علق الإعلامي أحمد حسام ميدو، علي زيارة هاني أبو ريدة رئيس اتحاد الكرة، وحسام حسن المدير الفني لمنتخب مصر وشقيقة إبراهيم مدير المنتخب للجنة الشباب والرياضة بمجلس النواب..
وقال ميدو،خلال تصريحات تليفزيونية عبر برنامج” أوضة اللبس”، على قناة “النهار”:” كان في زيارة مهمة لرئيس اتحاد الكرة والجهاز الفني لمنتخب مصر لمجلس النواب، ودي زيارة رسمية بتعكس قد إيه الدولة مهتمة بالمنتخب وبالاستعداد لكأس العالم، وكان موجود كمان وزير الرياضة كابتن جوهر نبيل”.
و أضاف:” أنا شايف إن المهندس هاني أبو ريدة اتعلم من أخطائه، وبقى فاهم إزاي يتم تجهيز المنتخب، ومهم جدًا إننا نغلط ونتعلم، لأن كلنا شفنا اللي حصل قبل كأس العالم في روسيا والأخطاء اللي أثرت على أداء منتخبنا”.
وشدد ميدو:’أنا متفائل لأن مشاكل كتير كانت موجودة انتهت، ومنها أزمة هاني أبو ريدة مع حسام حسن، وكمان الأداء قبل كأس الأمم ما كانش مُرضي للناس، لكن المنتخب رجع يكسب ثقة الجمهور تاني بعد ماتشات زي السعودية وإسبانيا”.
و أشار:” الناس فاكرة إن الجمهور مرتبط بالأندية أكتر، لكن الحقيقة إن الجمهور المصري دايمًا ارتباطه الأول بمنتخب بلده، والارتباط ده بيكون غير مشروط لأن الناس متعودة إن المنتخب ينافس مش مجرد يشارك”.
وواصل ميدو:” إحنا عندنا لاعيبة ومدربين كويسين جدًا، وكمان محترفين بره بيقدموا مستوى مشرف، فلازم نستغل ده ونستعد كويس وندرس العقبات اللي ممكن تقابلنا في البطولة”
وأكمل:” لازم يكون في تحضير قوي عشان نظهر بشكل يليق بينا، وأنا مش قلقان على المنتخب في وجود حسام حسن وإبراهيم حسن لأنهم بيركزوا جدًا في التفاصيل”.
وأختتم:” الزيارة للجنة الشباب والرياضة مهمة لأنها بتوضح قد إيه الدولة كلها واقفة ورا المنتخب، وده هيساعدنا نظهر بشكل كويس في كأس العالم، وده في الآخر بيمثل قوة ناعمة كبيرة لمصر”.
