أبدى محمد عبد الوهاب، عضو مجلس إدارة النادي الأهلي الأسبق، استياءه من وجود إمام عاشور لاعب الاحمر، بين صفوف الفريق، مشددا إنه لن يغفر ما فعله عاشور من إهانه لصالح سليم رئيس النادي الراحل.
وقال عبدالوهاب، خلال تصريحات عبر برنامج “النجوم في رمضان” على “إذاعة الشباب والرياضة”:” كان عندي تحفظ ورفض لصفقة انتقال إمام عاشور للأهلي من البداية “.
و أضاف:” إمام لاعيب جامد لا شك، لاعيب من أحسن لاعيبة في مصر، بس لاعيب كان يبقى كويس قوي لو كان في أي حتة تانية غير النادي الأهلي”.
وشدد عبد الوهاب: “ولكن لو هتعاقد معاه كنت رجعت الحضري والتوأم وإبراهيم سعيد، لأن ما صدر من إمام أنا لن أغفره.. أنا لن أغفر ما صدر”.
وواصل:” إزاي اتعاقد مع لاعب تجاوز ضد صالح سليم رمز النادي، ولحد دلوقتى مش قادر اغفر ليه التصرف ده”.
وردا على سؤال هل وجود إمام في الأهلي صنع الفارق؟ أجاب عبدالوهاب:” لأ ”
و أشار:” مفيش حد في النادي الأهلي بيصنع فارق، مفيش حد.. انسوا إن حد، لا مدرب ولا لاعيب ولا بتاع، النادي الأهلي هيلعب ويكسب ويعمل كل حاجة مفيش حد بيصنع الفرق”.
وأكد عبد الوهاب:” مش هعلق على تصرفاته وقت رحلة تنزانيا ولا العقوبة لأني من الأول رافض الصفقة”.
وبشأن تعامله مع إمام عاشور فترة وجوده في حرس الحدود؟ رد:” لا ما اتعاملتش معاه دايركت، أنا كنت عايز أجيبه بس ما اتعاملتش معاه دايركت”
وأختتم:” وفي الاخر زي ما بقولك النادي الأهلي أي حد هيدرب النادي الأهلي، هيكسب، أي حد هيلعب في نادي الأهلي النادي الأهلي هيكسب.. مش العكس”.
