شن الكابتن محمد بركات، نجم النادي الأهلي ومنتخب مصر السابق، هجوماً حاداً على الأداء التحكيمي والفني عقب تعادل المارد الأحمر مع سيراميكا كليوباترا، مؤكداً أن الفريق تعرض لظلم واضح في لقطة ركلة الجزاء المتأخرة.
وقال بركات،خلال تصريحات تليفزيونية ببرنامج “الكورة مع فايق”،عبر قناة “mbc مصر 2″ : إيه اللي حصل؟ هل كنت متخيل النتيجة؟ لا بصراحة، أنا توقعت إن النادي الأهلي هيكسب، توقعت إن اللعيبة بتوعنا بتوع منتخب مصر هيفرق معاهم المعسكر الأخير، توقعت إن الدنيا هتمشي زي الست مباريات اللي فاتت بتاعة السنة اللي فاتت اللي قدرنا نجيب منها 18 بونط”.
و أضاف:” كان عندي كابتن عماد النحاس إمبارح، ولكن إحنا عندنا مشكلة يا إبراهيم بقالنا فترة، مشكلة إن إحنا في أوقات كتير بتبقى ماسك الكورة بتضغط بتروح ولكن يمكن أنا كنت سامعك في الإنترو بتتكلم في حتة الناحية الفاعلية الهجومية إن أنت آه بتروح وبيبقى عندك يمين وشمال وبتحاول من النص هو في زحمة بس ما فيش إنتاج، بس ما فيش تطلع في الآخر تقول الأهلي ضيع إيه خطير في ماتشات كتير ما تلاقيش”.
وأشار بركات:” فأنا توقعت النهاردة إن إحنا نكسب، النهاردة صعبناها على نفسنا بشكل كبير. الزمالك لو كسب بيراميدز الأسبوع دوت عنده فرصة كبيرة يوسع الفرق، ولكن القرارات الغلط اللي بتطلع من حكم بتبقى قرار غلط، والنهاردة غلطة كلفتني بتبعدني بشكل كبير عن الدوري”.
وردا على سؤال: “رأيك إنه الأهلي كان له ضربة جزاء؟” ده موضوع خلصانة يا إبراهيم، كل شروط ضربة الجزاء موجودة إن الكورة دي لازم تتحسب، وبعدين الحكم حتى عداها، ولكن أما حكم الفار محمود عاشور وعنده خبرة كبيرة يقول له تعالى شوفها ويروح يشوفها، الكورة لحد آخر لحظة وتريزيجيه بيعملها كانت إيده بره جسمه، دي وجهة نظري ووجهة نظر كل الناس، الكورة ضربة جزاء كانت تتحسب لي في الوقت الضايع أكسب الماتش”.
وواصل بركات: النهاردة نجوم الماتش مين يا إبراهيم؟ سعد سمير ورجب نبيل، 37 سنة و33 سنة، وما جريوش الجري اللي كان بيجريه اللعيبة النهاردة في الملعب بتاعك”.
و تابع: “أنا لا أفقد الثقة في النادي الأهلي أبداً، حتى لو الفرق 5 بونت، الأهلي يقدر يكسب الزمالك وبيراميدز، ومستني الهدايا من الفرق التانية. وإن شاء الله جمهورنا هيفضل في ظهر الفريق، والناس اللي كانت زعلانه الأسبوع اللي فات هتحضر وتشجع في الماتشات الحاسمة.”
بشأن أداء لاعبي الأهلي وقراراتهم زاد : “الأداء مش هو ده، وفي قرارات غلط في الملعب ولعيبة مضغوطة. شفت باصات غريبة النهاردة بتتحط في المدرج! لازم اللعيب يتعامل مع كل هجمة وكل أوفر كأنه الأخير مش يرفع وخلاص وهو مش كاشف الملعب.”
وأكد بركات: “صفقات الأهلي ومحمد عبد الله؟: “محمد عبد الله ده لو في الأهلي دلوقتي كان لعب والناس اللي بتلعب تقعد تتفرج عليه! ده يكسبك ماتشات لوحده ومستقبلاً يتباع بمبلغ أكبر من وسام أبو علي بكتير”.
و استأنف:” الأهلي عمال يجيب صفقات غالية وما بتديش مردود.، الموضوع غريب، لعيبة المنتخب كانت بتأدي بشكل والآن مع الأهلي بشكل تاني خالص. أنا خايف يكون التفكير في المنتخب بس عشان كأس عالم، ودي تبقى كارثة لو اللعيب مش بيدي ناديه نفس المجهود.”
وأكمل بركات: “الزمالك هو الوحيد اللي شغال على جبهتين (دوري وأفريقيا)، والماتشات اللي جاية صعبة لأن الفرق العربية اللي هيلاعبها زي اتحاد العاصمة وبلوزداد بعيدة عن المنافسة في دورياتها فالبطولة دي هي اللي هتنقذ موسمهم، بس الزمالك حالته المعنوية حالياً أعلى.”
وأختتم:”سيراميكا فرقة بتلعب كورة، بيلعبوا بثقة في حتت ضيقة وبيطلعوا بالكورة صح، وعيب إننا نقول إن سيراميكا بتلعب كورة والأهلي ما بيعملش زيهم، إحنا عايزين الأهلي بتاعنا اللي بيخلص الماتشات حتى بعد الدقيقة 90.”
