يبدو أن “الفيلم المحفوظ” قد بدأ عرضه هذا الموسم، فما إن تعثر الأهلي أمام سيراميكا كليوباترا، حتى خرج سيد عبد الحفيظ في ثوبه الجديد كـ “عضو مجلس إدارة ومشرف على الكرة”، ليعيد للأذهان نغمة الضغط على الحكام التي غابت لفترة.
وقال عبد الحفيظ، خلال مداخلة هاتفية ببرنامج الكورة مع فايق، عبر قناة” mbc مصر 2″، ردا على سؤال خليني أعرف رأيك إيه في اللي حصل النهارده؟ رأيك إيه في اللغط التحكيمي في الكورة اللي كان من المفترض يحتسبها الحكم ضربة جزاء ثم لما راح للفار لم يحتسبها؟”: “بص، في الأمتار الأخيرة، حتة التحليلات الفنية أو الأرقام ده أمر ممكن يبقى مقبول في الاستوديوهات، لكن في القرارات والتاريخ والنتائج والبطولات خلاص محدش بيفتكر حاجة”.
و تابع:” ممكن نبقى أوحش فرقة في العالم يا سيدي، لكن عندي ضربة جزاء أو حقوق لازم آخدها. اللي حصل النهارده تحديدًا دي حاجة ما أعتقدش إن فيه حَكم في العالم، مهما كان من المانيا ولا من جزر ولا من أي بلد، هيقول على ضربة الجزاء دي مش ضربة جزاء. مفيش واحد في العالم هيقول إنها مش ضربة جزاء غير محمود أبو الوفا”.
وواصل عبد الحفيظ: “أنا ماعرفش هو كان بيذاكر إيه في القانون؟ وماعرفش هو مقرر علينا ولا لأ؟ في الدور الأول هو اللي حكّم ماتش الأهلي وسيراميكا والنهارده هو اللي حكّم، أنا مش فاهم الاختيار مبني على إيه؟”
و أشار: “”الاختيارات نفسها يا إبراهيم فيها شبهة. المنطق اللي بتجيب بيه، إيه القدرات اللي عملها الراجل عشان تديله مباراة ما بين فرقتين بينافسوا ورا بعض في الجدول؟ أنا من حقي أعرف الحوار اللي دار ما بين محمود عاشور وما بين محمود أبو الوفا، لازم نسمعه كلنا”.
وشدد عبد الحفيظ:” القانون بيقول المسافة بعيدة والإيد مفرودة، ما فيهاش شك. أقسم بالله أول ما راح وقعد نص دقيقة يتفرج عليها ورجع طرد واحد من الجهاز الفني، كنت متأكد إنه مش هيحسبها.”
وتدخل إبراهيم فايق: “ليه يا كابتن سيد؟”
ليرد عبد الحفيظ: “دي جينات في الحكام المصرية، قال يعني كده هو مسيطر جامد جداً. كمية إنذارات وكمية طرد، الحكم بيتخيل إنه محمي بالكروت. لازم يتعمل تحقيق في اتحاد الكورة إزاي حَكم يزق لعيب؟ ده لازم يتعمل فيه تحقيق. أنا ما شفتش في حياتي حكم بيعتدي على لعيبة، دايماً اللعيبة هي اللي بتعتدي على الحكم، لكن حكم بيستخدم إيده وبيزق! هو متخيل إن الكروت دي هي اللي هتحميه.”
وعاد إبراهيم فايق وسأله: “هل هناك تحركات رسمية أو خطابات بفتح تحقيق؟”
ليجيب عبد الحفيظ: “من بكره، لازم يبقى فيه وقفة ووقفة كبيرة جداً. لما فيه حكم بيحكم لفرقة وما بيديهاش جزء من قرارات صحيحة، المفروض ما بتشوفوش تاني لمدة سنتين. إحنا هنطالب بحقنا في التجاوز اللي حصل ضد اللعيبة واستخدام الإيد والزق، وفي كلام صدر فيه تجاوز في حق حسين الشحات والشناوي، محتاجين نعرف إزاي الكلام ده يصدر من حكم؟”
وزاد عبد الحفيظ:” موقف اتحاد الكرة غريب جدا مع الأهلي وآخرها فما حدث أمام الترجي التونسي وغياب الجمهور، سنطالب بالتحقيق مع حكام المباراة لمعرفة الحوار الذي دار بين الحكم وحكم الفيديو والتجاوز من الحكام ضد اللاعبين، والحديث الذي به تجاوز ضد الشحات ومعرفة معايير اختيار الحكام في المباريات”..
وعن هيكلة الفريق) أكد : “إحنا بنعمل إعادة هيكلة للفريق في النادي، وإن شاء الرحمن تبقى حاجة كويسة للفترة اللي جاية تناسب اسم الأهلي وعراقته. في نتيحة أي لقاء، الحَكم عامل مهم. وبقولك الدوري لسه في الملعب، بس أتمنى ما يجيلناش محمود أبو الوفا لفترة طويلة. اللي بيشتري الأهلي بيشتريه بجدعنة ورجولة وشهامة وإنكار ذات، دي المواصفات والمعايير.”
