أقل من عرض الأحمر.. تفاصيل توقيع نجم الأهلي لنادي إسباني- فيديو

في مفاجأة مدوية من العيار الثقيل، كشف الإعلامي إبراهيم عبد الجواد عن إسدال الستار رسمياً على واحدة من أطول مسلسلات الانتقالات في الكرة المصرية مؤخراً، معلناً توقيع الدولي المالي أليو ديانج، نجم وسط النادي الأهلي، عقود انتقاله إلى نادي فالنسيا الإسباني في صفقة تاريخية.

وقال عبد الجواد،خلال تصريحات تليفزيونية عبر قناة “أون سبورت”:” قصة أليو ديانج كانت معانا من البداية وقلنا فيها كل حرف وقلنا فيها كل كلمة ومشينا مع حضراتكم فيها من الألف وهنختمها لكم دلوقتي بالياء.”.

وتابع:” ناس كتيرة اجتهدت وكلنا بنجتهد وكلنا بنحاول نعمل اللي نقدر عليه عشان نفيد حضراتكم بالمعلومة الصحيحة، وإحنا دائماً وأبداً زي ما السبق بيبقى مهم بس الأهم من السبق هو إن إحنا نقول معلومة دقيقة وحقيقية”.
​
وشدد عبد الجواد:” بداية القصة كانت إنه أليو ديانج جاله عرض من فالنسيا، فقلنا لحضراتكم الكلام ده وقلنا لحضراتكم قبليها إيه اللي حصل في المفاوضات بتاعته مع النادي الأهلي، والعرض كان كام وهو كان طالب كام والأهلي عرض عليه كام، وبعد كده الدنيا وقفت فين”.

وواصل:” وبعد كده فالنسيا دخل على الخط وفالنسيا كان عايز يخلص القصة في يناير اللي فات بـ 500 ألف يورو والأهلي رفض ووقفت القصة عند كده. وتابعنا مع حضراتكم إنه في حال ما إنه فالنسيا هيبقى عايز الراجل (أليو ديانج) في الصيف”.

وأكمل عبد الجواد:” فأليو ديانج موجود في إسبانيا حتى لو عُرض عليه أرقام أعلى من الأهلي أو من أندية خليجية، وقلنا لحضراتكم برضه إنه في حالة إنه عرض فالنسيا أو أي عرض أوروبي لم يكتمل، فأليو ديانج باقي في الأهلي حتى لو عُرض عليه أرقام أعلى وبكتير من دوريات خليجية”.
​
و اردف:” طب إيه اللي حصل؟ اللي حصل إنه بعد ما كان أليو ديانج اتفق مع مسؤولي فالنسيا في يناير اللي فات، بعد خلاص ما اتقفل أمام الأهلي في إنه يسافر في يناير، بعد ما كان اتفق معاهم على خطوط عريضة للانتقال في الصيف، الموضوع رجع بعد كده بقى فيه مشاكل كتيرة وتوقف تماماً. عشان أي حد بيقول لك أصل هو مضى في يناير وأصل هو مضى في مش عارف فين، الكلام ده كله بلح مفيش الكلام ده محصلش أصلاً، القصة كانت وقفت تماماً”.

و اشار عبد الجواد: “طب أزيدك من الشعر بيت، ودي حاجة مفيش حد عارفها خالص وإحنا أول ناس هنقول لكم عليها: ماتش الأهلي والترجي اللي كان هنا، اللي الأهلي خرج فيه من بطولة أفريقيا، كان فيه موفد من نادي أوساسونا -أنا بقول لكم بالاسم أهو من نادي أوساسونا- كان حاضر بيتابع أليو ديانج من أرض الملعب. وكان في مثل هذا التوقيت وفي ذلك التوقيت كان أوساسونا هو الأقرب للحصول على خدمات أليو ديانج، وكان فيه نادي إسباني آخر بس الأقرب واللي كان جدي وبعت الموفد بتاعه والمسؤول بتاعه يحضر ويشوف أليو ديانج من أرض الملعب استكمالاً للقطات والفيديوهات والتفاصيل اللي هم شافوها ليه، ده كان أوساسونا، الكلام ده من مفيش من أسبوعين يعني”.
​
واستانف:” وفي الحالة دي كان فالنسيا واخد خطوة لورا، كانت الاختلافات على أمور مادية؛ هياخد هو كام؟ طب أليو ديانج يسيب إيه؟ طب حاطين بعض الاشتراطات اللي فيها بعض “البواخات” بالنسبة لأليو، فأليو قال لهم لا خلاص أنا مش رايح. وكان في التوقيت ده عنده أكتر من عرض زي ما كنت لسه بقول لكم، أوساسونا كان على رأسهم وكان خلاص هيخلص في أوساسونا”.

وزاد: “مين بقى عرف؟ فـ”سيخن” فالنسيا، فابتدى يرجع الكلام تاني في الأسبوع اللي فات ده، رجع الكلام تاني طب الموضوع طب نيجي عليك شوية طب هات عليك شوية، راحت الدنيا وجت في الأمور المادية لأنهم كقناعة فنية هم مقتنعين بالراجل وهم عايزينه. بس الدنيا راحت وجت ما بين المدير الرياضي لفالنسيا وما بين أليو ديانج وممثليه إلى أن تم توقيع العقد أول أمس”.
​
و استطرد:” العقد اتمضى إمتى؟ العقد اتمضى أول امبارح اللي هو يوم الاثنين اللي فات بالليل، وأي كلام غير كده اعتبره على سبيل “الهتش””.

وأكد عبد الجواد:” تم التوقيع أول أمس وانتقال أليو ديانج إلى فالنسيا الإسباني في صفقة راحت وجت كتير إلى أن تم الانتقال بشكل نهائي وشكل رسمي يوم الاثنين الماضي ليلاً”.
​
وأختتم:” طيب المعلومة اللي برضه مش عند حد: أليو ديانج هياخد كام في فالنسيا والعقد إيه؟ العقد سنتين؛ أول سنة مليون و500 ألف يورو، يزيد 10% في السنة الجاية يبقى مليون و650 ألف يورو. السنة التالتة يجرى تفعيلها بموافقة الطرفين، يعني لو الطرفين وافقوا على تفعيل السنة التالتة يتم تفعيلها بنفس المقابل المادي الخاص بالسنة التانية اللي هو مليون و650 ألف يورو.
​
واتم: “وده اللي بيأكد الكلام اللي إحنا قلناه لحضراتكم قبل كده إن الرقم اللي هياخده أليو ديانج من فالنسيا أقل من اللي كان ممكن ياخده في الأهلي وأقل بكتير من اللي كان ممكن ياخده في الخليج، ولكن اللعيب كان حاطط وجهته الأساسية وهدفه الأساسي هو اللعب في الدوري الأوروبي أو في إحدى الدوريات الأوروبية”.

شاهد: