أشاد الإعلامي سيف زاهر، بجمهور الزمالك بسبب مساندتهم للفريق مشددا ان الذي سيفوز بالدوري هذا الموسم من يقف جمهوره خلفه.
وقال زاهر، خلال تصريحات تليفزيونية ببرنامج “ملعب أون”، عبر قناة “أون سبورت”:” ما يخص الزمالك الأمور ما تختلفش كثيراً، هتقول لي الزمالك ظروفه، الزمالك قصته، الزمالك بجمهوره، المعركة دايرة في المدرجات أو المنافسة دايرة في المدرجات”.
و أضاف:” منافسة ما بين الجمهور وما بين الجمهور، أوعوا تفتكروا إن الجمهور موافق هنا ورافض، الجمهور هنا عايز بطولة عايز بطولة، هنا بيدعم الكيان وهنا بيدعم الكيان، اختلف مع الإدارة اتفق مع الإدارة، هنا بيدعم وهنا بيدعم، هنا بيساند وهنا بيساند.”.
وشدد زاهر: “جمهور الزمالك في مباراة المصري 1-0 للنادي المصري، سيناريو صعب، راح الدوري؟ الجمهور بعد الأحلام والطموحات، ثلاث نقط مهمين راحوا”.
وواصل:” دخل عصام عبده في تعليقه: فين الأداء؟ فين الزمالك؟ الجمهور حاضر في المدرجات، نشوف جمهور الزمالك في المدرجات عمل إيه، بالروح الدوري مش رايح، بالروح زي ما اتكلمنا على الثالثة شمال النهاردة بنقول الثالثة يمين، وبالدم بالروح الدوري مش هيروح”.
وأكمل زاهر: “نفس الهتاف خسرانين واحد مش هنطلع غير بالثلاث نقط، إحنا عايزين الدوري يرجع. الزمالك بريمونتادا بأربع أهداف ويصول ويجول عصام عبده ويتألق بأربع أهداف ويعمل كل حاجة في المباراة”.
وشدد:” مين اللي دور المكنة؟ جمهور نادي الزمالك الكبير العظيم في المدرجات. مين اللي معاه المفتاح؟ جمهور نادي الزمالك.
جمهور نادي الزمالك بيساند مين؟ بيساند الكيان، بيساند إدارة، بيساند لعيبة. تتغير الإدارة وتتغير اللعيبة ويتغير الجهاز الفني ويبقى الجمهور هو النجم رقم واحد، هو اللي معاه المفتاح وهو اللي قادر يدور المكنة’.
و أردف زاهر:” أقول لكم سر ما تجيبوش سر لحد، اللي جمهوره هيقف في ضهره قوي وهيساند قوي، المدرج اللي مش هتلاقي فيه كرسي فاضي هو اللي هياخد الدوري الممتاز، خدوها نصيحة من أخوكم الصغير، اللي جمهوره في ضهره جامد ومحجر هو اللي هياخد البطولة، هو اللي هياخد البطولة هذا العام”.
وزاد:” إلا إذا بيراميدز كان عنده وجهة نظر أخرى، وعلى فكرة وارد، بيراميدز تجربة ناجحة جداً، تجربة رائعة جداً، عاملة شغل جامد جداً، كان غير موفق المباراة الأخيرة مع النادي المصري، وكان الحقيقة أداء رائع لعماد النحاس في أول ظهور، ولكن ما زال الدوري كل حاجة واضحة”.
و استأنف زاهر:” اللي يقول لي الدوري انتهى أقول له انسى، انسى الموضوع ده، الدوري السنة دي هينتهي مع صفارة الحكم، مع صفارة الحكم، إحنا هدفنا ثلاث حاجات: دوري قوي، كورة كويسة، شكل جيد للرياضة المصرية، ده اللي بنسعاله”..
وأكمل: “ما يهمناش الخلاف مع مين، وما يهمناش الخناقة مع مين، وما يهمناش إن أشرح لك صورة وما يهمناش أقول لك اللقطة هنا كانت وحشة، وما يهمناش أقول لك مين هينتصر في الخناقة دي، كل ده مش مهم بالنسبة لي أنا مهم بالنسبة لي الصورة الكبيرة تطلع شكلها حلو، هو ده اللي إحنا بنسعى له، ده اللي إحنا بنبص له”.
واسترسل زاهر:” نتمنى إنهاء خلاف الأهلي مع اتحاد الكورة، نتمنى استقرار نادي الزمالك، نتمنى عودة الإسماعيلي، نتمنى إن المصري يقف على رجله، نتمنى إن تجربة بيراميدز تنجح، نتمنى إن سيراميكا تجربة رائعة مع علي ماهر، نتمنى إن الدوري المصري يطلع أفضل لعيبة، نتمنى إن حسام حسن يكسر الدنيا”.
وأختتم: “ده الرؤية بتاعتنا، رؤية شاملة وكاملة، ده اللي بنحلم بيه وده اللي بنسعاله. ده بيجيب جمهور بيجيب ريتش بيجيب ترندات؟ مش مشكلة، المهم إن هو مبدأ وجهة نظر اشتغلنا بيها من أول يوم”.
