في أول تحرك رسمي يعكس مساندة الإدارة للاعبين والجماهير في الأوقات الصعبة، وجهت نيرة الأحمر، عضو مجلس إدارة نادي الزمالك، رسالة دعم ومؤازرة قوية عقب خسارة لقب بطولة كأس الكونفدرالية الإفريقية بركلات الترجيح على ملعب الفريق، واصفة اليوم بـ “المحبط والحزين”، ومؤكدة في الوقت ذاته أنها ليست نهاية المشوار للقلعة البيضاء.
وقال الأحمر:” أحب أقول كلمتين بمناسبة الكونفدرالية، كان يوم محبط وده أكيد، وكان يوم حزين وده أكيد، لكن هو مش نهاية المشوار، الموضوع كان في إيدينا جدًا، لكن لازم نقول حاجة مهمة: مفيش لعيب بينزل الملعب متخاذل، وما فيش لعيب مش عايز يكسب”.
و أضافت:” اللعيبة دي استُهلكت جدًا، اللعيبة تعبانة ومجهدة وبتعافر لآخر نفس، وبتحاول لآخر نقطة دم، إنت بتواجه فريق عنده ماتشات متأجلة ومرتاح، وده مش تقليل منه، هو استحق الفوز ومبروك له، لكن لازم نفهم الفارق في الظروف”
وشددت الأحمر:” مفيش لعيب هيبقى عارف قيمة البطولة والدعم الجماهيري والمادي وينزل متخاذل، ده كلام غير منطقي، الجمهور تعب ووقف ورا الفريق وكان سبب أساسي في وصوله للنقطة دي، واللعيبة كانت بتقاتل عشان الجمهور”.
و واصلت:” اليوم كان صعب على كل زملكاوي، لكن ده قدر الله وما شاء فعل، ولازم نكمل، من شهرين أو تلاتة، محدش كان متوقع الزمالك يوصل لنهائي الكونفدرالية أو ينافس على الدوري وسط كل الأزمات”.
و أكدت الأحمر:” الفريق عدى بظروف صعبة جدًا: أزمات مالية، إيقاف قيد، إصابات وغيابات، وضغط مباريات مرعب، اللعيبة كانت بتلعب كل يومين أو تلاتة وبتنافس على أكتر من بطولة”.
و أكملت:” خرجنا من الكأس بسبب الضغط، لكن الفريق كمل وقاتل لحد الآخر، جماهير الزمالك دايمًا في الضهر، مش جماهير مناسبات، بتظهر وقت الشدة قبل السهولة”.
وتابعت الأحمر:* الخسارة بركلات الترجيح على أرضك صعبة جدًا ومؤلمة، وكل واحد من حقه يزعل لكن دي كرة القدم، وده اللي حصل، قدامنا 48 ساعة دعم كامل، لأن اللعيبة دي بتشتغل في ظروف صعبة جدًا”.
و أردفت الأحمر: “عندي رسالة للاعيبة: إنتوا عملتوا اللي عليكم وزيادة، عملتوا المستحيل لكن لازم تقفلوا صفحة الكونفدرالية فورًا، وتفوقوا نفسكم بنفسكم إنتوا بس اللي تقدروا تخرجوا من الصدمة دي، وتلموا نفسكم ماتش الدوري الجاي لازم يتلعب على الفوز، مش على التعادل، لو لعبت على نقطة مش هتاخدها، لازم تنزل تلعب على التلات نقاط إحنا في ضهركم، ودي مش نهاية المشوار رغم أقل الإمكانيات، عملتوا إنجاز واضح للجميع”.
و أختتمت:” رسالتي لأبناء الزمالك الحقيقيين: الدعم أهم من الهجوم دلوقتي في ناس بتهاجم، لكن في ناس تانية بتدعم وبتقف جنب الفريق الغريب إن في ناس من بره الزمالك بتقول كلمة حق وبتدعم، وده لازم يتفهم محتاجين كلنا نبقى إيد واحدة في الـ48 ساعة الجايين ندعم الكيان، مش الأشخاص الأسماء بتروح، لكن الكيان هو اللي بيستمر نادي الزمالك ملك لجماهيره، وهو الباقي
سيبوا الخلافات والحسابات الشخصية، وركزوا على دعم النادي وبس”.
