حسم الكولومبي، أوسكار رويز، رئيس لجنة الحكام، الجدل بشأن لعبة مباراة الأهلي وسيراميكا كليوباترا في الدوري، وقارنها بلقطه مماثلة خلال لقاء بيراميدز والمصري.
وقال رويز،خلال تصريحات تليفزيونية ببرنامج “ملعب أون’،عبر قناة “أون سبورت”:” أنا شايف لعبة سيراميكا والأهلي ودي لعبة تحكيمية بحتة واتعمل لها مراجعة كويسة، وأنا شخصيًا عندي خبرة في محاضرات الفيفا وبنتكلم كتير عن لمسات اليد، لأنها من أكتر الحالات الجدلية في الكورة”.
و أضاف:” اللجنة الفنية راجعت اللقطة وجابت حالات مشابهة، سواء مع محمود وفا أو محمود عاشور، وتم تحليل اللعبة بشكل واضح، والاستقرار كان إن الكرة مش ركلة جزا ء، الزوايا الخلفية ممكن تخدع أي حد، وده اللي حصل مع ناس كتير، لكن الزاوية الأهم هي كاميرا التسلل، لأنها بتوضح المسافة بين إيد اللاعب وجسمه بشكل أدق”.
وواصل رويز:” هاتوا من زاوية التسلل اللي نزلت في حساب اتحاد الكرة.. علشان دي بتوضح إن إيد اللاعب ورا جسمه وفي وضع طبيعي، وكمان بيحاول يبعد إيده عن الكرة، ودي نقطة مهمة جدًا في تفسير الحالة”.
ومن جانبه قال الإعلامي إبراهيم عبدالجواد: “بس هو أيده مكنتش وراه يا مستر اوسكار دي كانت جنبه”.
ليرد رئيس لجنة الحكام:” نفس النوعية دي من الكرات حصلت قبل كده في بطولات كبيرة والنهارده حصلت في مباراة افريقيا ولم تحتسب وتم استمرار لعب لأن اللاعب بيحاول يتجنب لمس الكرة بإيده”.
وعاد ابراهيم عبدالجواد متسائلا: “ايه الفرق بينها وبين ركلة جزاء المصري النهارده ما هي هي ودي اتحسبت ودي لأ؟”.
ليجيب:” في ناس قارنتها بلقطة مباراة بيراميدز والمصري، لكن الحالتين مختلفين تمامًا، لأن في بيراميدز كانت إيد اللاعب مرفوعة وبشكل واضح مكبرة للجسم، إنما هنا الوضع مختلف، أنا هقوم اشرحها ليك اهوه في فرق بين الايد في جنبه وفي ايد مرفوعة “.
وتدخل إبراهيم عبدالجواد مجددا:” لا ما لاعب المصري هنا بيحاول يلم أيده جنبه والثاني في ماتش سيراميكا كان بيتمشى وبعدين جت في ايده “.
ليؤكد رويز:” في حالات كتير بنشوف فيها إن الحكم لازم يشوف أكتر من زاوية قبل ما ياخد القرار، وده اللي حصل، لأن مش كل زاوية بتدي نفس الانطباع، أنا شايف إن الموضوع لازم يتفهم بهدوء، وبصراحة من الناحية الفنية القرار اللي خده الحكم محمود وفا ليه مبرراته، ومش قرار عشوائي زي ما ناس كتير متخيلة”.
وأشار:” اللعبة دي اتعمل لها مراجعة فعلًا، واتحللت من أكتر من زاوية، خصوصًا زاوية التسلل اللي بتبقى أدق من الكاميرات الخلفية اللي ممكن تخدع العين، من الزاوية الصح، إيد لاعب سيراميكا كانت ورا جسمه وفي وضع طبيعي، وكمان واضح إنه بيحاول يبعد إيده عن مسار الكرة، ودي نقطة أساسية في تفسير لمسة اليد حسب تعليمات الفيفا”.
وشدد:” فكرة إن “الكرة لمست الإيد = ضربة جزاء” مش صح، لأن القانون بيبص على وضع الإيد، نية اللاعب، وهل مكبر جسمه ولا لأ، ودي كلها هنا مش متوفرة، المقارنة بلقطة بيراميدز والمصري مش في محلها، لأن هناك الإيد كانت مرفوعة وفوق وبتكبر الجسم، وده اختلاف جوهري يخلي القرار مختلف تمامًا”.
و اردف رويز'” كمان النهارده امين عمر في مباراة اتحاد العاصمة واولمبيك اسفي نفس اللعبه ومحسبهاش وأمر باستمرار الللعب لنفس السبب: إن اللاعب بيحاول يتجنب لمس الكرة”.
و يسأله إبراهيم عبدالجواد:” طيب ليه محمود عاشور استدعى الحكم في لقاء سيراميكا وهو نفس الحكم في مباراة النهارده اتحاد العاصمة وأولمبيك اسفي مستدعاش الحكم؟”.
ويكمل رويز:” نقطة إن الحكم الفار أحيانًا بيستدعي الحكم وأحيانًا لأ، دي اللي بتعمل الجدل الحقيقي، ودي ممكن تكون سبب غضب الجماهير لأنها بتحس إن مفيش ثبات في المعايير، لكن فنيًا بحت، الحالات “شبه بعض” في الشكل بس، إنما التفاصيل الصغيرة هي اللي بتفرق في القرار، ودي لعبة التفاصيل في التحكيم”.
وأختتم: “بالنسبة لمحمود وفا، آه أقدر أقول إنه في الحالة دي تحديدًا طبق القانون من وجهة نظر فنية، حتى لو القرار مش عاجب الجمهور، وده طبيعي في كرة القدم”.
