بعد أزمة مباراة سيراميكا.. سيف زاهر يوضح لماذا استعان الأهلي بتصريحات “أوسكار” القديمة للهروب من فخ الأداء
فجر الإعلامي سيف زاهر مفاجأة من العيار الثقيل بخصوص الأزمة المثارة حالياً داخل أروقة النادي الأهلي، عقب تعادله الأخير وحالة الغضب التي سيطرت على إدارته وجهازه الفني. زاهر كشف عن كواليس تحرك “الأحمر” لتقديم شكوى رسمية ضد الحكم محمود وفا، مطالباً بإجراء أثار الكثير من الجدل وهو “سماع تسجيلات غرفة الفار”.
وقال زاهر، خلال تصريحات تليفزيونية ببرنامج” ملعب أون”، عبر قناة” أون سبورت”: “طبعاً مافيش حديث من إمبارح غير لقاء الأهلي، الناس مقسومة ما بين الأداء الغير مرضي لفريق النادي الأهلي وما بين الحالة الجدلية اللي يشعر جمهور النادي الأهلي إن هو حصل ظلم كبير جداً عليه فيها وده اللي خلى إدارة الأهلي النهارده تتحرك بشكوى رسمية لاتحاد الكورة المصري بيشتكوا الحكم محمود وفا من بعض النقاط المهمة جداً”.
وأكمل:” قالوا إن هو كان الحقيقة عصبي جداً مع اللعيبة، تجاوز في حق اللعيبة بالألفاظ وبالزق بالإيد، وقالوا إن هم عايزين يسمعوا محادثة الفار، وقالوا إن كمان بخصوص تعيين الحكم محمود وفا لإدارة مباراة أمس يعني، مع قيامه بإدارة مباراة الفريقين في الدور الأول وارتكب ذات الأخطاء بحق الأهلي ولاعبيه”.
وتابع زاهر: “الإصرار من جانب لجنة الحكام على تعيين هذا الحكم لأسباب غير مفهومة، وبالرغم إنه عائد من ليبيا قبل ساعات من المشاركة في بطولة الناشئين.. الاحتفاظ بحق النادي في اتخاذ كل ما يلزم من إجراءات حيال ما صدر عن الحكم محمود وفا”.
وأشار:” طيب، كل الناس بتقولك هو الأهلي عايز يدفع أو عايز يسمع الفار مش من حقه؟ ويعني إيه الأهلي يسمع الفار؟ هو عشان النادي الأهلي فيطلب حاجات عمرنا ما سمعنا عنها؟ والحقيقة ده اللي الكابتن إمبارح قاله، الكابتن سيد عبد الحفيظ في تصريحاته إمبارح في مداخلة، فقال إمبارح إن يعني إحنا عايزين نسمع الفار، عايزين نسمع الناس دي قالوا إيه لبعض”.
و أردف زاهر: “فالناس قالت لك سيد عبد الحفيظ عايز يسمع الفار ليه؟ هو الأهلي عايز يعمل كل حاجة ليه؟ هل هنا السؤال بقى.. هو من حق الكابتن سيد عبد الحفيظ إن هو يصرح يقول أنا عايز أسمع الفار؟ هو من حق النادي الأهلي إن هو يقدم شكوى لاتحاد الكورة يقول إن هو عايز يسمع الفار؟ هو أذكره رئيس لجنة الحكام هيوافق على الكلام ده أو اتحاد الكورة هيوافق على الكلام ده؟”.
وأكد:” هنا النادي الأهلي استند بحلقة أو بتصريحات مع أوسكار معايا أنا ودي اللي قلبت الدنيا النهارده.. تصريحات أوسكار معايا في ملعب أون دي اللي استند إليها النادي الأهلي في تقديم شكواه، ودي اللي أكدت إن النادي الأهلي ليه حق وسيد عبد الحفيظ ليه حق أما يقول أنا من حقي أسمع الفار.. حقه لأن أوسكار هو اللي قال إن طالما دفع الغرامة أو دفع الرقم أو الرسوم المطلوبة، من حقه إنه يسمع الفار.”
و زاد زاهر: “إذاً الأهلي في هذا الطلب على حق، وإذا كان سيد عبد الحفيظ ما فتحش صدره ولا حاجة زي ما الناس كاتبة، هو سمع اللقاء، قرا، شاف اللي ليه، شاف اللي عليه، بيطلب حق من حقه.. ده تصريح أوسكار رئيس لجنة الحكام، فمن حق أي نادي مش النادي الأهلي ولا الكابتن سيد عبد الحفيظ بس، لا من حق أي حد إن هو يقدم طلب في اتحاد الكورة ويروح يسمع الحكمين قالوا إيه”.
وأستأنف:” محمود وفا رأيه إن هي مش ضربة جزاء، محمود عاشور رأيه إن هي ضربة جزاء بنسبة 100%، ومحمود وفا بيقول لأ أنا شايف إن هي مش ضربة جزاء وشايف إن الكادر اللي اتصور منه اللقطة دي مش ضربة جزاء. طب النهارده هو مين اللي يفصل في الموضوع ومين اللي يقول ده صح وده غلط؟ هنا تدخل أوسكار في الموضوع وشاف النهارده اللقطة وسمع النهارده الفار بالفعل والحقيقة طلع تصريحات كتيرة جداً إن هو شايف إن محمود وفا كان على حق”..
وأ ستطرد زاهر: “تواصلت مع ناس كتيرة في اتحاد الكورة وتواصلت مع المترجم الخاص بتاعه وكان حديثه معايا كالاتي: إن هو الراجل شايف إن الحكم ما غلطش، وشايف إن اللقطة دي مش ضربة جزاء، وإن ناس كتيرة من اللي بيتكلموا في التحكيم ما اطلعوش على تعديلات الاتحاد الدولي الأخيرة، اتحاد الكورة سايب الجزء الفني لأوسكار اللي أكيد في وقت من الأوقات لازم هيطلع ويصرح، ما عندوش بديل”.
و استرسل:” النادي الأهلي بعد مشاورات عديدة وبعد الحديث مع خبراء التحكيم شايف إن هي ضربة جزاء بنسبة 100% وشايف إن هو خسر نقطتين بفعل فاعل في توقيت صعب جداً جداً، وأعتقد إن الكورة دلوقتي ليست في رجل النادي الأهلي، الكورة دلوقتي في رجل أوسكار.. أوسكار دلوقتي اللي لازم يطلع ويحسم الجدل ويرد، الراجل أخطأ يقول أخطأ، الراجل على حق يقول على حق.
ده ما يخص اتحاد الكورة والرد على النادي الأهلي، بس الأهلي ما خلصش عند كده’.
واختتم:” الأهلي كمان قال إن الحكم تجاوز في حق لعيبته وإن هو طلع كم من الكروت على غير حق، ودي هنا ما تخصش اتحاد الكورة دي تخص رابطة الأندية المحترفة لأن دي رايحة للجنة المسابقات، قرارات لجنة المسابقات ما فيش قرارات في أي جولة غير بعد انتهاء الجولة”.
