شوبير يكشف كواليس اجتماع أوسكار رويز مع محمود وفا و عاشور بشأن أزمة مباراة الأهلي وسيراميكا
كشف الإعلامي أحمد شوبير عن تفاصيل الاجتماع السري الذي عقده “أوسكار” رئيس لجنة الحكام مع طاقم تحكيم مباراة الأهلي وسيراميكا كليوباترا.
وقال شوبير، خلال تصريحات تليفزيونية ببرنامج “الناظر”، عبر قناة “النهار”:” قصة إنه وفا يرجع، مع كل احترام لكابتن محمود وفا، أنا ضد الحملة اللي شغالة عليه، ما حدش يتكلم في ذمته ولا ولا حاجة من دي، لم يكن موفقاً في المباراة، هذا أمر واضح يعني ما فيهاش فصال، لكن أنا ما بحبش أتكلم لا في الذمم ولا في البتاع، لا لا لا، هذا أمر غير مقبول على الإطلاق يعني ولا في السلوكيات”.
و أضاف: “لكنه المباراة هربت تماماً منه، لأن من كلفه بها أخطأ، أخطأ بمعنى أخطأ أنا أبقى راجل جاي من ليبيا وعامل عمل ماتش قبلها بـ 48 ساعة، وراجع قبلها بـ 24 ساعة، ومسافر بلدنا، وبعدين جاي يوميها إلى القاهرة، يعني هو الراجل من حقه إنه يروح يشوف ولاده وأهله في كفر الشيخ، كفر الشيخ من المحافظات الجميلة اللي كلنا بنحبها وبنحترمها، إحنا كلنا بلد واحدة يعني، فالراجل يروح ويجي وكل حاجة، بس يكون عنده توقيت مناسب، يكون عنده راحة مناسبة زي لعيب الكورة بالضبط إنك بتعده بتهيئه بتريحه للمباراة، فهذا خطأ خطأ جسيم”.
وشدد شوبير:” النهاردة كان التحليل والكلام على مباراة الأهلي، على الأخطاء التحكيمية أو على الأداء التحكيمي، ومنها مباراة الأهلي وسيراميكا أو الأهم كان الأهلي وسيراميكا. ماذا قال أوسكار لمحمود عاشور ولمحمود وفا؟ وما تتفاجئش اللي قاله لمحمود عاشور بالحرف كده: أفضل حاجة إنك جبت محمود وفا، فما شايلوش أي مسؤولية إنه جاب وفا. قال له إن إنت عملته صح الدنيا كانت مشتعلة يعني، فاللي إنت عملته صح إن إنت استدعيت الحكم”.
وواصل: ” اوسكار قال لمحمود وفا إنه قرارك كان صح بعد ما إنت راجعت اللعبة، فقرارك من وجهة نظرنا إحنا صح، فأبرأ أزمة عاشور وأبرأ أزمة وفا، طب بس هو مين اللي فيهم غلطان؟ لا ما قالش إن في حد فيهم غلطان، ما هو لازم في حد غلطان من الاتنين يعني”.
و أردف شوبير: ” لكن هو في الاجتماع قال لعاشور هايل وبرافو عليك لو ما عملتش كده تبقى غلطان، إنت كده طفيت النار طفيت الولعة، ومحمود وفا هو طبقاً للقواعد واللوايح والقانون صح. حصل نقاش ما بينه وما بينهم وعاشور صمم على وجهة نظره ومحمود وفا صمم على وجهة نظره”.
و زاد:” عاشور صمم إنه كان قراره صحيح وإنه الزاوية الصحيحة هو جاب منها، وقال لك هو قعدنا بقى رحنا يمين وشمال وشمال ويمين وبتاع، ووفا قال لك لا أنا طلبت الزاوية دي وطلبت الزاوية دي لأن أنا كنت في الملعب وشفت كذا، وبالتالي كان القرار.
أنا قلت لك أنا مش هناقش القرار”.
واسترسل شوبير:” هتسالني أنا رأيك إيه؟ القرار إنها ضربة جزاء، مسألني رأي أنا إنها ضربة جزاء وهذا ليس رأيي يعني. إنت مثلاً من وسط 10 خبراء تحكيم تمانية يعني أجزموا إنها ضربة جزاء، بصرف النظر في ماتشات ما بتتحسبش ضربات جزاء وفي ماتشات بتتحسب ضربات جزاء بتكون صحيحة ومش صحيحة وهكذا، فدائماً الأخطاء واردة وإن كانت بتبقى مكلفة جداً جداً. أنا هنا ما يعني لا عمري ما هشكك في ذمم مستحيل، لكن أقول إنه حد أخطأ وحد ما أخطأش يعني القصة بالنسبة لي عادية طبيعية إن أنا أقول لك ده أخطأ وده ما أخطأش يعني، وخطأ ممكن يؤثر على مسيرة فريق في البطولة طبعاً مش عايز كلام، لكن أنا بحكي لك اللي حصل بالضبط يعني، فخلاص هو اتحاد الكورة أغلق الملف، لجنة التحكيم أغلقت الملف”،
و استطرد: “قرار اتحاد الكورة. الأهلي بيشتكي وفقاً لاتحاد الكورة، اتهموا بارتكاب أخطاء أثرت في نتيجة المباراة، وإنه تعدى على اللعيبة بالفاظ باليد وبالألفاظ، أنا قلت الألفاظ مستحيل يعني، لكن هو زق تريزيجيه أه كده يعني، ودي الشكوى اللي بعتها النادي الأهلي”.
وأشار:” اتحاد الكورة أو إمبارح اتحاد الكورة راح ناشر فيديو تحليل لجنة الحكام لحالة لمسة اليد وأكد صحة قرار الحكم محمود وفا. بالمناسبة الاتحاد طلب من أوسكار إنه يطلع النهاردة وإنه يحللها بقى ويقولها فقال لهم ما خلاص ما إحنا حللنا إمبارح وإحنا مش هنفضل طول اليوم طول الليل والنهار في الموضوع ده بعد ما هو طلع إمبارح أو طلع كلام إمبارح قال لك ما ينفعش”.
واختتم: “الاتحاد قال لك الحكم كان في تمركز جيد وتمتع برؤية واضحة داخل منطقة الجزاء، ده على لسان أوسكار، اللي هو أوسكار قاله اتحاد الكورة راح حطه على صفحته. أنا خلاص مش هحلل الكورة ولا هتكلم فيها لأن مصر كلها حللتها واتكلمت فيها وأنا قلت لكم رأيي الواضح فيها يعني”.
