كشف الإعلامي إبراهيم عبد الجواد، عن موقف رابطة الأندية من طلب الزمالك بتقديم موعد مباراة إنبي ضمن منافسات بطولة الدوري بسبب لقاء أوتوهو في الكونفدرالية.
ويواجه الزمالك أزمة في موعد مباراة إنبي في الدوري، بسبب ارتباط الفريق بالسفر إلى الكونغو للاستعداد لخوض مواجهة فريق أوتوهو في ذهاب ربع نهائي الكونفدرالية الإفريقية.
وقال عبد الجواد،خلال تصريحات تليفزيونية ببرنامج “ملعب أون”، عبر قناة “أون سبورت”: الزمالك عنده ماتش قدام أوتوهو هيبقى يوم 14، كان 15 اتقدم بقى 14، وهو عنده ماتش قدام إنبي في بطولة الدوري يوم 11، فكان الكلام بيتقال إن مسؤولي الزمالك عايزين يقدموا لقاء إنبي يبقى يوم 10. طب إيه اللي حصل؟”.
و. أضاف:” مبدئياً مفيش أي جواب أرسل بشكل رسمي من إدارة الزمالك للجنة المسابقات ورابطة الأندية عشان يتم تعديل لقاء إنبي. اللي حصل محادثات هاتفية، أسفرت المحادثات الهاتفية دي إنه لن يتم تقديم لقاء إنبي. طب ليه؟”.
وتابع عبد الجواد:” لأنه كل الأندية أهلي، زمالك، مصري، بيراميدز لعبوا وفقاً للائحة وما كانش فيه تأجيلات لأي حد. والكلام اللي اتقال لنا يعني من المصادر إنه يا جماعة دي الحاجة اللي كل الأندية كانت طالبت بيها، إن يبقى في نظام ماشي بشكل في سواسية ما بين الأندية كلها ويتم تطبيق هذه القواعد على الأندية كلها بلا استثناء، ما ينفعش لما نيجي نعمل كدة حد يبقى بيشتكي”.
و شدد:” طيب لما رجعنا لهم وقلنا لهم بس حصل تغيير إنه الماتش بتاع الزمالك اتقدم، قال لك هو مبدئياً اللائحة بتقول إن كل الفرق اللي بتشارك في البطولات الأفريقية كونفدرالية أو دوري أبطال أفريقيا عنده تلات أيام، إحنا المعلومة كانت عندنا لو تفتكروا السنة اللي فاتت كانت أربع أيام للأواي (خارج الأرض) وتلاتة للهوم (داخل الأرض)، قال لك لا، دي تمت تعديلها بقت تلات أيام سواء بره مصر أو جوه مصر”.
وواصل عبد الجواد: “غير كدة كمان، الزمالك نفسه والأهلي نفسه وبيراميدز والمصري لعبوا طبقاً لهذه اللائحة بعد تلات أيام، يعني لعبوا لقاءات في أفريقيا بعد تلات أيام من لقاءات في بطولة الدوري أو لقاءات محلية”.
واردف:” الحاجة التالتة كمان بقى اللي اتكلموا عنها هي إنه هنا في طرف لازم نحطه في الاعتبار وهو إنبي، لأن إنبي عنده ماتش يوم 7 مارس، فما ينفعش يوم 7 ويلعب يوم 10 إلا في حالة وحيدة، لو هو خلاص إنبي قابل ده، يعني قابل إنه يلعب بعد تلات أيام ماتش في بطولة الدوري قدام الزمالك. فعشان كدة كانت القصة إنه يبقى في موافقة من إنبي على تقديم هذا اللقاء”.
وأختتم: “لكن إحنا بدورنا كلجنة مسابقات مش هنغير أي حاجة، مش هنعدل أي حاجة في نظام اتحط هيمشي على الناس كلها، إحنا عايزين نكمل بالقصة دي عشان تبقى ده هيبقى ده مكتسب مهم جداً طبعاً أو يبقى يضاف إلى ويضم إلى المكتسبات اللي اتحققت على مدار السنين اللي فاتت عشان يبقى في مسابقة منتظمة فيها قواعد بتطبق على الجميع”.
