختتم: “دلوقتي بقى أي حد ماشي في الشارع عارف إيه اللي بيحصل جوه الفريق، عارف إن في لاعب بياخد أكتر من لاعب، وده زعلان وده عايز يمشي، والأسوأ إن أول ما لاعب يمشي يقعد يتكلم عن النادي، وده عمره ما كان بيحصل قبل كده في الأهلي”.
