عبد الحفيظ يفجّرها أمام اتحاد الكرة: “من إمتى بتحددوا مين يحضر ومين لا.. الأهلي بيعرف يجيب حقه”!
تصاعدت حدة الأزمة بين النادي الأهلي واتحاد الكرة، بعد إلغاء جلسة الاستماع الخاصة بمحادثات تقنية الفيديو (VAR) لمباراة سيراميكا كليوباترا، وسط حالة من الغضب داخل “القلعة الحمرا”.
وفي تصريحات قوية لوسائل الإعلام أمام مقر اتحاد الكرة، عبّر سيد عبد الحفيظ، عضو مجلس إدارة الأهلي، عن استيائه من طريقة إدارة الجلسة، مؤكدًا رفض النادي للقيود المفروضة على الحضور.
وجاءت تصريحات عبد الحفيظ: “إحنا بعتنا جواب لاتحاد الكرة، والناس ردوا علينا وقالوا إن في جلسة استماع يوم الحد الساعة 12، وبناءً عليه رحنا في الميعاد، فوجئنا امبارح إنهم بيحددوا الأطراف اللي هتسمع المحادثة، وده طبعًا مخالف للائحة”.
وتابع: “الكلام ده حصل قبل كده بعد أحداث مباراة الزمالك والأهلي في السوبر 2020 والمشاكل اللي حصلت كان في جلسه استماع واتحاد الكرة بعت لكل نادي مين يمثلك في الجلسه دي .. وده أمر طبيعي معرفشي ليه المرة دي يقولك لازم حد من الجهاز الفني بس”.
وواصل: “إنت جاي تحددلي مين اللي يبقى موجود، وبتقولي لازم عضو من الجهاز الفني اللي كان متواجد في مباراة سيراميكا كليوباترا ليه؟، طب فرضا فرضا ماذا لو تمت إقالة الجهاز الفني بالكامل؟ امبارح أو الجهاز الإداري؟ في الحالة دي كان مين هيبقى موجود النهاردة؟ محمود وفا وأحمد مجاهد مثلًا؟”.
واختتم: “موقف الأهلي؟ في الآخر النادي الأهلي عنده مجلس إدارة يعرف يجيب حقوقه كويس بمنتهى البساطة يعني”.
