كشف الإعلامي أحمد شوبير، كواليس الأزمة بين اتحاد الكرة والأهلي بسبب توابع أزمة مباراة سيراميكا وطلب الأحمر سماع حديث الـVar, وحوار الحكام.
وقال شوبير، خلال تصريحات تليفزيونية ببرنامج “الناظر”، عبر قناة “النهار”:” إحنا على بوادر أزمة عنيفة ما بين الأهلي واتحاد الكورة، إيه هي الأزمة أو إيه هي أسباب الأزمة؟ أنتم عارفين اتحاد الكورة استجاب لطلب النادي الأهلي بالاستماع إلى المحادثة التي جرت ما بين حكام الملعب وحكام الفار”.
و تابع:” اللي هيحضر من اتحاد الكورة هو أوسكار والمترجم بتاعه الأستاذ كريم، دول خلاص اللي هيحضروا اتحاد الكورة. النادي الأهلي وعبر تسريبات كتيرة جداً جداً ولكنها ليست أخبار رسمية، اتقال إن الكابتن سيد عبد الحفيظ بصفته عضو مجلس إدارة هيكون موجود ومشرف على الكورة، والتسريبات بقى قالت إنه هيكون معاه خبير أصوات، إن هيكون معاه حكم سابق، وهكذا يعني”.
وأشار شوبير: “فاتحاد الكورة النهاردة باتصالنا بالسادة المسؤولين قال اللي يحضر اتنين من الجهاز الفني والإداري، يعني عايز تجيب واحد فني وتجيب واحد إداري أهلاً وسهلاً، تجيب إداريين أهلاً وسهلاً، تجيب فنيين أهلاً وسهلاً، بس لازم الاتنين دول يكون اللي اسمهم بيتكتب في السكور شيت، بمعنى ممكن تجيب مارسيال كولر، ممكن تجيب عادل مصطفى، ممكن تجيب وليد صلاح الدين مع حفظ الألقاب للجميع، أي حد من دول، تجيب مدرب الحراس، تجيب أي حد من الإداريين أهلاً وسهلاً، اتنين ليك اتنين، لكن أكتر من كده مش هيحصل”.
واكمل:” اتحاد الكورة كمان اعترض على قصة قال لك ما ينفعش يجي حكم سابق ده مش في العرف، لازم حد يكون من البورد بتاع النادي الأهلي اللي في الملعب، طب مجلس الإدارة قال لك لا ده اسمه مش موجود في السكور شيت كويس، لكن قصة حكم سابق وقصة بقى كلام وأوسكار يقول كلام وحد يقول كلام، هذا الأمر مش هينفع”.
وواصل شوبير: “التليفونات قال لك لا طبعاً الناس تدخل بتليفوناتها يعني وإحنا داخلين في تفتيش، وقال لك في حاجة اسمها منع التليفونات أهلاً وسهلاً، اتفضل تليفونك يكون موجود معاك، ما الكلام ده أصلاً مش موجود في الحسبان. طيب قال لك خبير الأصوات يجي إمتى؟ قال لك لو أنت ما اقتنعتش باللي هيحصل بكرة حضرتك وصلت للجنة الانضباط، هنا من حقك إنك تجيب خبير أصوات دي ما فيش فيها فصال، واتحاد الكورة أرسل خطاباً رسمياً للنادي الأهلي بهذا المعنى”.
وزاد:” طيب النادي الأهلي بقى رد فعله إيه؟ النادي الأهلي قال لك لا أنت ما تجبرنيش أجيب مين من جوه النادي، بعدين الكابتن سيد عبد الحفيظ ده مشرف على الكورة وبالتالي هو موجود في البورد، اسمه بقى يتكتب في السكور ما يتكتبش في السكور أنا بقول لك وجهتي النظر، فالنادي الأهلي قال لك لا الكابتن سيد عبد الحفيظ رايح بكرة وهيبقى موجود وهيبقى معاه حد، لكن مش هياخد معاه حكم ولا هياخد معاه خبير أصوات، لكن الكابتن سيد هيكون موجود لأنه ده مشرف عام على الكورة فما حدش يقدر يقول لنا هذا الأمر. بقى تقول لي إنه معاه اسم ما بيتكبش في السكور شيت أو بيتكتب، قال لك دي مش مسؤولية اتحاد الكورة، الكابتن سيد له صفة قوية داخل النادي الأهلي”.
