كشف الإعلامي أحمد شوبير، موقف نادي الزمالك من الازمة الحالية بين الأهلي واتحاد الكرة بسبب مباراة سيراميكا في الدوري.
وصال شوبير،خلال تصريحات تليفزيونية ببرنامج “الناظر”،عبر قناة “النهار”. جت بقى القصة بتاعة الأهلي وسيراميكا، وكل حد بيدافع عن وجهة نظره. معظم الناس، مش كلهم لكن معظمهم، أجمعوا إن الأهلي كان ليه ضربة جزاء أمام سيراميكا. معظم الناس طبعاً في الوقت الحرج ده من الدوري العام أي خطأ محسوب، أي خطأ بيبقى فيه مشاكل، فحصلت مشكلة والنادي الأهلي بيبحث عن حقوقه، اتحاد الكورة على لسان اللجنة (لا إحنا ما حدش ليه حاجة عندنا وإحنا ما أخطأناش)، وبعدين الدنيا فجأة بدأت تتصاعد تتصاعد تتصاعد”.
وواصل:” من حق النادي الأهلي تماماً أن يبحث عن حقه، قصة محسومة وخلصانة بنسبة 1000%، حق النادي الأهلي تماماً أن يبحث عن حقه، ومن حق اتحاد الكورة أن يدافع عن نفسه، لكن مش من حق أي حد إنك تفسد لي وتفشل لي المنظومة الكروية في مصر، لأنه إحنا ما صدقنا إن الأمور عادت وإن الجماهير عادت وإن الدوري بينتهي بشكل جيد، وإن الإثارة موجودة في ذروتها سواء للأندية اللي بتنافس على اللقب أو الأندية اللي بتحاول إنها تهرب من الهبوط”.
واشار شوبير:” فإحنا دخلنا في دوامة عجيبة جداً وغريبة جداً، ويبدو على رأي فهد بلان زمان كان بيقولك (أهل الهوى دائماً وأبداً مكتوب عليهم قلة الراحة)، إحنا أهل الكورة دائماً وأبداً مكتوب عليهم قلة الراحة، مثل السفينة بلا قبطان يلعب بها الموج رواحه غواحه زي ما أنت عايز بقى تقول”.
وأردف:” نادي الزمالك، اللي هو كان دائماً وأبداً مسار الشكوى والمشكلة والحدوتة. فنادي الزمالك لأنه بيكسب، لأنه قصته ماشية، لأنه شغال أفريقيا كويس، لأنه شغال محلياً كويس، قالك اتصرفوا مع بعض أنا برة الحدوتة دي ماليش علاقة”.
وأكمل شوبير: “وده اللي أنا كنت بقوله زمان إنه طول ما أنت بتكسب مش هيبقى فيه خلافات، طول ما أنت بتخسر طول ما هتلاقي مشكلة وحدوتة وأنا هنا وأنا هنا وهكذا. فالحدوتة كلها متوقفة على النتائج، النتائج هي اللي بتخليك تمشي يمين تمشي شمال تمشي في النص أو تقع تغرق قولاً واحداً يعني عشان الواحد يكون أمين”.
وأختتم:” هتكسب والدنيا تمام هيبقى الدنيا ربيع والجو بديع وقفل لي على كل الموضوع يا عم أنا بكسب وأنا ماشي أنا مالي وأنا مش هبص أنا ورايا مش هبص للقصة دي أنا شغال أنا كسبان أنا ماشي، لكنه لما يبقى فيه تعثر هيبقى فيه دايماً بتدور على سبب. ولو كل واحد فينا، الأهلي، اتحاد الكورة، قبل كدة الزمالك أو أي حد، لو كل واحد فينا بص وشاف هيعرف إن الخطأ عنده هو، سوء إدارة، سوء تقدير، سوء تدريب، سوء نتائج، هي قصة مش أكتر من كدة.”
