”المدرب الصنم” والـ 43%.. ميدو يكشف سر الكارثة التي تهدد عرش توروب بعد تعادل الأهلي مع سيراميكا!
شنّ النجم أحمد حسام “ميدو” هجوماً عنيفاً على أداء الفريق الأول لكرة القدم بالنادي الأهلي عقب تعادله المخيب أمام سيراميكا كليوباترا، مؤكداً أن الفريق ظهر بلا هوية فنية واضحة، وأن النتيجة كانت انعكاساً طبيعياً لغياب الروح والابتكار داخل الملعب
وقال ميدو، خلال تصريحات تليفزيونية ببرنامج “أوضة اللبس”، عبر قناة “النهار”:” التعادل بين سيراميكا والاهلي واكيد حضراتكم عاوزين تسمعوا رأينا في المباراة، ماتش كنا متوقعين يكون افضل فنيا واهداف المدربين كانت واضحه علي ماهر لعب بتحفظ دفاعي كبير”.
و اضاف: “لو هنتكلم فنيا الاهلي وحش وميستحقش يكسب،، الاهلي ريتمه قليل واللعيبه مش متمرنين على جمل فنيه لكسر الدفاعات، زيزو و تريزيجيه مسلمين نفسهم، ومفيش اي افكار بلعمري وهاني بيستلموا في نصف ملعب الاهلي لو هتسال اي مدرب بيلاعب الاهلي عن اسلوب الاهلي هيقولك اتمنى يلعبوا بهذا الشكل”.
وشدد ميدو:” الاهلي عنده مشكله كبيرة، وثنائي نصف الملعب ليس لديهم ابتكار ديانج ومروان ثنائي متشابه جدا، الاهلي بيمتلك مدرب توروب مع كل الاحترام له اعتقد اي مدرب مصري من ابناء الاهلي هيكون عنده افكار هجوميه افضل من توروب”.
وواصل:”توروب فاز في 9 مباريات بنسبة 43٪ وده رقم قليل وصعب تحتفظ بمدرب نسبه فوزه 43٪ بعد 37 مباراة وهذا رقم كافي للانسجام واخد بطوله امام الزمالك بدايه الموسم واخد دفعه كبيره وقتها “.
و أشار ميدو:” انا قولتلكم ان توروب مدرب فلات، وقفته واحده في المكسب والخسارة والتعادل واي حال للفريق، ولازم المدرب يكون له رد فعل على الخط، والناس بتعيب على مدرب بيراميدز انفعالاته بس اللاعب المصري طبيعته كده انه لازم تلومه وان المدرب صوته في ودنه”.
وأكمل: “مع احترامي لتوروب ومش بحكم عليه من ماتش، الاهلي ريتمه بطئ ومفيش افكار هجوميه ولا كثافه، الجمهور مقصرش والناس راحت باعداد كبيره وعارفين انهم لازم يكونوا يدعموا، ولكن رد فعل اللعيبه ميقولكش انهم بينافسوا على الدوري وان ده ماتش مصيري، مصيري لانه لازم الاهلي يببدأ بمكسب”.
و زاد ميدو:” ممكن متكونش في افضل حالاتك ولكن يبقي في روح وقتال، المدرب،و اللعيبه مش على قدر طموح واحلام جمهور الاهلي، مين في الاهلي ممكن يصنع الفارق؟ ولا لاعب، زيزو لعبه صريح بريتم واحد وكذلك تريزيجيه، المرة الوحيده اللي لعب زيزو الكره في المساحه طلع نفسه اوفسايد ومفيش انسجام بين اللعيبه في الهجوم”.
وأختتم: “الاهلي مش خطر علشان الاسباب دي، واحده من الحاجات لازم يلام عليها توروب انه اتفاجئ بطربقة لعب علي ماهر، اعتقد توروب قعد ربع ساعه يشوف هيعمل ايه وده مينفعش مع فريق كبير”.