و أردف شوبير: “كمان النادي الأهلي قال لك إنه طلب اتحاد الكورة مرفوض لعدة أسباب: أولاً ما فيش لايحة أو قانون اللي بيحدد مين اللي يجي ومين ليه حق الحضور، ادي نمرة واحد. نمرة اتنين قال لك الخطاب اللي أنت بعتته لي، بعتته لي بعد مواعيد العمل الرسمية وجيه الساعة 3 مساءً، قال لك اتحاد الكورة ما حددش مسبقاً لما بعت خطاب للنادي الأهلي يطلب الاستماع للمحادثات مين اللي يجي ومين اللي ما يجيش وعدد الحاضرين، والأهلي كمان قال لك أنا مش معترف أصلاً بالخطاب اللي أنت بعتته لي ده وهنرسل اللي إحنا شايفينه مناسب لحضور هذه الجلسة”.
واسترسل:” أنا بقول لك بالظبط من جوه النادي الأهلي رد الفعل بالظبط داخل النادي الأهلي، وقد نرى بعد قليل بياناً رسمياً من النادي الأهلي بهذا المعنى اللي أنا قلت لحضرتك عليه، ممكن دلوقتي، ممكن بعد شوية، ممكن قبل انتهاء الحلقة، ممكن بعد انتهاء الحلقة، قد نرى بياناً رسمياً من النادي الأهلي في هذا الأمر، فنحن على أعتاب أزمة. كمان الأكتر من كده إن الأهلي وجه الدعوة للسادة الإعلاميين إنه يكونوا موجودين، فاتحاد الكورة هو كمان قال لك لا دي جلسة استماع خاصة أنا مش هدخل الإعلاميين، أنا برده بقول لك اللي بيحصل”.
و استأنف شوبير:”، فالأهلي عبر وسائله الإعلامية دعا السادة الإعلاميين، فهل يذهب الإعلاميين ويستنوا خارج الاتحاد ولا الاتحاد يسمح لهم؟ الاتحاد قال لك أنا مش هسمح بدخول حد، أنا هنا ده المكان بتاعنا والناس اللي جايين من النادي الأهلي على الرحب والسعة أهلاً وسهلاً ونشيلهم على دماغنا، لكن ممنوع دخول الإعلام يستنوا بره ما عندناش مشاكل، وبره يعني زي ما هم عايزين يعملوا، لكنه جوه الاتحاد مش هيحصل”.
وتابع شوبير: “فالأزمة ما زالت مستمرة وشكلها هتتصاعد كمان، لأنه كل طرف بيقول لك ده حقي ما حدش ليه حاجة عندي، اتحاد الكورة بيقول لك أنا حقي أنا اللي بدير المنظومة وأنا اللي بسيرها وأنا اللي بقول النظام عامل إزاي، النادي الأهلي بيقول لك ده حقي ودول ناس موجودين عندي في المنظومة وبالتالي ما حدش يقول لي هات مين وما تجيبش”.
وأكد:” هل يجد في الأمر جديد خلال الساعات القليلة المقبلة؟ من خبراتي يعني ومن اللي أنا أعرفه عن الكورة المصرية إن كل شيء وارد، هل اتحاد الكورة يصمم على طلباته؟ وارد جداً، هل النادي الأهلي يروح باللي هو عايزه ولو ما حصلش يمشوا؟ وارد جداً، هل اتحاد الكورة ممكن يتراجع؟ وارد جداً، هل الأهلي ممكن يبقى عنده شوية مرونة؟ وارد جداً”.
واستكمل:” لسه هتبقى في ردود أفعال سواء من هنا أو من هنا، والكلام اللي أنا بقوله لك ده من مصدر كبير مسؤول داخل الاتحاد ومن مصدر كبير مسؤول داخل النادي الأهلي، يعني ما بجيبش ده مش اجتهاد مني، دي مصادر مهمة داخل الاتحاد ومصادر مهمة داخل النادي الأهلي.
وأختتم:” ده جواب الاتحاد وده معلن وده رد النادي الأهلي، وده أنا بقوله لك حالاً واحتمال يكون أعلن خلاص اللي هو بالاجتهاد، لكن النادي الأهلي مدي لهذا الاجتماع أهمية كبيرة جداً جداً، واتحاد الكورة بيقول لك أنا ما عنديش حاجة أخبيها يا فندم اتفضل، وهيكون معاك أوسكار رئيس لجنة الحكام، ادي القصة وادي الموضوع وادي الحدوته، هنشوف إيه اللي ممكن يحصل”.
شاهد:
