في أول خروج إعلامي له بعد النتائج المبهرة لمنتخب مصر، فجر الكابتن إبراهيم حسن، مدير المنتخب الوطني، مفاجآت مدوية حول الظروف “المستحيلة” التي سبقت التعادل التاريخي مع الماتادور الإسباني
وقال حسن،خلال مداخلة هاتفية ببرنامج “ملعب أون”،عبر قناة “أون سبورت”:” الحمد لله خطوة مهمة جداً يعني، وأكيد لسه اللي جاي طبعاً، اللي جاي أصعب وأثقل فطبعاً إنك أنت تستعد وتشتغل بشكل كويس دي حاجة كويسة بتدي ثقة، بتدي ثقة للجماهير برضه في منتخب مصر وتبقى ملتفة حوالين المنتخب، بنعرف طبعاً الحاجات اللي ناقصانا والحاجات اللي إحنا وصلنا لها إيه.”.
و أضاف: “وحسام بيوصل للي هو عايزه والحاجة اللي هو إن شاء الله بيشتغل فيها لأن حسام في شغله بيشتغل بيدرس الفرقة اللي قدامه كويس أوي، كل فريق على حدة، وحتة إنك أنت يشتغل على مثلاً على سيستم معين أو تشكيل معين الكلام ده ما بيحصلش يعني عشان برضه في ناس بتفضل بتحاول تجتهد إنما أكيد اجتهادهم مابيبقاش مظبوط يعني لأن حسام شغله غير خالص يعني كل ماتش على حدة وكل فرقة بيدرسها كويس وكل ماتش بيبقى ليها ليه شغل”.
وأكمل حسن:” مباراة منتخب إسبانيا؟، في البداية طبعاً معظم الناس ما تعرفش، كان ظروف الماتشين كانوا صعبين جداً. كان الماتش هيتلعب في قطر، الماتشين هيتلعبوا في قطر، فكانت الدنيا كانت هتبقى سهلة جداً مجرد الساعتين والسعودية هتبقى موجودة في قطر وإسبانيا موجودة في قطر. الدنيا اتغيرت طبعاً عشان الظروف اللي موجودة على الساحة فابتدت العملية تتصعب. الماتش المفروض اتلغى”.
و شدد:”ماتش إسبانيا راح وجيه تلات مرات يعني لحد آخر لحظة لحد قبل المعسكر ما فيش بيوم كان القرار النهائي يعني، يعني إحنا كنا آخر لحظة كان ماتش إسبانيا مش موجود في الحسبان خالص يعني فدي بقى ناس كتير ما تعرفهاش، زائد بقى إنك أنت اتحطيت في ضغط إنك أنت تلعب ماتشين صعبين جداً، الناس مش واخدة بالها إن ماتش إنك تلعب مع السعودية بقالك كتير أوي ما لعبتش مباراة حتى مباراة مع المنتخب السعودي”.
و أردف: “عارف مع السعودية أو المنتخبات العربية بتبقى فيها تراكم وفيها شراسة وفي كل واحد بيبقى عايز يتغلب على عايز يفوز عشان برضه تبقى حتة وخصوصاً قدام منتخب مصر، الحمد لله يعني تاريخ مصر أو تاريخ منتخب مصر الحمد لله كله يعني كله منتخب مصر يتفوق على كل المنتخبات العربية بس كل واحد بيبقى عايز يحقق نتيجة إيجابية قدامنا. فطبعاً كانت الظروف كلها يعني صعبة إنك أنت هتقابل في أربعة أيام، أربعة أيام بالضبط منتخبين وكل ماتش ليه الظروف الصعبة اللي هو المنتخب السعودي زي ما قلت لك، وإنك تلاعب منتخب إسبانيا اللي هو المصنف نمرة واحد على العالم والمرشح بطل لبطولة كأس العالم يبقى بطل ليها يعني، فدي كانت صعوبتها إنك أنت كل اللخبطة اللي حصلت دي زائد إنك أنت لعبت الماتش بتاع السعودية اللعيبة طبعاً ما شاء الله أجادوا وأنا بشكرهم طبعاً لأن اللعيبة رجالة ومحترمين”.
وواصل:”كان المفروض من ضمن البدايل كنا هنلاعب منتخب الأرجنتين وكان في تفاوض كان شبه نهائي يعني بس إحنا كنا لما الدنيا اتلخبطت والمواعيد حصل المشاكل فيها فقلنا حتى إن يجيب المنتخب الأرجنتيني نيجي هنا أو نعرض وعرضنا على منتخب إسبانيا اللي ممكن يلعب نلعب في مصر عشان الوقت ده، زائد الظروف إنك أنت هتسافر من السعودية على هناك فيها سبع ساعات طيران أو سبع ساعات ونص فدي كنا بنحاول فيها”.
وزاد حسن: “وحسام في الآخر خالص لما يعني الموضوع خلاص بقى يعني نهائي الماتشين اتحطوا خلاص فحسام قال لك أنا ما عنديش أي مشكلة أنا ما بخافش، وحتى في المؤتمر فحسام قال لك أنا جاي أنا بحترم المنتخب الإسباني إنما أنا جاي أنا يعني جاي عايز عايز أجتهد وعايز أشتغل وما بخافش عامة، حتة الخوف دي مش موجودة وإن منتخب مصر اسم كبير، فدي كان الكلام ده اللي قاله في المؤتمر نفسه وده اللي كان بنتكلم مع بعضينا فيه إنك هنجتهد ونشتغل ويبقى في احتكاك قوي جداً وخصوصاً قبل قبل كأس العالم النتائج الإيجابية و الأداء الإيجابي فيه بيديك ثقة كبيرة جداً في البطولة إن شاء الله بتاع كأس العالم”.
وردا على سؤال شعوركم ايه والعالم كله بعد مباراة إسبانيا بيتكلم عليكم، وترفع علم مصر أنت والكابتن حسام والجهاز الفني وبتلفوا الملعب،أجاب حسن: والله أنت عارف يعني أنت عارف شخصيتنا، في طبيعة شخصيتنا إن إحنا بنقلب الصفحة خلاص بتخلص حاجة مابنحاولش إن إحنا الحمد لله أنت يعني اتربينا سواء كنا في الملعب أو في شغلنا إنك أنت بتحقق حاجة كويسة إيجابية خلاص بنقول الحمد لله مبنفضلش معاها لأن أنت يعني عارف إن في حاجات جاية وحاجات أصعب، الواحد بيبقى بيحمد ربنا ويكون سعيد بيها وبيبني عليها إنما يعني إحنا وحسام مابنحسبهاش أو مابتفضلش متعلقة الموضوع في دماغنا لأن إحنا عارفين اللي فيه صعوبات واللي مفيش، والكرة والكرة لسه فيها كتير”.
و أشار:’علم مصر كان في ا بعض المصريين اللي موجودين في الاستاد، إحنا واقفين في السلام الوطني لقينا صفافير وكدة بطريقة غريبة جداً، استغربنا إحنا عارفين إسبانيا علاقتها كويسة والدنيا كويسة جداً بس الصفير دي زعلتنا إن إحنا طب ليه في السلام الوطني ليه بتعمل كدة؟ فكان بعد الماتش إن ربنا كرمنا وإن إحنا عرفناهم إن في منتخب قوي منتخب اسمه مصر، منتخب مصر قوي موجود على ملعبك وببيقاتل وإن يعمل نتيجة إيجابية وما يتغلبش، وفي الآخر خالص برضه إن إحنا بعلم مصر وإن إحنا في الآخر بنعرفهم إن الفرقة دي فرقة منتخب مصر وده علم مصر يحترم المفروض يبقى في احترام ليه كان المفروض، فكل يعني كل الناس وكل الأساسيات في العالم كلها لازم يبقى في احترام للسلام الوطني لأي بلد يعني”.
وأكمل حسن:” تالت نقطة زادت الواحد سعيد بالمباراة في حاجات كتيرة كلها خلتنا الواحد يبقى يبقى رد فعلنا بعد الماتش كدة يبقى سعداء في الملعب، نحيي جماهيرنا المصرية نقول لهم إن إحنا السلام أو العلم المصري لازم يحترم، في حاجات حاجات كتيرة في وقت واحد. زائد إن السعادة إن كانت اللعيبة كلها في حالة محترمة، اللعيبة بشكرهم بقول لك إن التركيز بتاعهم كان عالي، اللعيبة عايزة وعارفة إن هم داخلين على حاجات مستوى تاني خالص إنك أنت كأس عالم وهنلعب لسه مع منتخب برازيل برضه قبل كأس العالم، فالحمد لله التركيز كان عالي جداً واللعيبة كلها كانت حالة ما حصلتش، ما فيش حد قصر في الملعب وده اللي بنبني عليه من بعد ماتش السعودية وماتش إسبانيا، فطبعاً الواحد سعيد بيها يعني سعيد بكل التفاصيل اللي حصلت دي”.
و استأنف:” برضه من الصعوبات عشان أوريك إن اللعيبة كان تعبوا قد إيه، إحنا زي ما قلت لك إحنا سافرنا على ماتش السعودية وبعدين لعبنا الماتش وبعدين بعد الماتش على طول الفرقة كلها عملت عمرة كانت الساعة بالليل بعد ما خلصنا الماتش يعني كنا على واحدة تقريباً عقبال ما اتحركنا من الفندق اتنين يعني خلصنا العمرة حوالي الساعة ٧ الصبح. المفروض الطيارة كانت الساعة ٩، واللعيبة أصرت وطلبو مننا يعني كان بنحاول إن إحنا شايفين الموضوع هيبقى صعب لأن في سفر وفي ماتش إسبانيا صعب بس اللعيبة يعني كان ليهم رغبة كبيرة جداً وإحنا طبعاً مانقدرش يعني حتة ناخد يعني أكيد حاجة كويسة وإن حاجة دينية كويسة وحاجة مناسك العمرة تتعمل فقلنا تمام، وخصوصاً كمان مكافأة ليهم بعد الماتش بتاع السعودية. فسافرنا جينا من مكة على جدة الطيارة الساعة ٩ الصبح وبعدين سافرت سبع ساعات ونص وبعدين ٤٨ ساعة تمرين عشان تقابل منتخب إسبانيا، فعشان كدة بقول لك برضه ناس تفاصيل مش عارفاها، اللعيبة دي اجتهدت جداً واللعيبة دي كانت محطوطة تحت تعب وضغط بدني جامد جداً ومع ذلك ما فيش حاجة بانت عليهم وإن كانوا كلهم عازمين إن يعملوا حاجة كويسة، دي حاجة بقى بوضحها “.
شاهد:
