وجهت الحاجة محروسة مشجعة الزمالك رسالة هامة للاعبي الفريق الأول لكرة القدم بشأن مواجهة بيراميدز، ضمن منافسات بطولة الدوري المصري الممتاز.
وقالت الحاجه محروسة خلال مداخلة هاتفية ببرنامج “زملكاوي” عبر قناة “الزمالك”: “أنا في واحدة صورتني وأنا داخلة أنا وحفيدي وانا في طريقي للاستاد لحضور مباراة الزمالك امام شباب بلوزداد”
وواصلت:’ إنا كنت رايحة الماتش مع اتنين من احفادي بتوع الكورفا سود اللي بيقعدوا يصوصوا طول الماتش أيوه، فأنا كنت ماشية مع الكبير الصغير بقى سابنا، وبعدين وصلت المدرج الباشا بقى حطني في المدرج وراح بقى هو مع الكورفا سود عشان يصوت طول الماتش”.
وتابعت الحاجة محروسة:’فأنا قاعدة كان في أغاني قبل ما يبتدي المباراة، الإذاعة كانت مشغلة أغاني للزمالك فإحنا كنا بنغني معاهم، وإحنا بنغني حسيت إن في حاجة جنب كده فببص بقى إيه الأستاذ اللي بيصور فبيقول لي ممكن؟ قلت له ممكن”.
وشددت: “حفيدي محمد متعصب متعصب أه زينا كلنا، أنا زملكاوية عشان أخويا الله يرحمه ويحسن إليه، وهو بقى طالع زملكاوي، و أخوه زملكاوي أه وابن بنتي وجوز بنتي تاني زملكاوية سجلوا معايا في نادي الزمالك قبل كده”.
واكدت الحاجة محروسة:” أنا بروح في كل ماتش للزمالك خصوصاً بتاع الأهلي وفي أي فريق يعني أجنبي ماتش في أفريقيا، بس أنا زعلانة أوي النهارده والله زعلانة مالحقناش نحجز ماتش بيراميدز والله ما محدش يدخلني كده أنا عايزة أحجزها إن شاء الله لو في المقصورة هحجزها بفلوسي” .
وتابعت: “ربنا ينصرنا يوم الخميس يا رب، بقدرته وعظمته إن شاء الله نغلب بيراميدز بس بقى لعيبتنا يبقوا رجالة ويلعبوا، انزل العب ما تبصش لأي حاجة اللعيبة بتاعتنا تنزل تلعب ما تبصش لأي حاجة وإحنا طبعاً من غير مقاطعة يا رب كعبنا عالي على بيراميدز”
وأختتمت ردا على المذيع: “هم بينيمونا يا ست محروسة بالكلام ده يقول لك ده مصاب وده عيان؟” ده شغل بقى استغفر الله العظيم ملناش فيه”.
شاهد:
