كشف الإعلامي أحمد شوبير، حقيقة رحيل إمام عاشور لاعب الأهلي عن صفوف الفريق الأحمر، وهل سيعود أكرم توفيق لاعب الشمال القطري.
وقال شوبير، خلال تصريحات تليفزيونية ببرنامج” الناظر”، عبر قناة “النهار”:*رقم اتنين هنروح لأكرم توفيق. أنا الحقيقة تابعت مع بعضاً من الأصدقاء في قطر قصة أكرم مع نادي الشمال، على فكرة نادي الشمال هو اللي بينافس نادي السد السنة دي على الدوري العام، وبغداد بونجاح ناقل الفريق نقلة ثانية الحقيقة بعد ما كان هداف السد بقى هداف الدوري مع نادي الشمال القطري”.
وتابع:” وأكرم توفيق خاض تجربة احترافية، أكرم طبعاً لعيب هايل لكنه حظه إنه ما بقاش موجود في المنتخب الأول، يمكن بيلعب أحياناً ما بيلعبش أحياناً في الشمال القطري”.
وأكمل شوبير: “أكرم من جواه نفسه العودة للنادي الأهلي، النادي الأهلي ما كلمش حد حتى اللحظة دي، ما كلمش حد لا من اللي موجودين دلوقتي ولا من اللي موجودين بره. يمكن الأهلي بيحط قائمة عشان يشوف هيعتمد على مين يجيب مين الفترة القادمة، لكن الأهلي لم يتحرك حتى هذه اللحظة في موضوع ضم أكرم توفيق عفواً، لأنه الأهلي مشغول قوي بالست مباريات القادمة في بطولة الدوري العام ولسه هيبقى في حسابات كثيرة للفترة القادمة”.
و أشار:” حصري رقم اثنين من النادي الأهلي، خلينا نطلع من أكرم إلى إمام عاشور يعني. طيب قصة إنه الترويج خلال هذه الأيام لموضوع رحيل إمام عاشور يعني، تاني اللي قلته أولاني بقوله تاني، واللي قلته من 10 أيام ومن 15 يوم برجع أقوله النهاردة وهقوله بكره وقلته امبارح، الأهلي لا يفكر الآن سوى في ست مباريات حاسمة لبطولة الدوري العام، هو يعلم أن موقفه مش أحسن حاجة لكن بيحاولوا وبيجاهدوا بكل الطرق إنه الدنيا تتظبط”.
وشدد شوبير: “وإمام نفسه عارف إن فاضل له سنتين في التعاقد بتاعه، وبالتالي الأهلي لا فاتح مع حد ولا هيفتح مع حد، على الأقل اليومين دول مش فاضي إنه يفتح مع حد، اليومين دول ملف التجديد إلى أن يجد جديد، وإمام مش هيقول أنا ماشي هيكون جاي ماشي لأنه في نادي وفي إدارة”.
و أردف:” لكن الحقيقة للأمانة الشديدة يعني، بصرف النظر عن أهلاويتي، إلا إنه هناك حملة قوية حملة تشكيك سوشيالية رائعة تدار بنجاح ضد النادي الأهلي، ليس فقط على مستوى فريق كرة القدم، لكن مثلاً الأهلي طول العمر بيطلب حكام أجانب، يقول لك إزاي الأهلي طلب حكام أجانب؟ طب ما هو إنت بتشتكي من الحكام المصريين مع الأهلي، فالأهلي هو اللي بيطلب حكام أجانب، فيقول لك إزاي الأهلي بيطلب حكام أجانب؟ طيب الأهلي مش هيطلب حكام أجانب، يقول لك إزاي الأهلي ما طلبش حكام أجانب؟ يعني ناقص بقى مدربي الفرق المنافسة هم ينزلوا يحكموا مباريات الأهلي، ده اللي ناقص ومش هيعجب برضه على فكرة يعني”.
وأكد شوبير: “فالأمر عجيب جداً يعني، الأهلي شايف إنه اللائحة بتسمح له إنه يطلب حكام أجانب، وإنه الأزمة الكبيرة اللي حصلت السنة اللي فاتت في الانسحاب أمام الزمالك هي قصة الحكام يعني إنه ما جابوش حكام أجانب، وأنا ضد مبدأ الانسحاب بس عشان تبقى القصة واضحة بالنسبة لكم، من أي فريق أنا ضد مبدأ الانسحاب أبداً أبداً أبداً، خصوصاً لما بتبقى الفرقة كبيرة زي الأهلي والزمالك، لكن أنا قصدي انسحاب النادي الأهلي السنة اللي فاتت كان بسبب عدم استدعاء طاقم حكام أجنبي”.
وزاد:” فدي حدوتة، شوية اللعيب ده ماشي، شوية اللعيب ده طالب 70 مليون، طالب 80 مليون، طالب 50 مليون، طالب 1000 مليون، كلها أخبار الحقيقة لا أساس لها من الصحة على الإطلاق، ما فيش أساس من الصحة خالص خالص”.
و أستأنف: “تاني يا جماعة، الأهلي لم يتحدث مع أي لاعب خارج مصر من أبنائه القدامى إنه يرجع، ما تحدثش بمعنى ما تحدثش، ولم يتحدث مع أي لاعب داخل مصر عشان موضوع التجديد أو مد تعاقد ما حصلش خالص نهائي خالص. بقول لك في تركيز كامل، كابتن سيد عبد الحفيظ مقيم إقامة كاملة مع الفريق، كابتن وليد صلاح، الطاقم الإداري، الطاقم الفني، الطاقم الطبي، في مجلس إدارة النادي”.
وأتم:” زي الكلام إن على إبراهيم عادل ونورشلاند وده ملك لشقيق السيد ياسين منصور، لكن الأهلي لم يتكلم حتى الآن، والله ممكن تلاقيه في الأهلي جايز، لكن الأهلي لم يتكلم حتى الآن. أنا راجل عندي مرحلة خطر هنا، عندي هنا مطب عنيف جداً جداً جداً عايز أتخطاه، مش هسيب ده وأفكر في ده، هفكر في اللي تحت رجلي ده لأن لو عملت كده وما خدتش بالي رجلي هتغرس، فأنا إزاي أعدي ده وبعدين أبقى أبص على ده، ده الأهلي بيفكر فيه دلوقتي، فده بالنسبة لإبراهيم عادل وبالنسبة لإمام عاشور”.
